Nyökit 11 - Bibilia Buk na Ŋun nagon koti luŋu a

MATAT a duma

¹ Nyenagoŋ ta ködyö nyanyar MATAT Ŋun losu, ko ’de ’deŋ jujuwesi kanyit, ko saresi kanyit lo wurö, ko kulya na ’duŋ lepeŋ kine, ko saresi kanyit perok liŋ.

² Nyenagoŋ dene ta den kine kulya ’bura i lo lor kogwon nan ’bayin jambu ko ŋwajik kasu logon a ko den ko a ko met tojumit na MATAT Ŋun losu, ko todumalan nanyit, ko könin lonyit iŋgo lo riöji.

³ Kogwon se a ko met kweyesi kanyit, ko konesi kanyit nagoŋ nye a kon i kiden na Ejipeto ko Paro mor lo Ejipeto, se ko jur lonyit liŋ.

⁴ Se a ko met ŋo nagoŋ nye a konakin kamorök ti Ejipeto, ko kusanjin kase, se ko ara-biajin kase lo jirikö, ko tiŋdu nanyit na pioŋ ti Tör Nator i muluja na se, na riköddi se ta nu, ko gwoso nagoŋ MATAT a tukaŋu se tojo ko lo lor.

⁵ Se a ko met ŋo nagoŋ nye a konakin ta i yöbu, tojo ko ta a ’dur i na pirit;

⁶ ko ŋo nagoŋ nye a konakin Datan ko Abiram, ŋwajik ti Eliaba logon a ŋuro lo Rubena; gwoso nagoŋ kak a ŋaju kutuk nanyit i wi ’yö na se, ko midijik kase ko kemialan kase, ko toro ’bo kase meyat liŋ, i kiden na Yisaraele liŋ.

⁷ Ama ta ko konyen kasu aje met konesi temejik liŋ ti MATAT nagoŋ nye a kon kine.

Ŋun a ’boroja jur logon nye a milyekin tiŋdu se

⁸ Nyenagoŋ ta ködyö ’debba lo saret liŋ logon nan a saŋi ta i lo lor lo, anyen ta böŋö gwon a iŋgo i lubbö lukata ko i morga na jur logon ta laŋaddu lukata i morga na lepeŋ lu,

⁹ anyen ta böŋö si ’da diŋit a najo i jur logon MATAT a milyekin i tiŋdu na merenyejin kasu ko nyakwariat kase lu, ŋilu jur logon ko le ko siwatat ’do ’dokon kata lu.

¹⁰ Kogwon jur logon ta de lupöddu i morga na lepeŋ lo ti gwon gwoso jur lo Ejipeto, logon ta aje poŋdye kata lu, logon ta a weja nyomot kasu ko a popogga lepeŋat gwoso melesen na ’dötilön;

¹¹ ama lu jur logon ta de laŋaddu lukata i morga na lepeŋ lu gwon a jur lo merya se ko luruki, logon mömöju pioŋ ti kudu na ’duun ki,

¹² nye a jur logon MATAT Ŋun losu a tirikuni i gaju; a MATAT Ŋun losu gwe i meddya na lepeŋ perok liŋ, suluja i suluet na kiŋa tojo ko ’dutet nanyit.

¹³ A mo gwe sona, ko ta a yiŋga ’bura i ’debba na saresi kwe logon nan a sarakin ta i lo lor kulo, i nyaŋu na MATAT Ŋun losu, ko i kitakiŋdya na lepeŋ ko töilyet kasu liŋ ko ködudwö-lön kasu liŋ,

¹⁴ a nye mo tiŋdi kudu kasu i jur i diŋit nanyit, i kiser ko i ja ’be, anyen ta böŋö kwökwötuŋdyö ’bolot kasu, ko ludweki kasu ti binyo ko ti welet.

¹⁵ A nye mo tiŋdi döru kasu i yöbu a lo toro ’bo kasu, a ta mo nyesi nyesu a yimönö.

