Matayo 6 - Bibilia Buk na Ŋun nagon koti luŋu a

Yesu todiŋdyö kulya ti ’doka na lomerika

¹ Kunyar ta an ta ko koŋdya takonesi kasu na ’but ko ŋutu i komor anyen se memet; ko ta a koŋdya sona, a Monye losu lo gwon ki lu mo tine tikin ta ropet.

² Nyena ko do tiŋdu lomerika ’dokesi, an do ko laŋa i kuddya na tore, gwoso na koŋdi kamumulukak i kadijik mo moresi ko i kikolin na anyen ŋutu bubu se. ’Diri nan takiŋdya ta adi se aje wu ropesi kase.

³ Ama ko do ’do’dogga lomerika, ti könin ilot lo kadoŋe gwe ti den ŋo nagon könin ilot lo lutaten kökon na,

⁴ anyen do ’dogga a lwön; a Munyi logon memet ŋo nagon kona a lwön lo mo ropakiŋdye do.

Yesu todiŋdyö kulya ti kwakwaddu

⁵ Köti ko ta gwon i kwakwaddu, ko mirakiŋdya ta ŋutu kamumulukak logon nyanyar gwo ’dan ki i kwakwaddu i kadijik momoresi, ko i keresi ti kikolin ti köji anyen ŋutu liŋ memet se. ’Diri nan takiŋdya ta adi se aje wu ropesi kase.

⁶ Ama ko do ’dek kwakwaddu, lupöni konut i kadi lukata i toŋkwet, kini kin kötumit, ko kwakwaddi Munyi logon ti meta lo; a Munyi logon memet ŋo nagon kona a lwön lo mo ropakiŋdye do.

⁷ Ko ta kwakwaddu, ko nyanyaggu ta ŋo kana gwoso na koŋdi paganojin na, kogwon se yeyeju adi se mo yiyiŋa kogwon se kwakwaddu parik ko kulyaesi jore.

⁸ An ta ko mirakiŋdya ta lepeŋat, kogwon Monye losu aje den ŋo nagon ta ’de ’dekan kine a kokwe nagon ta a ko nyuŋ pi lepeŋ.

⁹ Ta ködyö kwakwaddu sona adi, Baba likaŋ lo ki, Ti karin kunök bulani bula,

¹⁰ Ti tumatyan inot po, Ti ŋo nagon do ’de ’dekan kune ti konani kona i kak ni gwoso na konari se ki yu nu.

¹¹ I lo lor tiki yi kinyo likaŋ lo lor;

¹² Pitöki yi i ŋo nagon yi a koŋdya arabat kune, gwoso nagon yi köti a pitökiŋdye ŋutu logon a konakiŋdya yi arabat kulo na;

¹³ An do ko tikin yi i tema, ama lwöki yi i ŋilo loron.

¹⁴ Kogwon ko ta pipitökin ŋutu i lyaŋesi kase, a Monye losu lo gwon ki lu köti mo pitökiŋdye ta;

¹⁵ ama ko ta ti ’bön pitökiŋdyö ŋutu i lyaŋesi kase, a ma ’di Monye losu lo gwon ki lu mo tine pitökin ta lyaŋesi kasu.

Yesu todiŋdyö kulya ti miŋdya

¹⁶ Nyenagon ko ta mimiŋdya, ko mirakiŋdya ta kamumulukak lo gwon ko komorsikan nagusulak, kogwon se löpuggö komorsikan kase a narok anyen ŋutu memet adi se ’diri mimiŋdya. ’Diri nan takiŋdya ta adi se aje wu ropesi kase.

¹⁷ Ama ko do mimiŋdya, wele we kwe inot ko welet, köti lalane lala komöŋ inot,

¹⁸ anyen ŋutu böŋö gwon ti den adi do mimiŋdya, tuŋ Munyi logon ti meta lo lepeŋ lo deŋdya; a Munyi logon memet ŋo na kon do a lwön kune mö ropakiŋdye do.

’Delaki ta ’börik tukwörienjin ki yu

¹⁹ Ko ’delakiŋdya ta ’börik tukwörienjin i na kak, i pirit nagon kökora se ko lolo ’dokwe kököŋi na, i pirit nagon kolak turöddu kata i kokoladdu na.

²⁰ Ama ’delaki ta ’börik tukwörienjin ki yu, i pirit nagon kökora ti bulö kököröju kode lolo ’dokwe, i pirit nagon kolak ti turöddu kata i kokoladdu nu.

²¹ Kogwon i pirit na gwoŋdi tukwörien inot kata nu, a töili ilöt köti gwe nyu.

Lombo lo mugun

²² Konyen gwon a lombo lo mugun. Nyena ko konyen kulök a lo ’but, mugun inot ’bukuluŋ köti a jore ko parara.

²³ Ama ko konyen kulök a lörök, a mugun inöt ’bukuluŋ gwe i mudwe. Nyena ko parara na gwon konut i mugun na gwe a mudwe, a mudwe ’diri gwe a duma!

Ta ti bulö kitakiŋdya ko Ŋun ko tukwörien

²⁴ Lele ŋuto ’bayin logon bubulö kitakiŋdya ŋutu murek; kogwon kode nye maŋdu lele a nyaŋi lele, kode nye twöju lele a lauŋdye lele. Ta ti bulö kitakiŋdya kö Ŋun ko tukwörien.

Ko wiwinya ta

²⁵ Nyenagon nan takiŋdya ta adi, Ko wiwinya ta i kulya ti kinyo logon tiŋdu ta i gwon jörun, ko ta nyesu nyo kode ko ta möju nyo, kode i kulya ti boŋgwat nagon ta jupukin kasu i mugunya. Ru na ŋutu ti lwöŋ kinyo le? Mugunya ti ŋutu ti lwöŋ boŋgwat ŋona le?

²⁶ Mete ta kwen: se ti weja a tine ŋepa, a tine ’de ’ya i gugwö, ama Monye losu lo gwon ki lu lo tunyeju se. Ta ŋona ti gwon ko ’bulit a duma bia lwölwöŋ se le?

²⁷ Loŋ ŋuto losu logon wiwinyesi kanyit bubulö julakiŋdya lokiliŋ geleŋ i ru nanyit le?

²⁸ Ko nyonagon ta wiwinya i kulya ti boŋgwat? Yeyene ta köturön ti mu ’diŋ ko se ’duruŋdyö ada; se ti kita kode wiwöji waratat,

²⁹ ama nan takiŋdya ta adi ma ’di Solomona ko minyo lonyit liŋ a ko jupu kwekwelen gwoso nene na kine köturön.

³⁰ Nyena ko Ŋun tojubbu döru lo mu ’diŋ sona logon a lodon i lo lor lo a kotumalu namarikin kimaŋ, bia parik a nye mo tine tojubbu ta, ta ŋutu logon ko yupet a na ’dit kilo le?

³¹ Nyenagon an ta ko wiwinya ta adi, Yi de nyesu nyo? kode adi, Yi de möju nyo? kode adi, Yi de jupukiŋdya nyo?

³² Kogwon paganojin gaga ’yu kine ŋo liŋ, ama Monye losu lo gwon ki lu deden adi ta ’de ’dekan kine ŋo liŋ.

³³ Ama a kokwe ga ’yi ta ga ’yu anyen lepeŋ lo tumatyan ko ta, köti anyen ta koŋdya löti lonyit lo rigwo, a kirut kine ŋo liŋ mo ’yalakine ta.

³⁴ Nyenagon ko wiwinya ta i kulya ti kotumalu, kogwon kotumalu mo wiwinya kulya kanyit. A kulya narok ti lor juki i ŋilu lor.