Matayo 21 - Bibilia Buk na Ŋun nagon koti luŋu a

Yesu a lupö Yerusalema ko todumalan

¹ A nagon se gwe nyona ko ’durökin Yerusalema nu, a se poŋdi Betepage, a ’dure i Mere lo Jeitun, a Yesu ’deke soŋdu ŋutu kanyit kajujumuk murek ŋerot,

² a yökije se adi, Iti ta i tur lo gwon kasu ŋerot lu, a ’de ’de ta de ryeji kaine a munuki kak, se ko kolojityo; yokone ta se ko jo ta se köyö ni.

³ A ko lele ŋuto a kulya ko ta ko nene ŋo, ruŋge ta adi, nan MATAT ’de ’dekan se, a ŋilo ŋuto de rukökiŋdye ta ’de ’de i joŋdya.

⁴ Kine kulya pokin anyen ŋo na jam nebi köju kunu kokona, adi,

⁵ Taki ta köji na Siöna adi, Mete ta, Mor losu ŋilo popo kasu ni, a lokoyok i si ’da ’e i kaine, i kolojityo tore lo kaine.

⁶ Nyena a ŋutu kajujumuk kulo iti tu, a koŋdi gwoso na sarakiŋdye Yesu se nu.

⁷ A se joŋdi kaine se ko kolojityo, a se peddi boŋgwat kase i loki na lepeŋat, a Yesu si ’dakine kata.

⁸ A ŋutu jore parik peddi boŋgwat kase i kiko, a kulye tutukuŋdye kenia ti kaden, a peddi se i kiko.

⁹ A ŋutu jore logon tu kanyit ŋerot, se ko se lo kipuŋdyö lepeŋ kulo woŋe parik adi, ösana i Ŋuro lo Dawidi! Ŋuto lo po i karin ti MATAT lo, ti ’boriani ’boria! ösana i piritön ti ki yu!

¹⁰ A Yesu ko tulöddi Yerusalema, a ŋutu liŋ ti köji dyadyaŋgi dyadyaŋgu. A se pije adi, Ŋilö a ŋa?

¹¹ A ŋutu kulo waddi adi, Ŋilo a nebi Yesu lo po Najareta na Galilaya.

Yesu a toke ’ya Kadi na Ŋun

¹² A Yesu lupöni i Kadi na Ŋun, a riŋge ŋutu liŋ kaŋo logon tugwöŋu ko logon gwögwörö i Kadi na Ŋun lukata; a nye sösöpuŋge misajin ti ŋutu lo löpuggö gurut se ko si ’daesi ti katugwörök ti gureki.

¹³ a nye kulyani ko se adi, A wurö adi, Kadi nio mo luŋu a kadi kwakwaset; ama ta aje kon nye a pirit ’danaet na karyakak.

¹⁴ A ŋutu mo ’dokeno se ko ŋodeki poŋdi ko lepeŋ ni i Kadi na Ŋun, a nye toke ’yi se.

¹⁵ a kiŋanejin temejik se ko katodinök ti Saresi ti Mose iŋge woran na meddi se lepeŋ i koŋdya na ŋo sörösi, ko na meddi se ŋwajik i woŋoro ki i Kadi na Ŋun adi, ösana i Ŋuro lo Dawidi!

¹⁶ A se pije lepeŋ adi, Do a yiŋ ko kilo ŋwajik kulya adi nyo? A Yesu waddi se adi, lye, nan a yiŋ; ta kwöŋ a ko keŋdya le adi, Ŋun a tiŋdu pupuresi na ’but bia parik i kutusen ti ŋwajik lo ’di ’dik ko i kutusen ti lupudiet lo nönöggu?

¹⁷ A nye kö ’yi se, a iti kaŋo köji kata a iti Betania, a dotoni nyu.

Ki ’bi a lömo

¹⁸ A i ko ’bure, na yitwene Yesu bot i köji nu, a nye gwe ko magor.

¹⁹ A nye meddi ki ’bi i merete lo kiko, a iti nyin, a nye gwe a ko ryö nene ŋo kata ama ka ’de koropo. A nye kulyani ko ŋilu ki ’bi adi, Ti do gwe ti radan ludweki köti kwöŋ! A ’de ’de ki ’bi lo teteyone teteyon.

²⁰ a na meddi ŋutu kajujumuk nu, a se söŋi söŋu, a totopine ko ’börik adi, Lo ki ’bi teteyon ’de ’de sona ada?

²¹ A Yesu waddi lepeŋat adi, ’Diri nan takiŋdya ta adi ko ta gwon ko yupet a tine dyadya ’yu, a ta mo bulöni bulö koŋdya ŋo nagon aje konaki ŋilu ki ’bi na, ama bia parik ko ta kulya ko lo mere adi, Gwunyu mugun kaŋo ko gubara mugun i tör, a kine ŋo mo konani kona.

²² Ko ta gwon ko yupet ta mo wuwu ŋo liŋ nagon ta a piyun i kwakwaddu nasu kine.

Yesu a piya adi nye koŋdya kine ŋoko kido niŋa

²³ A Yesu lupöni i Kadi na Ŋun, a na todiŋdye nye nu, a koanejin temejik se ko ŋutu temejik ti jur poŋdi ko lepeŋ ni, a se pije lepeŋ adi, Do ryö kido ya nagon do koŋdi kine ŋo? Ŋa lo tiŋdu do kido anyen koŋdi se?

