Nyökit 22 - Bibilia Buk na Ŋun nagon koti luŋu a

¹ Ko do a meddya dwöt lo luŋösur kode köbilityo nanyit a girara kaŋo, an do ko ’de ’ya konyen kulök ko lepeŋ, a do ködyö nyökuŋdye lepeŋ ko luŋösur ni.

² A ko luŋösur ti gwon nyona ko do, kode do ködyö ti den lepeŋ, a do ködyö joŋgi turu ’buti nanyit i ’baŋ konut kadi, a nye gwe konut tojo ko luŋösur a galaddu lepeŋ, a do nyökökiŋdye lepeŋ ŋo nanyit.

³ A do ködyö koŋdi sona ko kaine nanyit; sona köti ko boŋo nanyit; a do koŋdi sona ko ŋo liŋ ti luŋösur na likin nagoŋ nye a tolikin a do aje ryö kune; do ködyö ti ’de ’ya konyen kulök ko se.

⁴ Ko do a meddya kaine na luŋösur kode dwöt lonyit a ’doro kak i kiko, an do ko ’de ’ya konyen kulök ko lepeŋ; a do ’diri ködyö parakiŋdye lepeŋ i ’bilikiŋdya na nye ki köti.

⁵ Ŋuto nanakwan ködyö ti rukukiŋdyö ŋo nagoŋ a ti ŋuto lulalet, kode köti a ŋuto lulalet tine rukukiŋdyö boŋo na ŋuto nanakwan; kogwon nye lo koŋdya kine ŋo lo MATAT Ŋun ilot maman.

⁶ A ko ködyö do ryeju kadi na kwenti a lunya den i kiko, i lele ködini ki kode kak, na gwon ko torela kanyit kode nyuŋ gwon a katolok, se ko ŋote i kara-pa i loki na torela kode nagoŋ nyuŋ a katolok, a do ködyö tine joŋga ŋote se ko torela kanyit i pirit na geleŋ;

⁷ a do ködyö kölöddi ŋote i tu, ama a do bulöni bulö joŋga torela kanyit a kunök; anyen kulya kunök mo gwon ’bura; a perok kulök mo gwe jore.

⁸ A ko do a ’duggö kadi ludukötyo, a do ködyö tetenakiŋdye gömit konut i lo ’dek lu ’dayat ki, an do ko joŋdya rima konut kadi, ko lele ŋuto a ’duruun kata.

⁹ Do ködyö ti wekiŋdya gweyarijin murek ti nyomot i luköbi iŋot na binyo i pirit na geleŋ, an ludweki kanyit liŋ ko gwon a lo rurwan, an nyomot lo we do kulu se ko radan na luköbi na binyo ko gwon a lo rurwan.

¹⁰ A do ködyö tine kuŋu ko dwöt se ko kaine i pirit na geleŋ.

¹¹ A do ködyö tine jupu boŋo nagoŋ a gweyarijin murek, nagoŋ a kupir ko a waro i pirit na geleŋ.

¹² Do ködyö tetenakiŋdya mugun boŋo muit nagoŋ ko ŋoŋesi Iŋwan a swalya.

Saresi lo riŋari ŋutu lyan ko nawate nagoŋ a köŋu ’börik

¹³ A ko lele ŋuto a joŋga narakwan, a mori ko lepeŋ, a maŋdi lepeŋ,

¹⁴ a ŋökiŋdye lepeŋ kulya ti yu na kwe, a jakiŋdye lepeŋ karin narok, adi, Nan a joŋga na nakwan, a nan mori ko lepeŋ, a nan gwe a ko ryö lepeŋ a ’diet,

¹⁵ a kirut monye ŋuro se ko ŋote nanyit ködyö kwekiŋdye kweyet na tukö ’disen nanyit i temejik ti köji i lupet nanyit.

