Nyökit 14 - Bibilia Buk na Ŋun nagon koti luŋu a

ŋutu a teŋo i koŋdya na kulye keriat ti twan

¹ Ta logon a ŋwajik ti MATAT Ŋun losu; ta ködyö ti ’du ’duŋujö ’börik, kode ’bariŋdu kupir kasu ti mer na kwe i kulya ti lo twatwa.

² Kogwon ta logon a gweya na ŋutu logon a loke lo rurwan ko MATAT Ŋun losu, a MATAT aje wuluŋdyö ta i gwon a ŋutu kanyit lomoriot i kiden na gweyajin ti ŋutu liŋ logon gwon i na kak kulo.

Kijakwa logon a loke ko logon a lut i kulya ti keri

³ Ta ködyö ti nyesu nene ŋo na mamana.

⁴ Kulo a kijakwa logon ta bubulö nyesu: kweja adi dwöt, ko köbilityo, ko meetyo,

⁵ ko ka ’bu, ko nyama, ko aburi, ko muri, ko kumbiri, ko ’bure, ko kobiluti mu ’diŋ na rye i merya.

⁶ A koakwa liŋ logon ko sulukwakan lo kwaraju a gwe ko mokosi lo koŋa, lo ’yelekuŋdya döru i ŋiŋa, ta a ’buruki i nyesu na se i kiden na kijakwa.

⁷ Ama a ta ködyö tine nyesu kilo kijakwa ti se logon ’ye ’yelekuŋdya döru i ŋiŋa kode gwon ko sulukwakan lo kwaraju kulo: kweja adi kamilo, ko likito, ko kileŋ, kogwon se ’ye ’yelekuŋdya döru i ŋiŋa nagoŋ a tine kwaraju i sulukwakan, se a lut kasu i kulya ti keri.

⁸ A ta ködyö tine nyesu wuri, kogwon nye a kwaraju i sulukwakan nagoŋ ti ’yelekuŋdya döru i ŋiŋa, nye gwon a lut kasu i kulya ti keri. An ta ko nyesu se a lokore, a ta ködyö tine ’bo ’yu se nagoŋ a twatwa kune.

⁹ Kulo a ŋo logon ta a ’buruki i nyesu i ŋo liŋ lo gwon i pioŋ kata: ta a ’buruki i nyesu na ŋo liŋ lo gwon ko wasesi ko kuperu.

¹⁰ Ama ŋo liŋ logon ’bak wasesi kode kuperu ta ködyö ti nyesu se; kilo a lut kasu i kulya ti keri.

¹¹ Ta a ’buruki i nyesu na kwen loke liŋ.

¹² Ama kulo a se logon ta ti nyö: kweja adi, yuku, ko lugulusöni lobeke, ko kwilok,

¹³ ko kuri, ko lo ’bilikisuk gwoso i gweyari lose,

¹⁴ ko korukan liŋ gwoso i gweyari lose,

¹⁵ ko tutwö, ko ’daŋgape, ko gwilok, ko wowe gwoso igweyarilose;

¹⁶ kogwisi, ko lumö ’duk, ko wuŋguwuŋgu;

¹⁷ ko urbaŋa, ko lugulusöni, ko tumunit na kare,

¹⁸ ko luwawaŋ, ko loggoro gwoso i gweyari lose, ko lokirik, se ko lukululi.

¹⁹ A ŋo liŋ lo ’da ’daju lo gwögwöŋtu kak gwe a lut kasu i kulya ti keri, a se ködyö tine nyei.

²⁰ Ta a ’buruki i nyesu na ŋo liŋ lo ’da ’daju logon a loke.

²¹ Ta ködyö ti nyesu nene ŋo nagoŋ a twan ka ’de; ta bubulö tiŋdu lepeŋ i ŋutu lo si ’da a lepelok kasu i turön, anyen lepeŋat lo nyesu, kode ta bubulö tugwörökiŋdyö i lwaka; kogwon ta a gweya na ŋutu loke lo rurwan ko MATAT Ŋun losu. Ta ködyö ti deŋa kilolor ko le ti ŋote.

Saret i kulya ti swöt topuökit

²² Ta ködyö topuöggu ŋo liŋ nagoŋ a pukun i nyomot kasu, logon a ’durun-dyö i meleseŋo temba i kiŋa.

²³ A ta ködyö nyesi topuökisi ti ’bolot kasu, ko ti binyo kasu, ko ti weletan kasu, ko ti kayujin ti teŋon kasu ti kisuk ko ti yidin, a ta ködyö nyesi se ko MATAT Ŋun losu i komor, i nu pirit nagoŋ nye mo wuwulun nu, i tiŋdu na karin kanyit i gwolor nyu; anyen ta böŋö jujumbu kugga na MATAT Ŋun losu perok liŋ.

²⁴ A i diŋit nagoŋ MATAT a ’boroja ta ko tukwörien nu, ama ko ködyö nu pirit nagoŋ MATAT Ŋun losu a wulun i tiŋdu na karin kanyit nyu, ko ködyö lepeŋ gwon pajo kasu kogwon kiko a lojo,

²⁵ a ta ködyö gwöröri gurut, a torakiŋdye kine gurut kasu i könisi, a joŋgi i nu pirit nagoŋ MATAT Ŋun losu mo wuwulun nu.

²⁶ A ta ködyö tiŋdi kine gurut i ŋo na ’deggi ta kune, kweja adi i dwönin, kode i köbilu, kode i binyo, kode i yawa na pötwör, i ŋo liŋ na ’deggi kamulak kasu; a ta nyesi nyu, a ta ko midijik kasu lyöŋi lyöŋön ko MATAT Ŋun losu i komor.

²⁷ A ta ködyö tine pa Lewijin logon si ’da kasu i turön kulo, kogwon se ’bak koret kode kak lomore kasu kiden.

²⁸ A ko kiŋajin musala aje jo a ta ködyö joŋdi kaŋo topuökisi kasu liŋ ti kinyojin kasu ti ŋilu kiŋa, a ta ’delakin-dye se kasu i turön;

²⁹ a Lewijin logon ’bak koret kode kak lomore kasu kiden, ko ŋutu lo si ’da kasu a lepelok, ko kikijikö, se ko karu ’bejin na gwon kasu i turön kune, ködyö poŋdi a nyesi a yimönö; anyen MATAT Ŋun losu böŋö ’boroja ta i kitajin liŋ na kon ta kine.