Matayo 4 - Bibilia Buk na Ŋun nagon koti luŋu a

Satani a temba Yesu

¹ Nyena a Mulokötyo Loke nyömöddi Yesu i yöbu nagon ŋutu ’bayin kata anyen kaŋöönit temba lepeŋ.

² A Yesu miŋdye miŋdya perok merya iŋwan, a i mukök a nye gwe ko magor.

³ A katemanit lo poŋdi, a kulyani ko lepeŋ adi, Ko do a Ŋuro lo Ŋun taki kilo ŋurupö anyen wora a ambatajin.

⁴ Ama a nye waddi adi, A wurö adi, ŋutu ti gwolor kogwon kinyo ka ’de, ama gwolor ko kulyaesi liŋ logon lupe kaŋo ko Ŋun i kutuk,

⁵ A ŋilo kaŋöönit joŋgi lepeŋ i köji nake, a togwi ’dikiŋdye lepeŋ i lotek lo Kadi na Ŋun,

⁶ a kulyani ko lepeŋ adi, Ko do a ŋuro lo Ŋun, gubara mugun kak; kogwon a wurö adi, Ŋun de saŋu malaikajin kanyit i kulya kunök. Köti adi, Se de ’de ’dep do ko könisi kase, an do ko julökin moköt ilot i ŋurupit.

⁷ A Yesu waddi lepeŋ adi, A wuro koti adi, Do ködyö ti möŋu MATAT Ŋun ilot.

⁸ A kaŋöönit köti joŋgi lepeŋ i inere lojo parik, a kwekiŋdye lepeŋ tumatya-njin liŋ ti kak, se ko minyo lose;

⁹ kulya adi, Nan de titikin do kine ŋo liŋ ko do a dulaki kak i twoju na nan.

¹⁰ A Yesu kulyani ko lepeŋ adi, Iŋgo, Satani! kogwon a wurö adi, Do ködyö kugga MATAT Ŋun ilot a kitakiŋdye lepeŋ ka ’de.

¹¹ A kirut kaŋilonit kö ’yi lepeŋ, a malaikajin lo poŋdi a kitakiŋdye lepeŋ.

Yesu a suluja kita nanyit Galilaya

¹² A Yesu ko yiŋge adi Yoane aje moka nu, a nye kö ’yi ŋinu pirit a iti Galilaya.

¹³ A nye kö ’yi Najareta, a iti tu a si ’dani Kaperanauma nyona ko tor na Galilaya, i kak na Jebulun ko na Napatali,

¹⁴ anyen kine kulya ködyö kokona gwoso na jambi nebi Yisaya köju nu adi,

¹⁵ Jur lo Jebulun se ko lo Napatali, kiko lo tiri tör duma na ’balaŋ inu pele na Yardene, Galilaya na ŋutu ti juron ka ’de ka ’de—

¹⁶ ŋutu lo si ’da i mudwe kilo a meddya parara duma, se lo si ’da i jur logon twan gwon kata kilo parara a pukökin kase.

¹⁷ Suluja i ŋinu diŋit a Yesu suluje tokujö adi, Löpuŋge ta töilyet, kogwon Tumatyan na Ki aje yepuŋdya.

Yesu a luggu kalokak iŋwan ti somot

¹⁸ A na wöröjine Yesu i kijit na tor na Galilaya nu, a nye meddi luŋasirik murek, Simona logon luou a Petero, se ko Aŋöarea luŋaser lonyit, gubaddu ku ’yi i tör, kogwon se a ŋutu kalokak ti somot.

¹⁹ A nye kulyani ko lepeŋat adi, Kipuŋdye ta nan, a nan mo tiŋdi ta i jikuŋdyö na ŋutu köyö ni gwoso ŋutu logon jikuŋdyö somot ko ku ’yi.

²⁰ a lepeŋat kö ’yi ku ’yilan kase adi wulek, a kepoddi lepeŋ.

²¹ A na tirikin ŋeröt nu, a nye köti meddi kulye ŋutu murek logon a luŋasirik, Yakobo ŋuro lo Jebedayo se ko Yoane luŋaser lonyit, gwon i ki ’bo kata i pirit na geleŋ ko Jebedayo monye lose ririgga ku ’yilan kase. A nye luŋgi lepeŋat?

²² A de ’de se kölökiŋdye ki ’bo se ko monye lose, a se kepoddi lepeŋ.

Yesu a kitakiŋdya ŋutu jore parik

²³ A Yesu wöröni i Galilaya liŋ, totodinöddu kase i kadijik momoresi, ko totokuöddu Loŋe Lo ’but lo Tumatyan, ko totokeladdu ŋutu i twana liŋ ka ’de ka ’de ko i gilösi liŋ,

²⁴ a lore i kulya ti lepeŋ kuörö i jur lo Suria ’bukuluŋ, nyena a ŋutu joŋdi ŋutu kase kanyit ni logon ŋoŋoŋga ko twana ka ’de ka ’de, ko logon totomie ko gilosi ka ’de ka ’de, ko logon a moka ko mulökö, ko lo gwon ko lomerya, se ko se logon a babatatu mugunya kase a twatwa, a nye iŋge toke se.

²⁵ a ŋutu jore parik kepoddi lepeŋ. Kilo ŋutu po Galilaya, ko Dekapoli, ko Yerusalema, ko Yudaya, ko i nu pele na Yardene.