Naum 1 - Bibilia Buk na Ŋun nagon koti luŋu a

MATAT ko woran nanyit roropakiŋdya

¹ ’Dolet i kulya ti Ninewe. Ŋina a buk na ŋo na met Naum ŋuro lo Elekosa kanyit i toili kune.

² Adi, MATAT a Ŋun logon a kayinonit ko a lo roropakiŋdya, MATAT roropakiŋdya ko a jore ko woran; MATAT ropakiŋdya kaŋisak kanyit a ’de ’yi woran a na merok kanyit.

³ MATAT ’di ’diko i woran ama ko riŋit a duma parik, lepeŋ mo tine tu ’baka ’yu kato-ronyak. Kiko lonyit gwon i libibiu ko i kobuŋot wome lukata, a nye ryokakiŋdye ’dikolo kak a ŋutut.

⁴ Lepeŋ ririŋ tor na ’balaŋ a toliliŋge nye adi kworok, a towere ’yi karya liŋ; a Basan ko Karmela riŋe riŋon, a ŋo ti Libanon na wilun kune nopara nopara.

⁵ A merya boboŋdi boboŋdu kanyit i komor; a lurwat luŋte luŋto; a kujoŋ ko kak ko ŋo liŋ lo gwolor kata kulo iŋge koro kanyit i komor.

⁶ Ko lepeŋ a woran ŋa logon bubulo gwo ’dan? ŋa logon bubulo ŋoŋga woran nanyit na pape? Woran nanyit ’bukuŋdyo kaŋo gwoso kimaŋ. a lelya gwagwalakani gwagwalaka ka ’de ka ’de kanyit i komor.

⁷ MATAT a lo ’but, nye a pirit ’danaet i diŋit sasanyet; Lepeŋ memet ŋutu lo ga ’yu rupu kanyit kulo,

⁸ a nye lwöggi se i bar lo mumuluja, a nye tutuŋge kaŋisak kanyit, a mo rikoddi merok kanyit i mudwe.

⁹ Nyo nagon ta ŋutu ti Ninewe mwon ko MATAT? Lepeŋ mo tutuŋgo ŋo liŋ: nye mo ti ropakiŋdya merok kanyit daŋin murek.

¹⁰ Lepeŋat tutuŋgo gwoso rudu lo kikwa, ko gwoso doru loteyon.

¹¹ Lele losu a pukun kaŋo gwoso kajujuwanit loron i mwon ko MATAT.

¹² MATAT lo kulya adi, Ma ’di nagon ŋutu ti Asura jore ko a iŋgo, a se mo remoni remo, a tatuani tatua asut. Ma ’di nagon nan a tomi ta Yuda ko Yisaraele, nan mo ti tomi ta koti.

¹³ Nyena soŋinana nan ’be ’beleŋ gwuluŋi lo Asura kasu i muruto, a gigiŋdye nekenejin na torarikin ta kine.

¹⁴ MATAT a tiŋdu saret kogwon kulya kasu: adi, Karin kasu mo tine ’dinya koti; nan MATAT mo tutukukin nyo-muejin na gigiru se ko nyomuejin na ninito kak i kadi na punyen kasu. Nan mo tetenakin ta dilyo nukesi, kogwon ta a lut.

Loŋio ti ’doro na Ninewe

¹⁵ Meddi ta, mokosi ti ŋuto lo joŋdya liŋio lo ’but kulo popo i merya ki, logon tokuoddu kulya ti taliŋ. Ta ŋutu ti Yuda, ’depe ta ’dep roriot kasu, koŋdi ta milyejin kasu, kogwon ŋutu lorok mo koti tine po i moro ko ta, Lepeŋat a tukara asut.