Nyökit 12 - Bibilia Buk na Ŋun nagon koti luŋu a

Pirit geleŋ tuŋ a wulwe a kwakwaset

¹ A kilo gwe a saresi lo wurö, ko a kulya na ’duŋö nagoŋ ta ködyö tiju i koŋdya i lu jur logon MATAT Ŋun lo merenyejin kasu aje tiŋdu ta i morga lu, i perok lo gwoŋdi ta i na kak kulo.

² A ta ködyö köŋi piritön liŋ adi sit nagoŋ jurön logon ta a mok kulo a kitakiŋdye Ŋunyen kase nyu, i merya lojo ki, ko i lurwat ki, ko i mukökö ti kaden liŋ lo rurwan.

³ A ta ködyö dukakiŋdye piritön ’yuresi ti rubaŋgajin liŋ kak, a gwagwalaggi ŋurupö kase ka ’de ka ’de logon a togwi ’diki ki i kwakwasa kulo, a ’yuŋe kaden kase ti mian logon a Asera; a ta ködyö ’be ’beleŋgi kak nyömuejin lo gigiru ti Ŋunyen kase, a tolikiöddi karin kase kaŋo i nu pirit.

⁴ Ta ködyö ti konakiŋdya MATAT Ŋun losu sona.

⁵ Ama ta ködyö ga ’yu nu pirit nagoŋ MATAT Ŋun losu a wulökin ta i kötumitön kasu liŋ i tiŋdu na karin kanyit nyu nagoŋ a pirit gwiliŋit nanyit nu, a ta iti nyu;

⁶ a ta ködyö joŋgi rubaŋgajin kasu lo ’yu ’yura ’buluŋ nyu, se ko rubaŋgajin kasu, ko topuökisi kasu, ko ’dokesi nagoŋ ta a wukin, ko ’dokesi kasu ti milye nagoŋ ta a milyeji kune ko ti tupalikan na töilyet, ko kayujin ti teŋon kasu ti kisuk ko ti yidin;

⁷ a ta ködyö nyesi nyu ko MATAT Ŋun losu i komor, a ta se ko midijik kasu ködyö lyöŋi lyöŋön i ŋo liŋ nagoŋ ta kökon nagoŋ MATAT Ŋun losu a ’borokin ta kine.

⁸ A ta ködyö tine koŋdya gwoso ŋo liŋ na kon yi ni i lo lor kune, kweja adi ŋutu liŋ geleŋ geleŋ ŋadi koŋdya ŋo nagoŋ nye a met adi a na ’but kanyit;

⁹ kogwon ta a ko nyuŋ ’dur i nu pirit yukaet ko i jur lomore logon MATAT Ŋun losu a tin ta lu.

¹⁰ Ama ko ta a laŋaddu i nu pele na Yardene, a si ’dani i lu jur logon MATAT Ŋun losu a tikin ta i morga a losu lu, a nye tiŋdi ta yukan i merok kasu lo lorga ta kulo, anyen ta si ’da ko taliŋ,

¹¹ a mo gwe sona adi, ta ködyö joŋga ŋo liŋ nagoŋ nan a saŋi ta tojo ko nu pirit nagoŋ MATAT Ŋun losu mo wuwulun i tiŋdu na karin kanyit i gwolor yu nu; kweja adi ta ködyö joŋga rubaŋgajin kasu lo ’yu ’yura ’buluŋ, ko rubaŋgajin kasu, ko topuökisi kasu, ko ’dokesi kasu nagoŋ ta a wukin, ko ’dokesi kasu liŋ ti milye nagoŋ ta a milyekin tiŋdu MATAT kune.

¹² A ta ködyö lyöŋi lyöŋön ko MATAT Ŋun losu i komor, ta se ko ŋwajik kasu lulyan ko nawate, ko kölipönök kasu lulyan ko nawate, ko Lewijin logon si ’da kasu i turön kulo, kogwon se ’bak koret kode lomore kasu kiden.

¹³ Kunyar, an ta ko wukiŋdya rubaŋgajin kasu lo ’yu ’yura ’buluŋ i piritön liŋ na met ta kunu;

¹⁴ ama ta ködyö wukiŋdya rubaŋgajin kasu lo ’yu ’yura ’buluŋ i nu pirit nagoŋ MATAT mo wuwulun i nene na kötumitön kasu, a ta ködyö koŋdi nyu gwoso i ŋo liŋ nagoŋ nan a saŋi ta kine.

¹⁵ Nyenagoŋ ta bubulö ’duŋgö ko nyesu lokore i turön kasu liŋ gwoso na ’deggi ta na, gwoso i ’boriet na MATAT Ŋun losu nagoŋ nye aje tikin ta ŋutu logon a lut ko a loke i kulya ti keri kulo bubulö nyesu kata gwoso na nyesi se lokore na nyama ko na ka ’bu abur.

