Mika 1 - Bibilia Buk na Ŋun nagon koti luŋu a

Nebi gwigwien i kulya ti Samaria ko Yerusalema

¹ Kulo a kulyaesi ti MATAT lo pokin ko Mika lo Moreset, i ŋo nagon nye a met kanyit i toili i kulya ti Samaria ko Yerusalema i perok ti Yotama, ko ti Akaja, ko ti Kijikia moran ti Yuda.

² Ta ŋutu lio, yinge ta; do kak se ko ŋo liŋ na gwon konut lukata kine, yiŋge ta; ti MATAT Ŋun lo gwon i kadi nanyit nake na rurwan lo, gwe a katokoronit lo toronjin kasu.

³ Kogwon mete, MATAT lulupuŋdyö kaŋo kanyit i pirit; a nye poŋdi kak a wöröni i piritön nagon a ko ’dulan.

⁴ A merya mo lulusököni lulusöko kanyit i mokosi gwoso su ’bi na gwon i kimaŋ nyona, a piritön na ’dir mo kiki ’ye kiki ’ya gwoso ’buköddu na karya i piritön nagon a wilön.

⁵ Kine ŋo liŋ kona kogwon lyaŋesi ti ŋutu ti Yakobo, a kona kogwon toronjin ti kötumit na Yisaraele. Lyaŋesi ti ŋutu ti Yakobo a nyo? ’Bayin a Samaria le? A toron na kötumit na Yuda gwe a nyo? ’Bayin a Yerusalema le?

⁶ Nyenagon nan MATAT mo kökon Samaria a sudiet ti rubajin mu ’diŋ yu, ko a pirit ’yutit na kaden ti binyo; a nan mo ’buköddi ŋurupö kanyit kak i pirit na ’dir, a paŋdi pipilesi kanyit.

⁷ A ŋöjinö kanyit liŋ na gigiru kune mo gwagwalakani gwagwalaka a na ’di ’dik na ’di ’dik, a ŋo liŋ nagon ropaki lepeŋ kunu mo ’yurani ’yura ko kimaŋ, a nan mo kököröji nyomuejin kanyit liŋ logon a nunyen kulo adi sit. Damaseke koju pepeŋdya kulu nyomuejin kogwon ropesi kanyit ti kalupe, a se mo koti worani a ropesi ti kalupe.

⁸ Kogwon ŋina kwe nan mo dedelya a gwine gwien parik, a nan mo rusuŋdye boŋgwat kaŋo a wöröni a limu kana; a nan mo woŋe gwoso gwagwe, a gwine gwoso tutwo.

⁹ Kogwon ’dika nanyit ti lik; ŋina korit aje ’durökin Yuda, lepeŋ aje yeŋga i lupet na ŋutu kwe, ma ’di tojo Yerusalema.

¹⁰ Ko jamakin ta ŋutu ti Gata kine kulya, an ta ko gwien ta kwöŋ; gwugwuluŋge ta ’borik i ŋutut Betele-apura yu.

¹¹ Ta ŋutu lo si ’da Sapir, suluje ta woro a limuŋ kana ko yu na kusik; ŋutu lo si ’da Sanan a ko po kaŋo kase köji. ŋutu ti Bet-esele gwigwien, lepepat ti bulo po i parakiŋdya na ta.

¹² Kogwon ŋutu lo si ’da Marot mordu kulya na ’but ko pusok, kogwon kulya narok a po kak ko MATAT yu tojo i kötumit lupet na Yerusalema.

¹³ Ta ŋutu ti Lakisa, toraki ta arabiajin lo Jijiko i kusanjin lo wokon wulek; toron na ŋutu ti Siona koju suluja kasu, iŋkoi, lyaŋesi ti ŋutu ti Yisaraele koju rye kasu kiden.

¹⁴ Tiŋdi ta ŋutu ti Moreset-ŋata ’dokesi nagon se titiri. Ŋutu ti Bet-akejiba aje mumulugga moran ti Yisaraele.

¹⁵ Ta ŋutu ti Maresa, nan mo koti jajakin ta ŋuto logon riŋuŋdya jur losu; a ŋutu lo bubula ti Yisaraele mo iti Adulam.

¹⁶ ’Bariŋdi ta kupir kasu anyen delya ŋwajik kasu lo nyanyara; ’bariŋdi ta kusik kasu a namelenyak gwoso ti logulusen, kogwon se aje kolokin ta ko aje joŋa i to ’dupien.