Nyökit 15 - Bibilia Buk na Ŋun nagon koti luŋu a

Kiŋa logon ŋutu ködyö topitökin ko ’börik i kulya ti möriöt

¹ Temba i diŋit na kiŋajin buryo a ta ködyö gwe ko diŋit na topitökin ko ’börik i möriöt kasu.

² A kine gwe a kulya ti topitökin: kweja adi ŋutu liŋ lo kurörikin kulo ködyö kölökiŋdyö ŋo kase na kuröji kune i marateki kase; a se ködyö tine luŋgu se i marateki kase, ko i luŋasirik kase lo kuröddu kulu, kogwon diŋit na MATAT na topitökin ko ’börik aje tukö.

³ A ta bulöni bulö luŋgu ŋo kasu ko lwaka, ama a ta ködyö kölökiŋdye möriöt na gwon ko luŋösurök kune.

⁴ MATAT mo ’boroja ta yu i lu jur logon MATAT Ŋun losu mo titin ta a lomore i ’debba lu, nyena a ŋutu lomerika mo gwe ’bayin kasu kiden,

⁵ ko ta ködyö ’diri yiyiŋ gworo lo MATAT Ŋun losu, i tiju i koŋdya na kilo saresi liŋ logon nan a sarakin ta i lo lor kulo.

⁶ Kogwon MATAT Ŋun losu mo ’boroja ta gwoso nagoŋ nye aje milyekiŋdye ta nu, a juron jore mo kupe kupö kasu, ama a ta tine kuŋö kase; a ta mo gwe a kasarak ti jurön jore, ama a se mo tine saŋu ta.

⁷ A ko ŋuto lomeri gwon kata kasu kiden, i lele tur logon MATAT Ŋun losu a tin ta lo, a ko ŋilo ŋuto lomeri a lele lo luŋösurök a do ködyö tine topo ’yu töili kode könisi kulök ko ŋilo luŋösur lomeri lo,

⁸ a do ködyö pakiŋdye könin ilot ko lepeŋ, a do rukökiŋdye lepeŋ i kuŋö na ŋo nagoŋ jojo ’deket nanyit.

⁹ Meddi ’bura, an do gwon ko yeyeet naron konut i töili adi, Lo kiŋa toburyo logon a kiŋa lo topitökin ko ’börik gwe nyona, a koŋe ilot gwe a loron ko luŋösur logon a lomeri lo, a do tine tiŋdu lepeŋ nene ŋo, a nye gwiki ko MATAT i kulya kunök, a ŋina de gwe a toron konut.

¹⁰ Do ködyö tikiŋdya lepeŋ ’diri, a töili ilot ködyö tine delya na tikiŋdye do lepeŋ nu; a MATAT Ŋun ilot mo ’boroji do i kitajin kunök liŋ ko i ŋo liŋ nagoŋ do kökon ko könisi kulök kune kogwon ŋina ŋo na kon do na.

¹¹ Kogwon tolomerian mo ti ’baka kasu i jur; nyenagoŋ nan a saŋu do adi, ’Diri do ködyö pakiŋdya könin ilot i luŋösur, ko i ŋutu kulök lo yöŋö ŋo, ko i lomerika kasu i jur.

Tokitaju na ’dupi

¹² A ko luŋösur logon a ŋuto lo Ebere kode a ŋuto na Ebere a tugwö-rökin mugun konut, a nye ködyö kitakiŋdye do ko kiŋajin buker, a i kiŋa toburyo lonyit a do ködyö kölöddi lepeŋ i tu kaŋo konut.

¹³ A na kölöddi do lepeŋ i tu kaŋo konut nu, a do ködyö tine kölörö lepeŋ i tu kana;

¹⁴ a do sobbi lepeŋ abur ko tukwörien na ’dumwe konut i yidin, ko konut i pirit gwutet na ’bolot, ko konut i pirit ryoket na ludweki ti binyo; do ködyö tiŋdu lepeŋ gwoso nagoŋ MATAT Ŋun ilot aje ’boroja do na.

¹⁵ A ti do yiyiuŋdye adi do köju gwon a ’dupiet i jur lo Ejipeto, a MATAT Ŋun ilot aje dakuŋdya do kaŋo; nyenagoŋ a nan aje sarakiŋdya do kine kulya i lo lor.

¹⁶ Ama ko nye a kulya ko do adi, Nan ti ’bön tu kaŋo konut, kogwon nye nyanyar do ko mede iŋot liŋ, ki ’doŋ nye aje si ’da ko do ’bura,

¹⁷ a do ködyö ’dumuŋdye witi tulet, a morgi swöt lonyit a ’biki-kiŋdye i kötumit, i kwekiŋdya adi nye mo gwon a ’dupiet ilot ŋupi ŋupi. A do ködyö konakiŋdye ’dupiet iŋot sona köti.

¹⁸ A ŋina mo tine gwon a na ŋo konut ko do a kölörö lepeŋ i tu kaŋo konut; kogwon nye aje kitakiŋdya do kiŋajin buker, kweja adi temet na kita na ŋutu murek lo kita ko gurut. Nyena a MATAT Ŋun ilot mo ’boroji do i ŋo liŋ na kon do kine.

Gelwe na kayujin ti toro ’bo

¹⁹ A do ködyö gelakiŋdye MATAT Ŋun ilot kayujin mönikön liŋ lo yuŋwe i teŋon kunök ti kisuk ko ti yidin; do ti tokitaju kayu lo nene na kisuk kunök, kode ŋepa kupir ti kayu lo nene na köbilu kunök.

²⁰ A do se ko mede iŋot liŋ ködyö nyesi se ko MATAT Ŋun ilot i komor, temba i kiŋajin liŋ, i nu pirit nagoŋ MATAT de wuwulun nu.

²¹ Ama ko turu ’buti nagoŋ a kayu gwon ko nene yuyuket, ko nye a ŋöde kode a mo ’doke, kode gwon ko nene yuyuket nagoŋ a naron, a do ködyö tine ’duŋö-kiŋdyö MATAT Ŋun ilot lepeŋ.

²² Ama a do nyesi nye konut i turön; ŋutu liŋ logon a lut kode logon a loke i kulya ti keri bubulö nyesu nye gwoso na nyesi se nyama kode ka ’bu abur na.

²³ Tuŋ a do tine nyesu rima kanyit kwöŋ; a do ködyö ’buköki se kak gwoso pioŋ.