¹⁶ Ake rima kase ta ti nyesu, ama a ta ködyö ’bukörö se kak gwoso pioŋ.

¹⁷ A ta ködyö tine nyesu topuökisi ti ’bolot kasu i turön kasu, kode ti binyo kasu, kode ti weletan kasu, kode kayujin ti teŋon kasu ti kisuk ko ti yidin, kode ’dokesi kasu liŋ ti milye nagoŋ ta a milyeji kune, kode ’dokesi kasu ti tupalikan na töilyet, kode ’dokesi na wukin ta kune;

¹⁸ ama a ta ködyö nyesi se ko MATAT Ŋun losu i komor i nu pirit nagoŋ MATAT Ŋun losu a wulun nu, ta se ko ŋwajik kasu lulyan ko nawate, ko kölipönök kasu lulyan ko nawate, ko Lewijin logon si ’da kasu i turön kulo; a ta ködyö lyöŋi lyöŋön ko MATAT Ŋun losu i komor ko ŋo liŋ nagoŋ ta kökon kune.

¹⁹ Kunyar ta, an ta ko pa Lewijin i perok liŋ lo gwoŋdi ta i lu jur losu kulo.

²⁰ A ko MATAT Ŋun losu mo tuga-laŋgu jur losu gwoso na milyekiŋdye nye ta nu, a ta kulyani adi, Nan ’dek nyesu lokore, kogwon ta a moka ko rinyuŋ na lokore, a ta ködyö nyesi lokore gwoso na ’deggi ta na,

²¹ ama ko nu pirit nagoŋ MATAT Ŋun losu a wulun i tiŋdu na karin kanyit nyu nu gwon pajo kasu, a ta bulöni bulö ’duŋgö lele lo teŋon ti kisuk kode ti yidin logon MATAT aje tikin ta lu, gwoso nagoŋ nan a saŋi ta na; a ta bulöni bulö nyesu kasu i turön gwoso na ’deggi töilyet kasu na.

²² ja bubulö nyesu se gwoso na nyesi ŋutu nyama kode ka ’bu abur na; iŋkoi ŋutu liŋ logon a lut kode a loke i kulya ti keri kulo bubulö nyesu se.

²³ Ama kunyar ta an ta ko nyesu rima; kogwon rima a ru, a ta ködyö tine nyesu lokore ko ru i pirit na geleŋ.

²⁴ Ta ködyö ti nyesu se; a ta ’bukörö se kak gwoso pioŋ.

²⁵ Ta ködyö ti nyesu se; anyen kulya kasu ko ti ŋwajik kasu logon kasu i mukök kulo böŋö tu ’bura na koŋdi ta kulya na rigwo ko MATAT i metet nu.

²⁶ Nyena a ta ködyö ’dumuŋdye ’dokesi kasu nake na rurwan, ko ’dokesi kasu ti milye nagoŋ ta a milyeji kune, a ta iti tojo ko nu pirit nagoŋ MATAT mo wuwulun nu,

²⁷ a ta wukiŋdye rubaŋgajin kasu lo ’yu ’yura ’buluŋ, ko lokore se ko rima i pirit ’yuret na rubaŋgajin ti MATAT Ŋun losu; a rima ti rubaŋgajin kasu ködyö ’bukökine i loki na pirit ’yuret nagoŋ a na MATAT Ŋun losu, a ta nyesi lokore.

²⁸ Agu ŋi ta tiju i yiŋga na kilo kulyaesi liŋ logon nan a saŋi ta kilo, anyen na koŋdi ta kulya na ’but ko na rigwo ko MATAT Ŋun losu i metet nu, a kulya kasu ko ti nyakwariat kasu mo iti ’bura ŋupi.

Kukuesi an ŋutu twoju nyomuejin

²⁹ A ko MATAT Ŋun losu a tukaŋu kilo juron kasu i komor logon ta molu lubbo lukata i morga na se kulu, a ta ruddye se, a si ’dani kase i jur;

³⁰ nyena kunyar ta an ta ko lokaji i kebbu na kikolin kase, i mukök na toliki nase kasu i komor nu. An ta ko pipija kulya ti ŋunyen kase adi, Kulu juron kitakiŋdya Ŋunyen kase ada? Ti nan koŋdi sona koti.

³¹ A ta ködyö tine konakiŋdya MATAT Ŋun losu sona; kogwon se a konakiŋdya Ŋunyen kase ŋo narok parik liŋ nagoŋ MATAT maman; kogwon se a ’yurakiŋdya Ŋunyen kase lulyan ko nawate.

³² A ta ködyö tiji ŋo i koŋdya na ŋo liŋ nagoŋ nan a saŋi ta kunu; ta ti ’yalakiŋdya kode ’dumaddu kata.