Matayo 8 - Bibilia Buk na Ŋun nagon koti luŋu a

Yesu a toke ’ya ŋuto lo rimajin

¹ A Yesu ko kiyene kak i mere, a ŋutu jore parik kepoddi lepeŋ.

² Nyena a ŋuto lo rimajin poŋdi ko lepeŋ ni, a rugwuŋökine kak kanyit i komor, a kulyani adi, Pon MATAT, ko do nyanyar do bubulö toke ’ya nan.

³ A Yesu riöddi könin lonyit a ’bo ’yi lepeŋ kulya adi, Iŋkoi, nan nyanyar; ti do kele kelan. ’De ’de a rimajin kanyit iŋge tokela.

⁴ A Yesu kulyani ko lepeŋ adi, Meddi ’bura an do ko jamakin lele ŋuto kine kulya; ama iti, kweki mugun ko kijane, ko tiŋdi ’doket gwoso na sarakiŋdye Mose nu, anyen ŋutu deden adi do aje tokela.

Yesu a toke ’ya koliponit lo duma lokamörök ti Roma

⁵ A Yesu ko tulöddi Kapernauma, a duma lo kamörök ti Roma mia geleŋ iti ko lepeŋ yu, a mamaŋdi lepeŋ,

⁶ adi, MATAT, kölipönit liŋ lu rogga kak midi, a bata mugun a twan, ŋoŋoŋga parik parik.

⁷ A Yesu kulyani ko lepeŋ adi, Nan de tutu i toke ’ya na lepeŋ.

⁸ Ama a duma lo kamörök waddi lepeŋ adi, MATAT, nan ti jukin i ruköddu na do köyö mede; ama tuŋ jamuŋdye kulyaet a kölipönit liŋ de kele kelan.

⁹ Kogwon nan a ŋuto logon sara ko temejik kwe, a nan köti gwe ko kamörök lo gwon köyö i mukök. Ko nan takiŋdya lele adi, Iti, a nye iti tu; a ko nan luŋgu lele adi, Po, a nye poŋdi po; a ko nan takiŋdya ’dupiet liŋ adi, Koŋdi na ŋo, a nye koŋdi koŋdya.

¹⁰ A na yiŋge Yesu ŋilo ŋuto i kulya sona nu, a nye iŋge söŋu, a kulyani ko ŋutu lo kipuŋdyö nye kulo adi, ’Diri nan takiŋdya ta adi, nan a ko ryö yupet duma gwoso na ’bayin ma ’di i Yisaraele.

¹¹ Nan takiŋdya ta adi, ŋutu jore mo popo i swöt lo ’yure ko i swöt lo tokotyaŋ, a mo si ’dakine i nyesu ko Abarayama, ko Yisaka, ko Yakobo i Tumatyan na Ki;

¹² ama se logon a ŋutu ti Tumatyan kilo mo gubaji kaŋo i mudwe; a ŋutu mo gwine gwien a mo pije kala nyu.

¹³ a Yesu kulyani ko duma lo kamörök adi, Iti, ti konakine do gwoso na yubbe do na; a kölipönit lonyit iŋge tokela i ŋinu saa gwak.

Yesu a toke ’ya ŋutu jore

¹⁴ A Yesu ko lupöni ko Petero kadi, a nye meddi moken na Petero rogga kak a gilö mugun sasa ’yu pape.

¹⁵ a nye ’bo ’yi könin lo ŋina ŋuto, a sa ’yu na mugun kö ’yi lepeŋ, a nye ŋine ki a parakiŋdye lepeŋ.

¹⁶ A i ŋilu koriri i sömukö, a ŋutu jakiŋdye lepeŋ ŋutu jore logon a moka ko mulökö lorok. A nye riköddi mulökö lorok kaŋo ko kulyaet ka ’de, a nye iŋge toke ’ya ŋutu liŋ logon a gigilötu,

¹⁷ anyen ŋo na jam nebi Yisaya köju kunu ködyö kokona, nagon a jama adi, Lepeŋ a joŋga tomunyan nikaŋ, a iŋge sopa ko twana kaŋ.

