Mika 4 - Bibilia Buk na Ŋun nagon koti luŋu a

MATAT mo saŋu kak liŋ ko taliŋ

¹ A mo gwe sona i perok lo popo, a mere logon kadi na MATAT gwon kata lo mo togwi ’dikine ki a lojo Iwolwöŋ merya liŋ, a lepeŋ mo ’dulujine ki Iwolwöŋ lurwat. A gweyajin ti ŋutu mo ’bukuŋdye kanyit ni,

² a jurön jore mo poŋdi po, a kulyani adi, Po ta, ti yi kiyaddi ta ki i mere lo MATAT, i kadi na ŋun lo Yakobo; anyen nye böŋö todinikiŋdyö yi kikolin kanyit, anyen yi boŋö jojo wöro i gwokiot kanyit, Kogwon saret mo pupukun Siona, iŋkoi, kulyaet lo MATAT pupukun Yerusalema yu.

³ Lepeŋ mo ’du ’duŋgö putet i kiden na gweyajin ti ŋutu jore, a mo liliuŋdye kulya i kiden na jurön ti pajo logon a ti riŋit; a se mo niddye baŋdujin kase a kolya, a niddye goro kase a walya ŋeresi; a lele jur mo tine ’bilikiŋdya baŋdujin kase ki i mörö ko lele jur, a se mo tine jujumbu gor köti kwöŋ.

⁴ Ama a ŋutu lio mo sakani i mukökö ti kaden kase ti binyo ko ti ki ’biet, a lele ŋuto mo gwe ’bayin lo tokujöŋdu se. Kogwon MATAT lo kurumi ko mugun nanyit aje jambu sona.

⁵ Kogwon gweyajin ti ŋutu liŋ wörö i karin ti ŋunyen kase, ama yi kulo woro i karin ti MATAT Ŋun likaŋ ŋupi ŋupi.

ŋutu ti Yisaraele mo nyokwe bot kase i jur

⁶ Nan MATAT lo kulya adi, I ŋilu lor nan mo tutun ŋutu lo bata kulo i pirit na geleŋ, a nan mo momoruŋdye ŋutu i pirit na geleŋ logon aje riköji kaŋo, se ko ŋutu logon nan a sasan kulo.

⁷ A nan mo gaji ŋutu lo bata kulo a pitönö, a mo koŋdi ŋutu lo riköji kulo a jur iŋgo; a nan MATAT mo lo tumatyane ko se i mere Siona suluja i na diŋit na tojo ko ŋupi.

⁸ Do bilili tiyit lo yidin, logon a mere lo köji na Siona, kido saret na köju nu mo yiyitwe konut ni, ŋina kido a tumatyan na köji na Yerusalema.

⁹ Nyo do gwiörö ki? Do ’bak mor le? Do totomie gwoso ŋuto na tomie i ta ’du. Kajujuwanit ilot aje twan le?

¹⁰ Do köji na Siona, tomieni tomie i ruuŋdya, gwoso ŋuto na tata ’du; kogwon soŋinana ŋutu kulök mo kökolokin köji a si ’dani mu ’diŋ, a se mo iti tojo Babela. A se mo lwökoni lwökö nyu, a MATAT mo riŋuŋdye se kaŋo i könisi ti merok kulok.

¹¹ I na diŋit juron jore aje momora i mörö ko do, kulya adi, Ti lepeŋ koröni körö, ti konyen kaŋ diŋe do Siona ko lyöŋön i körö inot.

¹² Ama se ti den yeyeesi ti MATAT, a se tine kurun yeyeet nagon nye ’dek koŋdya na. Kogwon nye aje momora lepeŋat i pirit gwutet na ’bolot gwoso kusik ti ’bolot.

¹³ Do köji na Siona, suluje gwuddyo ’bolot gwoso dwöt lo tokitai, kogwon nan mo kökon pogwora kulok a witiöt, a sulukwakan kulok gwe a mölwö, a do mo rarayaggi gweyajin ti ŋutu jore, a do mo wukiŋdye nan MATAT go na ryakun se a ŋo nake na rurwan, a do tiŋdi nan MATAT lo kak ’bukuluŋ tukworien nase.