²⁴ a Yesu waddi lepeŋat adi, Nan köti gwon ko piyet nagon nan pije ta; ko ta a nyoŋ nan, a nan de takiŋdye ta ko nan koŋdya kine ŋo ko nan riŋit.

²⁵ Ŋiŋa batisimo nagon Yoane babatiddye na po ya? Po ki kode po ko ŋutu? Ama a lepeŋat rerenyani ko ’börik adi, Koyi de ruggö adi, Ŋina batisimo po ki, a nye de pije yi adi, Ko sona, nyo ta ti yuŋ Yoane?

²⁶ Ama koyi de ruggö adi, Ŋina batisimö po ko ŋutu, yi kukujönö ŋutu, kogwon ŋutu liŋ a yuŋ adi Yoane a nebi.

²⁷ A kirut a lepeŋat renyakiŋdye Yesu adi, Yi ti den. A nye kulyani ko se adi, A ma ’di nan lo köti tine tukökin ta kö nan köŋdya kine ŋö ko kido niŋa.

Lilim lo ŋwajik murek

²⁸ Nyena ta yeyeju nyo? Lele ŋuto gwon ko ŋwajik lyan murek. A nye iti ko ŋuro kayu yu, a kulyani adi, Ŋuro liŋ, iti i kita i lo lor i luköbi na kaden ti binyo.

²⁹ a ŋuro lo renyani adi, Nan ti ’bön. Ama i mukök a nye löpuŋge yeyeesi kanyit, a iti tu.

³⁰ a ŋuto lo iti ko loponi lo yu, a kulyani gwoso na dika na. A loponi lo ruŋge adi, Nan tutu pon baba. Ama a tine ko tu.

³¹ I kilo ŋwajik murek lon logon aje koŋdya ŋo nagon monye ’de ’dekan? A se waddi adi, Ŋuro kayu lo logon aje koŋdya. A Yesu kulyani ko se adi, ’Diri nan takiŋdya ta adi, Kapepenak ti usur se ko kalupejin lupö i Tumatyan na Ŋun kasu ŋerot.

³² Kogwon Yoane aje po i kwekiŋdya na ta na gwiliŋit lo rigwo ko ta ködyö gwolor ada, a ta tine ’bön yubbö lepeŋ; ama a kölumbö kapepenak ti usur se ko kalupejin iŋge yuŋ lepeŋ. Ma ’di ködyö ta aje met kine kulya, a i mukök a ta tine löpuggö töilyet anyen yuyuŋ lepeŋ.

Lilim lo kakuruk ti luköbi na binyo

³³ Yiŋge ta lele lilim malo. Monye kak kata logon a ’yuddu kaden ti binyo i luköbi, a rikije rikija ko mariŋ, a ’boggi dili ryoket na ludweki ti binyo i lukata nanyit, a tetenakiŋdye taka, a nye sarakiŋdye ko kulye kakuruk i könisi, a nye iti i lele jur.

³⁴ a diŋit na ’butun ko gwe nyona, a nye soŋdi kölipönök kanyit ko kakuruk yu anyen jakiŋdya nye ludweki.

³⁵ a kakuruk kulo morgi kölipönök kanyit, a ’biddye lele, a tatuje lele, a gugubuje lele ko ŋurupö.

³⁶ Köti a nye soŋdi kulye kölipönök lwölwöŋ ti kokwe kulu, a se köti konakiŋdye lepeŋat jojo.

³⁷ a i mukök a nye soŋdi ŋuro lonyit ko lepeŋat yu, kulya adi, Lepeŋat ŋona de twötwö ŋuro liŋ.

³⁸ Ama a kakuruk kulo ko meddi ŋuro, a se tokulyaki ko ’börik adi, Malo ŋuto logon mo ruddya luköbi na monye lo. Po ta, ti yi tatune ta tatu lepeŋ, anyen joŋga na luköbi a nikaŋ.

³⁹ A se morgi lepeŋ, a gubaddi lepeŋ kaŋo i luköbi na kaden ti binyo, a tatuje lepeŋ.

⁴⁰ Nyena ko monye luköbi na kaden ti binyo a po, lepeŋ mo konakin kilo kakuruk nyo?

⁴¹ A se waddi adi. Lepeŋ mo tatatu kilo ŋutu lorok ko twan naron, a mo sarakiŋdye ŋinu luköbi ko kulye kakuruk logon mo tiŋdu nye ludweki i diŋitan kase.

⁴² A Yesu pije lepeŋat adi, Ta ŋona a ko ken kulya ti Ŋun na wurö kune le? Adi: Ŋurupit logon ka ’dukök a renya lo aje wora a ŋurupit tutuŋet lo goŋet lo kadi. Ŋina ŋo MATAT lo kita a yi mete a ŋo sörit!

⁴³ Nyenagon nan takiŋdya ta adi, Tumatyan na Ŋun mo ’du ’dumaji kaŋo kasu, a mo tikine i jur logon ŋutu kanyit raradan ludweki kanyit. [

⁴⁴ Ŋutu liŋ logon a ’doro i ŋilo ŋurupit kulo mo giginya ka ’de ka ’de, ama ŋuto logon ŋilo ŋurupit a muju lepeŋ lo mo pasakani pasaka.]

⁴⁵ A kiŋanejin temejik se ko Parusijin ko yiŋge lilimön kanyit, a se iŋge kurun adi nye jambu kilo lilimön i kulya kase.

⁴⁶ Nyena a se ga ’yi kiko logon morgi Yesu, ama a se kujönöni lodir lo ŋutu, kogwon ŋutu kulo a yuŋ adi lepeŋ logon a nebi.