Ŋutu logon jambu adi se ’de ’dekan kepoddu Yesu

¹⁸ Nyenagon a Yesu ko meddi ŋutu jore parik kanyit nyona, a nye saŋi ŋutu kanyit kajujumuk anyen se laŋaddu i nu pele na tör.

¹⁹ a lele katodinönit lo Saresi ti Mose poŋdi ko lepeŋ ni, a kulyani adi, Katodinönit, nan de kekeporo do ko do tu da.

²⁰ a Yesu waddi lepeŋ adi, Liŋgojin gwon ko dilyö kase, kwen gwon ko kadijik kase, ama nan ŋuro lo ŋuto ’bak pirit nagon nan sukiŋdye kwe nio.

²¹ a lele lo ŋutu kanyit kajujumuk kulyani ko lepeŋ adi, MATAT, a kokwe rukörö nan i tu i nugga na baba.

²² Ama a Yesu waddi lepeŋ adi, Kipuŋdye nan, kölöki lo twatwa i nugga na lo twatwa kase.

Yesu a toyiŋaju köbuŋöt duma i tör

²³ A Yesu ko kije i ki ’bo kata, a ŋutu kanyit kajujumuk moraddi ko lepeŋ.

²⁴ Mete, a köbuŋöt duma wukuŋdye wukuŋdyö i tör, a pioŋ ya ’yi i ki ’bö kata, a ki ’bö gwe nyona ko ’dirön; ama a lepeŋ gwe i doto.

²⁵ a se iti i topuruŋdyö na lepeŋ, a kulyani adi, MATAT, lwöki yi, yi kulo ’di ’dirön.

²⁶ A nye pije lepeŋat adi, Ta ŋutu logon ko yupet a na ’dit, nyo ta kukujönö? A kirut nye ŋine ŋien, a riŋge köbuŋöt se ko tör, a ŋo liŋ gwe taliŋ adi lii.

²⁷ A ŋutu kulo iŋge söŋu, a totopine adi, Ŋilo ŋuto a ŋa logon ma ’di köbuŋöt se ko tör yiyiŋ lepeŋ?

Yesu a toke ’ya Ŋutu murek lo gwon ko muloko lorok

²⁸ A Yesu ko ’dure i nu pele na tor na Galilaya i jur lo ŋutu ti Gadara, a ŋutu murek logon a moka ko muloko lorok poŋdi kaŋo i pirit na gulomo i rum ko lepeŋ. Kilo ŋutu a kaŋajin parik a lele ŋuto tine buŋ Iwonoddu i nilu kiko.

²⁹ Mete, a se woŋe parik adi, Do Ŋuro lo Ŋun, do ’dek nyo kayaŋ? Do po ni i tomor na yi a kokwe nagon diŋit a ko nyuŋ temakiŋdya na?

³⁰ Nyena a teŋ duma na wuryo gwe i yuku pajo madaŋ ko se.

³¹ A muloko lorok mamaŋdi Yesu adi, Ko do rikoddu yi kaŋo, sonye yi i teŋ na wuryo.

³² A nye kulyani ko se adi, Iŋgo ta, iti ta. Nyena a se lupuŋdye kaŋo a lupöni i wuryo, a teŋ liŋ na wuryo rurumuŋdye kak ’de ’de i wi na merya tojo i tor kata, a ’dire ’diron.

³³ a kayukuk wöki wökön, a iti köji kata.A se nyönyöggi ŋo liŋ ko ŋo nagon a konaki ŋutu logon a moka ko muloko lorok kulo.

³⁴ Nyena a ŋutu liŋ ti köji poŋdi kaŋo i rum ko Yesu, a se ko meddi lepeŋ, a se mamaŋdi lepeŋ anyen koko jur lose.