Nyökit 20 - Bibilia Buk na Ŋun nagon koti luŋu a

Saresi i kulya ti ŋor

¹ A na tiri ta kadi ŋito i mörö ko merok kasu nu, a na meddi ta kusanjin se ko arabiajin lo jijiko, ko ŋutu logon lwölwöŋ ta kulu a ta tine kujoŋo lepeŋat; kogwon MATAT Ŋun losu lo toyuuŋdyö ta kaŋo i jur lo Ejipeto lo gwon ko ta.

² A mo gwe sona adi, na mijöddi ta nyona i mörö nu, a koane ködyö miju nyona i jambu ko kilu ŋutu,

³ a kulyani adi, Ta ŋutu ti Yisaraele. yiŋge ta, ta aje mijun nyona i lo lor i moro ko merok kasu; ti toilyet kasu gwe ti rusukö; an ta ko kujönö ta, kode böŋdu, ko köti an ta ko rigwökö ta ko se;

⁴ kogwon MATAT Ŋun losu a nye logon wöröji ko ta, i mörö ko merok kasu, i Lwöggu na ta.

⁵ A yumiat ködyö pije kulu ŋutu adi, Lon ŋuto logon a ’duggö kadi nanyit, a nu kadi gwe a ko nyuŋ ’boroki? Ti nye yitöni bot kanyit mede, an nye ko twa i ŋor, an nu kadi ko ’botoki lele ŋuto.

⁶ Ko lon ŋuto logon a ’yuddu kaden ti binyo kanyit i luköbi, a gwe a ko nyesu ludweki kanyit? Ti lepeŋ yitöni bot kanyit mede, an nye ko twa i ŋor, a lele ŋuto nyesi ludweki kanyit.

⁷ Ko lon ŋuto logon a yemba nakwan, a ŋinu ŋuto gwe a ko nyuŋ nyömöki lepeŋ? Ti nye yitöni bot kanyit mede, an nye ko twa i ŋor, a ŋinu ŋuto ko nyömökine lele ŋuto.

⁸ A kulu yumiat ködyö pije kulu ŋutu adi, Lon ŋuto logon a kujönit, ko gwon ko rusukö na töili? Ti nye yitöni bot kanyit mede, an töilyet ti luŋasirik kanyit ko po a lomunyak gwoso lonyit.

⁹ A mo gwe sona na tutuŋge kilu yumiat i jambu ko kilu ŋutu nu, a temejik ti kamörök ködyö wulwene i nyömöddu na se.

¹⁰ A na mijoddi ta i nene köji nyona i mörö ko lepeŋ nu, a ta ködyö laikiŋdye lepeŋat ko se ’de ’dekan taliŋ.

¹¹ A mo gwe sona, ko ŋutu ti ŋinu köji mo rukökiŋdyö ta taliŋ a pakiŋdye ta kötumitön ti köji, a ta ködyö ri ’di-kiŋdye ŋutu liŋ logon a rye nyu kulu i kitakiŋdya na ta.

¹² Ama ko ŋutu ti nu köji ti ’bön taliŋ nasu, kölumbö a poki i mörö ko ta, a ta ködyö tumbi ŋinu köji;

¹³ a na pakiŋdye MATAT Ŋun losu ŋinu köji kasu i könisi nu, a ta ködyö toggi ŋutu lyan liŋ kak ko baŋdujin,

¹⁴ a ta ködyö ryakuŋdye ŋutu nawate, ko lupudiet, ko toro ’bo, ko ŋo liŋ na gwon i nu köji, ama a momokat ti nu köji liŋ gwe a kasu. Ta bubulö nyesu ŋo nagoŋ ta a momokun ko merok kasu nagoŋ MATAT Ŋun losu aje tikin ta kune.

¹⁵ a ta ködyö konakiŋdye köjinö liŋ nagoŋ gwon pajo parik kasu sona, ama ’bayin a köjinö ti kulo jurön logon kasu i mara.

¹⁶ Ama a ta ködyö tine kölökiŋdyö nene ŋo na gwon jörun na gwon i köjinö ti kulu gweyajin ti ŋutu logon MATAT Ŋun losu aje tin ta a lomore kilo;

¹⁷ ama a ta ködyö tukaŋi se liŋ adisit, kweja adi ŋutu ti Kiti, ko ti Amori, ko ti Kanana, ko ti Periji, ko ti Kiwi, ko ti Yebusi, gwoso nagoŋ MATAT Ŋun losu aje saŋi ta na;

¹⁸ adi an se ko todi-nikin ta i koŋdya gwoso i ŋo kase liŋ na mamana nagoŋ se aje konakin Ŋunyen kase kune, a ta toroŋdi MATAT Ŋun losu.

¹⁹ A ko ta a tumba nene köji ko diŋit a najo, i mörö ko lepeŋ anyen morga lepeŋ, ta ködyö ti köŋu kaden kanyit ko tuluö kasu; kogwon ta ködyö bubulö nyesu ludweki kase, ama a ta tine toggu se kak. Kaden ti mu ’diŋ a ŋutu le anyen ta ködyö tumba se?

²⁰ Tuŋ ta bubulö köŋu i toggu na kaden kak logon ta a den adi ’bayin a lo nyenyei kulo; a ta ködyö teteŋdi takajin tumesi ti köji nagoŋ gwon i mörö ko ta nu, tojo ko tela nanyit.