Nyökit 13 - Bibilia Buk na Ŋun nagon koti luŋu a

¹ Nyena ko ködyö nebi a pukun kasu kiden, kode karudwenit lo rudweesi, a tiŋdi ta kweyet kode sörit,

² a ko nu kweyet kode nu sörit a pukun nagoŋ nye a takin ta kulya kase adi, Ti yi kepoddi ta kulye Ŋunyen, logon ta a ko den, ko ti yi kitakiŋdye ta se;

³ a ta ködyö tine yiŋga kulyaesi ti ŋilo nebi kode ti ŋilo karudwenit lo rudweesi; kogwon MATAT Ŋun losu gwon i möŋu na ta, i deŋdya kode ta ’diri nyanyar MATAT Ŋun losu ko töilyet kasu liŋ ko ködu dwölön kasu liŋ.

⁴ A ta ködyö kebbi MATAT Ŋun losu, i kugga na lepeŋ, ko i ’debba na saresi kanyit, ko i yiŋga na gworo lonyit, a ta kitakiŋdye lepeŋ i ’depakiŋdya ŋo ko lepeŋ.

⁵ A ŋilo nebi, kode ŋilo karudwenit lo rudweesi ködyö tatuani tatua; kogwon nye a jambu togiresi i kulya ti MATAT Ŋun losu logon a joŋdya ta kaŋo i jur lo Ejipeto, ko a dakuŋdya ta kaŋo i pirit na to ’dupien lo, i lulukaddu na ta kaŋo i kiko logon MATAT Ŋun losu a saŋi ta i wöröri lo. A ta ködyö joŋe kulya narok kaŋo kasu kiden.

⁶ A ko luŋaser ilot, kode ŋuro lo ŋuti, kode ŋuro ilot, kode ŋuro iŋot, kode nakwan iŋot nanyanyara, kode ju ilot logon gwon gwoso mugun iŋot lo, a lulukaddu do a lwon adi, Ti yi iti i kitakiŋdya na kulye Ŋunyen, logon do a ko den köti ma ’di merenyejin kulök a ko den;

⁷ kilo Ŋunyen a ti gweyajin ti ŋutu logon lorga ta, logon gwon nyona ko ta kode pajo kasu, suluja i na ’dutet na kak tojo ko nu.

⁸ Ko ŋuto ga ’yu lulukaddu do sona a do ködyö tine ruk lepeŋ, kode yiŋga lepeŋ, a konyen kulök tine won lepeŋ, a do tine kölörö lepeŋ, a do tine ’de ’ya lepeŋ köti;

⁹ ama kölumbö a do tatuje lepeŋ, kweja adi do ködyö gwon a togeleŋ i ’bi ’yu na könin ilot i tatuja na lepeŋ, a kirut a kulye ŋutu liŋ lo morakiŋdye.

¹⁰ A ta ködyö gugubuji lepeŋ ko ŋurupö tojo i twan; kogwon nye ga ’yu lulukaddu ta kaŋo ko MATAT Ŋun losu lo joŋdya ta kaŋo i jur lo Ejipeto i pirit na to ’dupien lo.

¹¹ A ŋutu liŋ ti Yisaraele mo yiŋge yiŋga, a kujönöni kujönö, a mo tine koŋdya nene toron köti kwöŋ kasu kiden gwoso na.

¹² A ko ta a yiŋga i nene na köjinö kasu nagoŋ MATAT Ŋun losu a tin ta i si ’da kata kunu,

¹³ adi kulye ŋutu logon a logon aje tu kaŋo kasu kiden, ko a lulukaddu ŋutu ti nu köji nase adi, Ti yi iti ta i kitakiŋdya na kulye Ŋunyen logon ta a ko den,

¹⁴ nyena a ta ködyö pije pipija, a galuŋdye kaŋo, a pije ko tirikwet; nyena ko kine kulya ’diri a gwak, adi na ŋo na mamana aje kona kasu kiden;

¹⁵ a ta ’diri ködyö toggi ŋutu ti nu köji ko baŋdujin, i tukaŋu na lepeŋat asut, ko ŋo liŋ na gwon lukata se ko toro ’bo kase.

¹⁶ A ta ködyö kwokwötuŋdye mokat ti nu köji liŋ i kiden na terere nanyit, a ta ’yuŋe nu köji ko mokat kanyit liŋ, gwoso rubaŋga lo ’yuraki MATAT Ŋun losu ’buluŋ; a nu köji mo yeŋoro a ruba ŋupi, a mo tine ’dukö köti.

¹⁷ A ta ködyö tine ’bo nene na kine ŋo na rurwan; anyen MATAT böŋö kö ’yu woran nanyit na pape, a pitökiŋdye ta, a won konyen ko ta, ko a tupöŋe ta gwoso na milyekiŋdye nye merenyejin kasu nu,

¹⁸ ko ta ködyö yiyio gworo lo MATAT Ŋun losu, i ’debba na saresi kanyit liŋ logon nan saŋi ta i lo lor kulo, i koŋdya na ŋo na rigwo ko MATAT Ŋun losu i metet.