¹⁶ A monye ŋuro ködyö kulyani ko temejik adi, Nan a tikin ŋuro nio lo ŋuto i yemba, a nye maŋdi lepeŋ;

¹⁷ meddi ta, nye aje pökiŋdyö lepeŋ kulya ti yu na kwe adi, nye a ko ryö ŋuro nio a ’diet. Ama maŋina kweyet na tukö ’disen na ŋuro nio. A se ködyö petakiŋdye boŋo i komor na temejik ti nu köji.

¹⁸ A temejik ti nu köji ködyö ’dumuŋdye lu ŋuto a ’biddye lepeŋ;

¹⁹ a se ’duŋökiŋdye lepeŋ riŋet a ropet na toron nagoŋ temuŋdya a sekelejin mia geleŋ ti pödö, a mo tikin-dye se monye ŋuro, kogwon nye aje jakiŋdya ŋuro ’diet na Yisaraele karin narok; a nye mo gwe a nakwan nanyit; a lu ŋuto tine yan lepeŋ i perok gwiliŋisi kanyit liŋ.

²⁰ Ama ko kine kulya a gwak, adi tukö ’disen na nu ŋuro a ko rye kanyit,

²¹ a se ködyö joŋgi nu ŋuro kaŋo i kötumit na kadi na monye lonyit, a ŋutu ti köji nanyit ködyö gugubuje lepeŋ ko ŋurupö tojo a twan, kogwon nye a koŋdya tu ’böŋön i Yisaraele i koŋdya na lulupujö ko monye kadi; a ta ködyö lalaaddi kulya narok kaŋo kasu kiden.

²² A ko lele ŋuto a rye i doto ko nakwan na leŋe, a se murek liŋ ködyö tatuani tatua, lu ŋuto lo doto ko nu ŋuto lu, se ko nu ŋuto; a ta ködyö lalaaddi kulya narok kaŋo i Yisaraele.

²³ A ko nene ’diet a yema a lele ŋuto rume ko lepeŋ i köji, a dotoni ko lepeŋ;

²⁴ a ta ködyö joŋdi se murek liŋ kaŋo tojo i kötumit na köji, a ta gugubuje se ko ŋurupö tojo a twan. Nu ’diet tatatua kogwon nye a ko lulujö ma ’di nye gwon i köji lukata, ko lu ŋuto tatatua kogwon nye a to ’diddya nakwan na marate lonyit; a ta ködyö lalaaddi kulya narok kaŋo kasu kiden.

²⁵ Ama ko lele ŋuto a rum mu ’diŋ kata ko ŋuro nagoŋ a yema, a lu ŋuto ryaggi lepeŋ a dotoni ko lepeŋ, nyena a lu ŋuto tuŋ logon a doto ko lepeŋ lu ködyö tatuani tatua.

²⁶ Ama a do ködyö tine konakin nu ŋuro nene ŋo; kogwon toron nagoŋ riŋa ko twan gwe ’bayin ko nu ŋuro, kogwon kine kulya gwon gwoso na pikiŋdye ŋuto i tatuja na marate lonyit na;

²⁷ kogwon nye a rumbi lepeŋ mu ’diŋ; a nu ŋuro na yema iŋge lulujö, a ŋuto gwe ’bayin lo lwöggu lepeŋ.

²⁸ A ko lele ŋuto a rum ko nene ’diet nagoŋ a ko yema, a ryaggi lepeŋ a dotoni ko lepeŋ, a se ryeni rye;

²⁹ nyena a lu ŋuto logon a doto ko lepeŋ lu ködyö tikiŋdye monye ŋuro pödöjin merya mukanat, a nye ködyö gwe a nakwan nanyit, kogwon nye aje to ’did-dya lepeŋ; a nye ködyö tine yan lepeŋ i perok gwiliŋisi kanyit liŋ.

³⁰ ŋuto ködyö ti bulö joŋga nakwan na monye, a nye köti tine bulö laŋgu dotoesi ti monye.