Nyökit 10 - Bibilia Buk na Ŋun nagon koti luŋu a

Ŋurupö na ’dayatak nagoŋ a tetena daŋ tomurek

¹ A i nu diŋit MATAT kulyani ko nan adi, Tutuŋe ŋurupö na ’dayatak murek gwoso ti kokwe kune, ko poŋdi köyö ni i mere ki, köteteŋdi saŋduk nagoŋ a ködini.

² A nan mo wurökin-dye i kine ŋurupö kulyaesi lo gwon i ŋurupö ti kokwe kulu nagoŋ do a gwagwalak kunu, a do tikiŋdye se i saŋduk lukata.

³ A nan teteŋdi ’bukuli a saŋduk, a nan tutuŋe ŋurupö murek na’dayatak gwoso ti kokwe kunu, a nan iti i mere ki ko ŋurupö murek na ’dayatak köyö i könisi.

⁴ A MATAT wurökiŋdye Saresi Puök logon nye a jambi ko ta i mere, i kiden na kimaŋ lukata i lu lor lo momoret kulu, i ŋurupö gwoso wuresi ti kokwe kulu: a MATAT tiŋdi nan se.

⁵ A nan wöripuŋdye a poŋdi kak i mere, a tiŋdi kunu ŋurupö i nu saŋduk na teten nan nu; a se gwe nyu, gwoso na saŋi MATAT nan nu.

⁶ (A ŋutu ti Yisaraele ŋiörö kaŋo Berot-bene-yakan tojo ko Mosera. A Arona twane twan, a nye nukani nyu; a Elejara ŋuro lonyit kitani a koane kanyit i pirit.

⁷ A se ŋiörö nyu tojo ko Guduŋoda, ko i Guduŋoda tojo ko Yotebat logon a jur logon ko luruki ti pioŋ.

⁸ A i nu diŋit, a MATAT geluŋdye kötumit na Lewi i ’dokoddu na saŋduk na tomoret na MATAT, ko i gwo ’dan ko MATAT i komor i kitakiŋdya na lepeŋ, ko i ’boroja na ŋutu ’diŋdya karin ti MATAT tojo ko lo lor.

⁹ Nyenagoŋ a Lewijin gwe ’bak koret na kak kode lomore ko luŋasirik kase; ama MATAT logon a lomore lose gwoso nagoŋ MATAT Ŋun losu a jambi ko lepeŋat na.)

¹⁰ A nan mönuŋdye i mere ki perok merya Iŋwan gwoso na kokwe nu, a MATAT yiŋge nan i nu diŋit köti; a MATAT tine ’dekan tukaŋu ta.

¹¹ A MATAT kulyani ko nan adi, ŋine ki, ŋiörö ko kilo ŋutu ŋerot, anyen se böŋö lubbö lukata i morga na jur, logon nan a milyekin merenyejin kase adi nan titin se lu.

Ŋo nagoŋ MATAT ’de ’dekan kasu

¹² Nyenagoŋ do kötumit na Yisaraele, ŋo a nyo nagoŋ MATAT Ŋun losu ’de ’deggi kasu? Do ködyö kugga MATAT Ŋun ilot, i wörö kanyit i kikolin liŋ i nyaŋu na lepeŋ, i kitakiŋdya na MATAT Ŋun ilot, ko töili ilot liŋ, se ko ködudwo iŋot liŋ,

¹³ i ’debba na todi-nesi ti MATAT se ko saresi kanyit lo wurö logon nan a saŋi do i lo lor kulo anyen gwon a na ’but konut.

¹⁴ Meddi ta adi, ki se ko wi nanyit, se ko kak ko ŋo liŋ lo gwon lukata kulo a ti MATAT Ŋun losu;

¹⁵ ama a MATAT gwe ko pusök i nyaŋu na merenyejin kasu, a i mukök nase a nye wuluŋdye ta logon a nyakwariat kase, a nyaŋi ta lwolwöŋ kulye gweyajin liŋ ti ŋutu gwoso i lo lor na.

¹⁶ Nyenagoŋ taweŋi ta ’böriköt na muggö töilyet kasu, ko an ta ko gwon a miŋeki köti.

¹⁷ Kogwon MATAT Ŋun losu a Ŋun totoŋun kulye Ŋunyen ko a MATAT totoŋun kimak. Nye a Ŋun duma, nye ko riŋit ko kukujönörikin. Nye ti gwon a kanyu-nyumönit lo ŋutu, nye ti wuju ŋo nagoŋ ropaki a lwön.

¹⁸ Nye lo ’duŋgö putesi ti kikijikö ko karu ’bejin, ko nyanyar ŋuto lo si ’da a lepetyo, i tiŋdu na lepeŋ kinyo ko jupisi.

¹⁹ Nyenagoŋ nyare nyar ŋuto lo si ’da a lepetyo kogwon ta köju si ’da a lepelok i jur lo Ejipeto.

²⁰ Ta ködyö kukuk MATAT Ŋun losu, a ta ködyö kitakiŋdye lepeŋ, a ta ’depakiŋdye ko lepeŋ ŋo, a ta milyeji ko karin kanyit.

²¹ Ta ködyö pupurja lepeŋ; nye a Ŋun losu logon a konakin-dya ta kine ŋo temejik ko tokujönöesi nagoŋ ta aje met ko konyen kasu.

²² Merenyejin kasu a dudulara kak Ejipeto a ŋutu merya buryo; ama soŋinana MATAT Ŋun losu aje tiŋdu ta i gwon jore gwoso kaser ti ki.