Nyökit 18 - Bibilia Buk na Ŋun nagon koti luŋu a

Koresi nagoŋ ködyö tiki koanejin ko Lewijin

¹ A koanejin Lewijin, kweja adi kötumit liŋ na Lewi ködyö gwe ’bak kak na koraki se kode lomore i jur lo Yisaraele; a se mo nyesi ŋo na ’yuraki MATAT, se ko ŋo nagoŋ ködyö a lomoriot kanyit kune.

² Kweja adi se ’bak kak lomore i kiden na luŋasirik kase; a MATAT lepeŋ mo lo gwe a lomore lose gwoso na milyekiŋdye nye lepeŋat nu.

³ A ŋina ködyö gwe a ŋonyet na koanejin nagoŋ ŋutu logon wukiŋdya rubaŋga ködyö korakin lepeŋat na. Ko rubaŋga a dwöt kode a köbilityo, a se ködyö tikiŋdye koane kewat, ko lukalaya se ko buyö.

⁴ A ta ködyö tiŋdi lepeŋat waŋesi ti ’bolot kasu, ko ti binyo kasu, ko ti welet nasu, ko kupir ti köbilityo na ŋera a kokwe na köbilu kunök.

⁵ Kogwon MATAT Ŋun losu aje wuluŋdyö lepeŋat kaŋo i kiden na kötumitön kasu liŋ anyen lepeŋat se ko nyakwariat kase bubulö kita i karin ti MATAT ŋupi.

⁶ A ko lele Lewityo lo si ’da i lele lo turön kasu ti Yisaraele liŋ ko poŋdi i nu pirit nagoŋ MATAT mo wuwulun nu, ko lepeŋ a po ko ’deket nanyit na töili

⁷ a nye buloni bulö kita i karin ti MATAT Ŋun lonyit, gwoso na koŋdi kulye luŋasirik kanyit liŋ logon a Lewijin, logon gwon nyu i kitakiŋdya na MATAT kulo,

⁸ A se ködyö wuji ŋonyesi na nyenyei i pirit na geleŋ ko luŋasirik kanyit mora ko gwöriesi ti lomore na monye.

Kukuesi an ŋutu mirakiŋdya pagaŋojin

⁹ A ko ta mo a ’dur i lu jur logon MATAT Ŋun losu titin ta lu, a ta ködyö tine jujumbu i mirakiŋdya na ŋo na mamana ti kulu jurön.

¹⁰ A lele ŋuto ködyö tine rye kasu kiden logon ’yuŋa ŋuro lonyit kode ŋuro nanyit a rubaŋga, kode ŋuto logon koŋdya to ’bunun, kode kadolanit lo mian, kode ŋuto logon jwöjwöŋgu ŋutu ko winikö, kode kamönyönit,

¹¹ kode ka-yaŋananit, kode ŋuto logon do ’ya ko kwen ti mulöko, kode kawananit, kode kagubanit lo kamuka ti ŋutu lo twatwa.

¹² Kogwon ŋutu liŋ logon koŋdya kine kulya kulo MATAT maman; nyena kogwon kine ŋo na mamana a MATAT Ŋun losu gwe i riköddu na se kaŋo kasu i komor.

¹³ A ta ködyö gwe a loke ko MATAT Ŋun losu i komor.

¹⁴ Kogwon kilo juron logon ta mo momok kilo yiyiŋ ŋutu logon a kadolak ti mian, ko a ’bunuk; ama i kulya kasu, a MATAT Ŋun losu gwe a ko rukokin ta i koŋdya sona.

Ŋun a kulya adi nye titin lele nebi gwoso Mose

¹⁵ A MATAT Ŋun losu mo topuök-kiŋdye ta lele nebi gwoso nan i kiden na kotumit nasu — a ta mo yiŋge lepeŋ —

¹⁶ gwoso i ŋo liŋ na mulun ta ko MATAT Ŋun losu Orebe yu i lor lo momoret lu, na kulyari ta adi, Ti yi gwe ti yiŋga gworo lo MATAT Ŋun likaŋ köti, ko ti yi gwe ti met ŋina kimaŋ duma koti kwoŋ, an yi ko twatwa.

¹⁷ A MATAT kulyani ko nan adi, ŋo liŋ na jam se kune a gwak.

¹⁸ Nan mo topukökiŋdyo se lele nebi gwoso do i kiden na kötumit nase; a nan mo tiŋdi kulyaesi kwe kanyit i kutuk, a nye mo jamakiŋdye se ŋo liŋ nagoŋ nan a saŋi lepeŋ kune.

¹⁹ A mo gwe sona adi, ŋuto logon ti yiŋ kulyaesi kwe logon nye jajam i karin kwe lo, a nan ko mugun nio mo denuŋdye ko lepeŋ.

²⁰ Ama nebi logon bu ’ya mugun i jambu, kode logon a jambu i karin ti kulye Ŋunyen lo, a ŋilo nebi ködyö tatuani tatua.

²¹ A ko ta kulya kasu i töilyet adi, A yi dene kulyaet logon MATAT a ko jam lo ada?

²² Kweja adi ko ŋilu nebi a jambu i karin ti MATAT, a ko ŋilu kulyaet ’bayin sona, kode ti po sona, a ŋilo gwe a kulyaet logon MATAT a ko jam; ŋilu nebi a bu ’ya mugun i jambu na lepeŋ, a ta tine kujönö lepeŋ.