¹⁶ Kunyar ta, an töilyet kasu mumuluka a ta girara kaŋo i kitakiŋdya na kulye Ŋunyen ko i kwakwaddu na lepeŋat,

¹⁷ a woran na MATAT mo tuleki kasu, a nye kiŋdi ’dikolo, a kudu gwe ’bayin, a kak tine radan ludweki, a ta mo tolikine ’de ’de i lu jur lo ’but logon MATAT a tin ta lu.

¹⁸ Nyenagoŋ ta ködyö ’delakiŋdya kilo kulyaesi kwe kasu i töilyet ko kasu i ködu dwölön; a ta torakiŋdye se kasu i könisi a kweyesi, a se mo gwe a ŋo na dukuki konut i komor i kiden na konyen kulök.

¹⁹ A ta ködyö mimiŋa-kiŋdye se i ŋwajik kasu, a ta jamakiŋdye kulya kase na si ’dari ta kasu i kadijik, ko na wöröri ta i kiko, ko na piriki ’e ta kak, ko na ŋe ta ki.

²⁰ A ta ködyö wurökiŋdye se i kaden ti kötumitön ti kadijik kasu ko i lupesi kasu,

²¹ anyen kiŋajin kasu mo gwon jore se ko kiŋajin ti ŋwajik kasu i jur logon MATAT a milyekin i tiŋdu ŋa merenyejin kasu lu, gwoso na muŋge ’diko kak na.

²² A ko ta mo ’debba ŋo kilo saresi liŋ logon nan a sarakin ta i koŋdya na se, i nyaŋu na Ŋun losu, ko i wörö kanyit i kikolin liŋ, ko i ’depakiŋdya ŋo ko lepeŋ;

²³ a MATAT mo riköddi kilu jurön liŋ kaŋo kasu i komor, a ta mo morgi jurön logon toto Ŋun ta i tojore ko i riŋit nase.

²⁴ A piritön liŋ nagoŋ ta a ryoryok ko ’dapan kasu kune mo gwe a kasu; a lokökoritan kasu mo suluje i yöbu tojo ko Libaŋon, ko i lu kare logon a kare Perat, tojo ko tör duma na ’balaŋ na gwon i swöt lo toko-tyaŋ na.

²⁵ A ŋuto lele gwe ’bayin logon jujukin te ’ya ta; a MATAT Ŋun losu mo tiŋdi ŋutu liŋ ti lu jur logon ta mo ryoryok lu i kujonö na ta ko i rigwökö gwoso nagoŋ nye aje jama-kiŋdye ta nu.

²⁶ Meddi ta, i lo lor nan a tiŋdu kasu i komor ko ’boriet ko lomit.

²⁷ Ko ta a yiŋga saresi ti MATAT Ŋun losu logon nan saŋi ta i lo lor kulo, a ta mo ’boriani ’boria;

²⁸ ama ko ta ti yiŋga saresi ti MATAT Ŋun losu, a ta girara kaŋo i kilo logon nan a saŋi ta i lo lor lo, i kepöddu na kulye Ŋunyen logon ta a ko den kulu, a ta mo lömöni lomö.

²⁹ A mo gwe sona nagoŋ MATAT Ŋun losu mo tolupoddu ta i lu jur logon ta tu nyu i morga na lepeŋ lu, a ta ködyö nyönyöggi ’boriet i mere Gerrim, a nyönyöggi lömit i mere Ebala.

³⁰ gwon i nu pele na Yardene i swöt lo tokotyaŋ na lu kiko, i swöt lo ’doro ’i kolor, i jur lo ŋutu ti Kanana lo si ’da i Araba, a diŋöni ko Giligala, nyona ko ködini logon a ri lo gwon More, ’bayin sona le?

³¹ Kogwon ta laŋaddu i nu pele na Yardene i lupö lukata i morga na lu jur logon MATAT Ŋun losu tikin ta lu; a ta ködyö morgi lepeŋ a si ’dani nyu,

³² a ta ködyö tiji i koŋdya na saresi liŋ lo wurö ko kulya na ’duŋö kune nagoŋ nan a sarakin ta a lo komor i lo lor.