Matayo 5 - Bibilia Buk na Ŋun nagon koti luŋu a

Yesu a suluja todiŋdyö i mere ki

¹ A Yesu ko meddi ŋutu jore parik, a nye iti i mere ki. A nye si ’dakine kak, a ŋutu kanyit kajujumuk iti kanyit yu.

Ko ŋa logon a kalyöŋök

² A nye suluje todiŋdyö se adi,

³ ŋutu logon a lomerika i töilyet kilo a kalyöŋök; kogwon Tumatyan na Ki a nase.

⁴ ŋutu logon dedelya kilo a kalyöŋök; kogwon se mo susuka.

⁵ ŋutu logon a lokoyokak kilo a kalyoŋok; kogwon kak liŋ mo gwon a nase.

⁶ ŋutu logon ko magor ko a mokakure i koŋdya na torigwo kilo akalyöŋök; kogwon se mo yiyimöno.

⁷ ŋutu logon wowon konyen ko ŋutu kilo a kalyöŋök; kogwon se mo woworikin konyen.

⁸ ŋutu logon a loke i töilyet kilo a kalyöŋök; kögwon se mo memet Ŋun.

⁹ ŋutu logon tomor a kulye ŋutu anyen gwon ko taliŋ kilo a kalyöŋök; kogwon Ŋun mo luŋ se a ŋwajik kanyit.

¹⁰ ŋutu logon a sasanya kogwon löti lo rigwo kilo a kalyöŋök; kogwon Tumatyan na Ki a nase.

¹¹ Ta a kalyöŋök ko ŋutu momoröju ta, ko a sasaŋdi ta, ko a ŋökiŋdye ta kulya narok liŋ ka ’de ka ’de kogwon kulya kwe.

¹² ŋutu köju a sasaŋdu nebijin sona logon kasu ŋerot kulu i ŋilo kiko lo geleŋ ŋilo. Nyena lyöŋi ta lyöŋön ko nyolani ta nyola parik, kogwon ropet duma nasu a ’delaki ta ki yu.

Lilim lo ’balaŋ se ko lo parara

¹³ Ta a ’balaŋ na na kak. Ama ko ’balaŋ a wora pötö nye bubulö to ’busa ada? A nye köti gwe ’bak ’bulit ama a gubajine kaŋo i ryoryoka ko mok.

¹⁴ Ta kilo a parara na na kak. Köji nagon a ’duköki i mere loki na ti bulö ’dela.

¹⁵ Lele ŋuto ’bayin logon mokakiŋdya lombo a muke muk ko kupö, ama nye togwi ’dikin ki, anyen pararakiŋdya i ŋutu liŋ lo gwon kadi kilo.

¹⁶ Nyena ti parara nasu kobbi kobbu sona ko ŋutu i komor, anyen na meddi lepeŋat ŋo na ’but na kon ta kine nu, a se böŋö pupurje Monye losu lo gwon ki lu.

Yesu todiŋdyö kulya ti Saresi ti Mose

¹⁷ Ko yeyeju ta adi nan aje po i tu ’baka ’yu na Saresi ti Mose se ko ŋo na wur nebijin kune; nan a ko po i tu ’baka ’yu na se ama i tutuŋokiŋdyö na se.

¹⁸ ’Diri nan takiŋdya ta adi, tojo ko ki se ko kak a likin, ma ’di leta geleŋ na ’dit kode kotet na leta mo ti likin i Saresi tojo ko kine ŋo liŋ aje kona.

¹⁹ Nyenagon ko ŋuto logon a köŋu ma ’di saret lo ’dit i kilo saresi, todinikiŋdye kulye ŋutu anyen koŋdya sona, lepeŋ mo luŋu a lo ’dit i Tumatyan na Ki; ama ko ŋuto ’de ’dep Saresi, a todinikiŋdye kulye ŋutu anyen ’de ’dep, ŋilo ŋuto mo luŋu a duma i Tumatyan na Ki.

²⁰ Kogwon nan kulya ko ta adi, ko löti losu lo rigwo a ko lwöŋ lo katodinok ti Saresi ti Mose se ko lo Parusijin, a ta mo tine lupö i Tumatyan na Ki.

Yesu todiŋdyö kulya ti woran

²¹ Ta aje yiŋ adi ŋutu ti ’beron köju kulu a saraki adi, Do ködyö ti tatuja ŋuto; nyena ŋuto logon a tatuja lo ködyö jwe i ’duŋöki na putet.

²² kölumbö nan takiŋdya ta adi, ko ŋa lo woran ko luŋaser lonyit ködyö jwe i ’duŋöki na putet; a kö ŋa lo momoröju luŋaser lonyit, lepeŋ ködyö jwe i ’duŋöki na putet i teŋ na kaliliyak; a ko ŋa lo kulya adi, Do lu ’böŋ! lepeŋ ködyö joŋa i kimaŋ na Geena.

²³ Nyena kö dö wukiŋdya ’doket inot i pirit ’yuret na rubaŋgajin, a do yiyiuŋdye nyu adi do a konakiŋdya luŋösur arabat,

²⁴ kölöki ’doket inot nyu i komor na pirit ’yuret na rubaŋgajin. A kokwe iti i mora ko luŋösur, a do kirut yitwene bot i wukiŋdya na ’doket inot.

