Mika 3 - Bibilia Buk na Ŋun nagon koti luŋu a

Nebi yuyuggö temejik ti Yisaraele

¹ A nan kulyani adi, Ta ŋutu logon a kusik ti kotumit na Yakobo ko a kasarak ti kotumit na Yisaraele, yiŋge ta! ’Bayin a kulya kasu i deŋdya na kulya na rigwo le?

² Kolumbo a ta maŋdi kulya na ’but a nyaŋi toron, a ta ’boddi mugunya ti ŋutu kwe, a ’du ’duŋuji lokorio kaŋo kase i kuyu;

³ ta koti a nyo lokoriŋ ti ŋutu kwe, a ’boddi mugunya kase, a totoggi kuyu kase a tutubbe se a lo ’di ’dik gwoso lo tiki i sape, ko gwoso lokore na tiki i mu ’da.

⁴ A kirut ta mo gwiki ko MATAT, ama a nye mo tine ruk ta; a i nu diŋit a nye mo ’de ’yi komor nanyit ko ta, kogwon ta a koŋdya konesi narok.

⁵ Kulo a kulyaesi ti MATAT i kulya ti nebijin lo togiŋa ŋutu kanyit. Kilo nebijin ko a tiki ŋo lo nyenyei, a se laije adi, ŋo lio a na ’but, ama ko ŋutu a ko tikin se ŋo lo nyenyei a se teteŋdi moro.

⁶ A MATAT kulyani adi, Ko ŋina kwe a kak mo gwe a tukwaje kasu, a ta mo tine meddya kulya kasu i toilyet, a mo gwe a mudwe kasu, a ta mo tine koŋdya to ’bunun. A kolor mo ’dororo kak i kulya kasu ta nebijin, a lor mo worani a mudwe kasu.

⁷ A kametak ti kulya na popo se ko ŋutu lo koŋdya to ’bunun kilo mo toyuone kusik; a lepeŋat lio mo muŋge kutusen kase, kogwon ruket gwe ’bayin na po ko Ŋun yu.

⁸ Ama ko gwe gwoso nan, nan a jore ko riŋit, nan a jore ko Mulökötyo lo MATAT, nan a jore ko ’duŋgo gwogwo ko topurwan anyen tukökiŋdyö Yakobo logon a Yisaraele lyaŋesi se ko toronjin kanyit.

⁹ Yiŋge ta kine kulya, ta ŋutu logon a kusik ti kotumit na Yakobo, ko a kasarak ti kotumit na Yisaraele, ta logon maman kulya na rigwo, a tukwolorgi kulya liŋ nagon jojo,

¹⁰ ta logon a ’duggo Siona ko rima, iŋkoi, ta a ’duk Yerusalema ko toron.

¹¹ Ŋutu kanyit temejik ’duŋgo putesi ko ŋo na ropaki a Iwon, a koanejin todiŋdye ko ropesi, a nebijin koŋdi to ’bunun ko gurut; ama se toggu ’borik ko MATAT, a pipije adi, MATAT gwon kayaŋ kiden, ’bayin sona le? ŋo naron ’bayin nagon pokin kayaŋ loki.

¹² Nyena kogwon kulya kasu, Siona mo kukuru gwoso melesen; a Yerusalema mo worani a sudiet ti rubajin, a mere logon kadi na MATAT gwon kata lo mo worani a rudu.