Nemaya 8 - Bibilia Buk na Ŋun nagon koti luŋu a

Ejira kenakiŋdya ŋutu Saresi ti Mose

¹ Nyena a ŋuto liŋ momori momora ateŋ geleŋ i terere komorga kötumit yeket na piŋo; a lepeŋat takiŋdye Ejira kawurönit anyen joŋdya buk na saresi ti Mose logon MATAT köju a sarakin ŋuto ti Yisaraele kulu.

² A i lor geleŋ lo yapa toburyo, a koane Ejira joŋdi buk na saresi i komor na lodir lo ŋuto lulyan ko nawate, ko ŋwajik lio logon bulöni bulö yiŋga ko kuruŋdyö.

³ A nye gwo ’de diraddu i swöt lo terere komorga kötumit yeket na pioŋ, a nye keŋdi buk i komor na ŋuto lulyan ko nawate ko ŋwajik logon bulöni bulö yiŋga ko kuruŋdyo, suluja i ko ’bure tojo ko tuparan kiden. A ŋutu liŋ tiŋdi swo kase i yiŋga na ’kulya ti buk na saresi.

⁴ A Ejira kawurönit gwo ’de i taka loki nagon se a teten a na kine kulya na; a Matitia, ko Sema, ko Anania, ko Uriya, ko Kilikia, ko Maseya gwo ’de kanyit nyona i swöt lo lutaten; a Pedaya, ko Misaele, ko Malekiya, ko Kasum, ko Kasebadana, ko Takaria, ko Mesulam gwo ’de kanyit i swöt lo kadoŋe.

⁵ A ŋuto lio bulöni bulö meddya Ejira kogwon nye gwon i taka loki, a na meddi se lepeŋ i ŋaju na buk nu, a se lio ŋine ki.

⁶ A Ejira pupurje MATAT Ŋun duma; a ŋuto lio ’doggi könisi ki a ruŋge adi, Amin, Amin; a se dulakiŋdye kusik kase kak i kujöŋ a kwakwaddi MATAT.

⁷ A köti Yesu a, ko Bani, ko Serebia, ko Yamin, ko Akuba, ko Sabeta i, ko Odiya, ko Maseya, ko Kelita, ko Ajaria, ko Yojabada, ko Kanan, ko Pelaya, logon a Lewijin kulo ŋarakiŋdye ŋuto anyen kuruŋdyö saresi i diŋit nagon se nyuŋ gwon kase i piritön nu.

⁸ A se keŋdi buk na saresi ti ŋun a nyönyöggi nyönyöggu, a tokurukiŋdye ŋuto anyen se kukurun ŋo nagon a kenaki se kune.

⁹ A Nemaya logon a modir, ko Ejira koane logon a kawurönit, se ko Lewijin lo todiŋdyö lodir kulo kulyani ko ŋuto lio adi, Lo lor a lor loke lo MATAT ŋun losu; an ta ko delya ta, ko gwien ta. Kogwon ŋuto liŋ a gwien na yiŋge se kulyaesi ti saresi.

¹⁰ Nyena a nye kulyani ko lepeŋat adi, Iti ta, nyesi ta lokore nagon a welet, ko möji ta binyo na paleleŋ, ko tiŋdi ta koresi ti kinyojin i ŋuto logon ’bak nene ŋo; kogwon lo lor a lor loke lo MATAT likaŋ; an ta ko delya ta, kogwon lyöŋön ko MATAT a riŋit nasu.

¹¹ Nyena a Lewijin suŋge lodir adi, Gwe ta taliŋ, kogwon lo lor a lor loke; an ta ko gwon ta ko delya.

¹² A ŋuto lio iti tu i nyesu, ko i möju, ko i tiŋdu na koresi ti kinyojin i ŋuto logon ’bak nene ŋo, ko i lyöŋön parik, kogwon se aje kuruŋdyö kulyaesi logon a jamaki se kulo.

¹³ A i perok murek, a kusik ti kötumitön ti merenyejin ti ŋuto lio, ko koanejin, se ko Lewijin momoruŋdye ko Ejira kawurönit ni, i yeyeju na kulyaesi ti saresi.

¹⁴ A se ryeji i buk na saresi a wuröki adi MATAT a sarakiŋdya Mose adi i rorwe lo yapa toburyo, ti ŋuto ti Yisaraele ködyö mönuŋdye i murugujin.

¹⁵ Koti ti se kodyö tukörö lore i köjinö kase liŋ ko i Yerusalema adi, Iti ta i merya i dogga na kenia ti kaden ti jeitun ti melesen, ko ti jeitun ti mu ’dio, ko ti Kadasa, ko ti tomur, se ko kulye kaden logon ko koropo jore, anyen ko tetenari murugujin, gwoso na wurörikin nu.

¹⁶ Nyena a ŋuto iti kaŋo a joŋdi se, a rarapakiŋdye ’borik a murugujin, ŋuto geleŋ kanyit i lo ’dek ki, ko kase i ’baŋin, ko i ’baŋin na gwon i lukata na mariŋ na kadi na ŋun, ko i terere na gwon i kötumit yeket na piŋo, ko i terere na gwon i kötumit na Epuraima.

¹⁷ A lodir lo ŋuto lo yitwe i to ’dupien kulo rarabbi murugujin a mönuŋdye lukata; kogwon suluja i perok ti Yesu a ŋuro lo Nun tojo ko ŋilu lor ŋuto ti Yisaraele a ko nyuŋ koŋdya sona. A lyöŋön gwe kata a duma parik.

¹⁸ Temba i lor, suluja i lor lo kokwe tojo ko ’dutet, a nye keŋdi buk na saresi ti ŋun. A lepeŋat koŋdi rorwe ko perok buryo; a i perok budök a gwe a momoret duma na MATAT, gwoso i saret.