Nyökit 16 - Bibilia Buk na Ŋun nagon koti luŋu a

Roriot musala lo wulwe anyen kökona

¹ Nyena tiji ta yapa Abiba, ko konakiŋdye ta MATAT Ŋun losu rorwe lo Pasaka; kogwon i yapa Abiba MATAT Ŋun losu a toyuuŋdyö ta kaŋo i Ejipeto i tukwaje.

² a ta ködyö ’duŋökiŋdye MATAT Ŋun losu nene turu ’buti i teŋon ti yidin kode ti kisuk a rubaŋga lo Pasaka, i nu pirit nagoŋ MATAT mo wuwulun i tiŋdu na karin kanyit i si ’da nyu nu.

³ A ta ködyö tine nyesu ambata nagoŋ ’bak kape ko ŋilo rubaŋga i pirit na geleŋ. A ta nyesi ŋilo rubaŋga ko ambata nagoŋ ’bak kape perok buryo, nu a ambata delyaet, kogwon ta a rumun kaŋo i jur lo Ejipeto ko kujönö, anyen ta böŋö yiyiuŋdyö lor logon ta a yuuŋdye kaŋo i jur lo Ejipeto lu temba i perok gwiliŋisi kasu liŋ.

⁴ A kape ti ’bolot ködyö tine rye i lukata na lokökoritan ti jur losu i kilo perok buryo; a nene pitönö na lokore nagoŋ ta a ’duŋ i lor lo kokwe i sömukö nu ködyö tine möŋdu tukwaje liŋ tojo ko ko ’bure.

⁵ Ta ködyö ti ’duŋgo rubaŋga lo Pasaka i lele tur losu logon MATAT ŋun losu a tikin ta lo;

⁶ ama a ta ’duŋge rubaŋga lo Pasaka i nu pirit nagoŋ MATAT Ŋun losu wuwulun i tiŋdu na karin kanyit i si ’da nu, i sömukö i ’doro na kolor, i nu diŋit na yuuŋdye ta kaŋo i Ejipeto nu.

⁷ a ta ködyö deŋi ŋilo rubaŋga a nyesi lepeŋ i nu pirit nagoŋ MATAT Ŋun losu mo wuwulun nu; a i ko ’bule a ta yitöni bot kasu i kemialan.

⁸ A ta ködyö nyesi ambata nagoŋ ’bak kape perok buker; a lor toburyo lonyit ködyö gwe a, lor pepenet loke lo MATAT Ŋun losu; a ta tine koŋdya nene kita kwöŋ.

⁹ A ta ködyö keŋdi jimalan buryo, suluja i diŋit petet na ’bolot.

¹⁰ A ta ködyö ’depakiŋdye MATAT Ŋun losu rorwe lo jimalan buryo i joŋdya na ’dokesi ti tupalikan na töili kasu i könisi, gwoso nagoŋ MATAT Ŋun losu a ’boroji ta nu.

¹¹ A ta lyöŋi lyöŋön ko MATAT Ŋun losu i komor ko ŋwajik kasu lulyan ko nawate, ko kölipönök kasu lulyan ko nawate, ko Lewijin lo gwon kasu i turön, ko ŋutu lo si ’da a lepelok, ko kikijikö, ko karu ’bejin nagoŋ gwon kasu kiden kune. Ta lyölyöŋön i nu pirit nagoŋ MATAT Ŋun losu mo wuwulun i tiŋdu na karin kanyit i si ’da nyu nu.

¹² A ta ködyö yiyiuŋdye adi ta köju gwon a ’dupi Ejipeto yu; a ta tiji i ’debba na kilo saresi lo wurö.

¹³ A ta ködyö ’debbi rorwe lo muru-gujin ko perok buryo, i mukök na kwökwötuŋdye ta i piritön gwutesi kasu ti ’bolot ko i piritön ryokesi ti ludweki ti binyo;

¹⁴ a ta ködyö lyoŋi lyöŋön i rorwe losu ko ŋwajik kasu lulyan ko nawate, ko kölipönök kasu lulyan ko nawate, ko Lewijin, ko ŋutu lo si ’da a lepelok, ko kikijikö, ko karu ’bejin nagoŋ gwon kasu i turön kune.

¹⁵ A ta ködyö ’debbi rorwe ko perok buryo ko MATAT Ŋun losu i nu pirit nagoŋ MATAT mo wuwulun nu; kogwon MATAT Ŋun losu mo ’boroja ta i kinyojin kasu liti ko i konesi kasu liŋ, a ta mo tuŋ gwe ko lyöŋön.

¹⁶ Ti ŋutu lyan kasu liŋ kwekiŋdye ’börik ko MATAT Ŋun losu i komor daŋin musala temba i kiŋa i nu pirit nagoŋ nye mo wuwulun nu; kweja adi i rorwe lo ambata nagoŋ ’bak kape, i rorwe lo jimalan, ko i rorwe lo murugujin. A se ködyö tine po ko MATAT i komor ko könisi kana;

¹⁷ ŋutu liŋ ködyö tiŋdu ’dokesi kase gwoso nagoŋ se bubulö, gwoso nagoŋ MATAT Ŋun losu a ’boroji ta nu.

Saresi i kulya ti ’duŋgö na putesi rigwo

¹⁸ A ta ködyö tiŋdi ka ’duŋök ko katiyuk i turön kasu liŋ logon MATAT Ŋun losu titin ta kulo, gwoso i kötumi-tön kasu, a se mo ’duŋge putesi ti ŋutu rigwogwo.

¹⁹ Ta ködyö ti tukwölöŋgu i ’duŋgo na putet; a ta tine gwon a kanyunyumok ti ŋutu; a ta ködyö tine wuju ’dokesi na ropaki a lwon; kogwon kine ŋo tomo ’dokeju konyen ti ŋutu logon a lokoŋ, a togiŋe putet lo ŋuto lo rigwo.

²⁰ Kebbi ta kiko lo putet lo rigwo ka ’de tuŋ, anyen ta böŋo gwon jorun a si ’dani i jur logon MATAT Ŋun losu titin ta lu.

²¹ Ko ’bokakiŋdya ta lele gweyari lo kaden ti mian logon a Asera i diŋö ko pirit ’yuret na rubaŋgajin ti MATAT Ŋun losu nagoŋ ta mo teten na.

²² köti an ta ko togwi ’dikiŋdya ’borik ŋurupö lo kwakwasa, kogwon MATAT Ŋun losu maman se.