²⁵ Jeteŋdi tojulin ’de ’de ko miriku ilot na tiri ta i kiko ko lepeŋ i putet nu, an lepeŋ ko ŋutu kin do ko ka ’duŋönit lo putet i könin, a ka ’duŋönit tiŋdi do ko katiyunit i könin, a do tikine i kadi rereket.

²⁶ ’Diri nan takiŋdya do adi, do mo ti kölwe kwöŋ tojo ko do a roŋ taripatat na ’dutet.

Yesu todiŋdyö kulya ti lubbo

²⁷ Ta aje yiŋ adi köju a saraki adi, Do ködyö ti lubbö.

²⁸ Kölumbö nan takiŋdya ta adi, I ŋutu liŋ geleŋ geleŋ, ŋuto logon a be ’ya ŋuto nakwan lo ’diri aje luŋ lepeŋ kanyit i töili.

²⁹ A ko koŋe ilot lutaten lo lokuŋdya do i toroŋdya, wuluddu nye kaŋo ko gubara nye mu ’diŋ; bia a na ’but ko do tolikiŋdyö lele swöt ilot lo mugun lwölwöŋ do gubaji i Geena ko mugun inot ’bukuluŋ.

³⁰ A ko könin ilot lutaten lo lokuŋdya do i toroŋdya, ’duŋu nye kaŋo ko gubara nye mu ’diŋ; bia a na ’but ko do tolikiŋdyö lele swöt ilot lo mugun Iwolwöŋ do gubaji i Geena ko mugun inot ’bukuluŋ.

Yesu todiŋdyö kulya ti yaŋdu

³¹ Köti köju a saraki adi, Ŋuto logon yaŋdu nakwan nanyit lo, ti lepeŋ ködyö tiki nakwan waraga yanyet.

³² Kölumbö nan takiŋdya ta adi, I ŋutu liŋ geleŋ geleŋ ŋuto logon yaŋdu nakwan nanyit ake yaŋdu ko a rye i lupö, a nye tiŋdi lepeŋ wora a kalupe, a ko ŋa lo yemba ŋuto nagon aje yanya na köti a luŋ lepeŋ.

Yesu todiŋdyö kulya ti ’beleŋgu na milyejin

³³ Köti ta aje yiŋ adi ŋutu ti ’beron köju kulu a saraki adi, Do ködyö ti ’beleŋgu milye ilot, ama ŋo nagon do a milyekin MATAT kune do agu ködyö kökon.

³⁴ Kölumbö nan takiŋdya ta adi, ta ti milyeju kwöŋ, kode i ’diŋdya na ki, kogwon nye a si ’daet na Ŋun,

³⁵ kode i ’diŋdya na kak, kogwon nye a tökit nanyit na mokosi, kode i ’diŋdya na Yerusalema, kogwon nye a köji nanyit na Mor duma;

³⁶ köti ko milyeju i ’diŋdya na kwe inot, kogwon do ti bulö löpuggö lele kupiret ilot geleŋ a lokwe kode a lurwö.

³⁷ a ko ruket inot gwon a Ee, a ti nye gwe a Ee, ama ko gwon a ’Bayin, a ti nye gwe a ’Bayin. Kulyaesi logon a lwöŋgu kilo po ko ŋilo Loron.

Yesu todiŋdyö adi ti loto gwe ti ropakiŋdya toron

³⁸ Ta aje yiŋ adi koju a saraki adi, Koŋe ropa ko koŋe, a kele ropani ko kele.

³⁹ Kölumbö nan takiŋdya ta adi, Do ködyö ti mörö ko ŋuto logon konakiŋdya do arabat. A ko lele ŋuto a naŋgu do i ŋebi lutaten, löpuköki lepeŋ lo kadoŋe lo köti anyen nanaŋa.

⁴⁰ a kö lele ŋuto ’dek joŋga do i putet yöŋö ’dumaddu jölobiya inot, ti lepeŋ köti ’dumaddi boŋgo inot muit na.

⁴¹ A ko lele ŋuto a ri ’diaddu do i tu maili geleŋ, a ti do moraddi ko lepeŋ mailijin murek.

⁴² Tiŋdi ŋuto logon a mo ’yu ŋo konut, an do ko renyakiŋdya ŋuto logon yöŋo kuŋö ŋo konut.

Nyare nyar merok kulök

⁴³ Ta aje yiŋ adi köju a saraki adi, Do ködyö nyanyar marate ilot a do maŋdi miriku ilot.

⁴⁴ Kölumbö nan takiŋdya ta adi, Nyare ta nyar merok kasu, ko momo ’yi ta Ŋun kogwon kulya ti ŋutu lo sasaŋdu ta kilo,

⁴⁵ anyen ta böŋo gwon a ŋwajik ti Monye losu lo gwon ki lu, logon tiŋdu kolor nanyit i nyerakin i ŋutu lo ’but ko lorok, ko a sunyuŋdye kudu i ŋutu lo yiyiniki ko logon ti yiniki.

⁴⁶ a ko ta nyaŋu ŋutu logon nyanyar ta kilo, a ta wuji nan ropet? Kapepenak ti usur ti koŋdya sona le?

⁴⁷ a ko ta roman ko luŋösurök ka ’de, a ta Iwoŋgi kulye ŋutu ko nyo? Paganojin köti ti koŋdya sona le?

⁴⁸ Nyenagon ta ködyö gwon a lo ’but i ŋo liŋ, gwoso na gwoŋdi Monye losu lo ki a lo ’but i ŋo liŋ na.