Matayo 12 - Bibilia Buk na Ŋun nagon koti luŋu a

Parusijin a pija Yesu i kulya ti Sabata

¹ A i ŋinu diŋit i lor lo Sabata a yesu lwöŋöddi i meleseno ti ’bolot; a ŋutu kanyit kajujumuk gwe ko magor, a se suluje ri ’ya kusik ti ’bolot a nyesi nyesu.

² Ama a na meddi Parusijin kine ŋo nu, a se kulyani ko lepeŋ adi, Meddi, Ŋutu kulok kajujumuk koŋdya ŋo nagon saresi a ko ruk nagon kodyö ti kona i lor lo Sabata.

³ A nye pije lepeŋat adi, Ta a ko ken ŋo nagon Dawidi koju a kon i diŋit nagon lepeŋ se ko ŋutu kanyit gwon ko magor le?

⁴ Lepeŋ koju a lupö i Kadi na Ŋun, a nye nyesi ambata na peta ko Ŋun i komor, nagon saret a ko ruk lepeŋ i nyesu kode ŋutu lo gwon ko lepeŋ kulo, ama tuŋ kiŋanejin lo ruköki i nyesu.

⁵ Kode ta ŋona a ko ken i Saresi ti Mose le? Adi, i lor lo Sabata kiŋanejin lo kita i Kadi na Ŋun kulo kokoŋu Sabata, ama se a ko lyaŋan.

⁶ Nan takiŋdya ta adi ŋo duma kata ni nagon Iwolwöŋ Kadi na Ŋun.

⁷ A ko ta kodyö deden ko kilo kulyaesi kweja nyo adi. Ŋun ’de ’dekan won na konyen, ti gwon i tiŋdu na rubaŋgajin, a ta kodyö tine ’duŋökiŋdyö ŋutu lo ’bak kulya arabat.

⁸ Kogwon nan Ŋuro lo ŋuto a matat lo Sabata.

Ŋuto logon konin a lokworok

⁹ A Yesu iti ŋerot nyu a luponi kase i kadi momoret.

¹⁰ Nyena mete, a lele ŋuto gwe nyu logon könin a lokworok. A kulye ŋutu pije Yesu adi, Saret a ruk adi ŋona a na ’but i toke ’ya na ŋuto i lor lo Sabata le? Lepeŋat pija sona anyen se bubulo ryeju toron nagon adi lepeŋ a kon.

¹¹ A nye pije lepeŋat adi, Lon ŋuto losu logon gwon ko kobilityo geleŋ, a ko kodyö ŋina kobilityo a ’doro i dili i lor lo Sabata, nye ŋona ti mok nye a pikuŋdye nye kaŋo le?

¹² Nyena ŋuto gwon ko ’bulit a duma bia parik lwolwoŋ kobilityo! Nyena saret a ruk adi ti ŋo na ’but konani kona i lor lo Sabata.

¹³ Nyena a nye takiŋdye ŋuto lo adi, Rioro konin ilot. A ŋuto lo riöddi riöddu a konin lo lepeŋ gwe a lo ’but gwoso lele lo.

¹⁴ Ama a Parusijin lupuŋdye kaŋo i kadi momoret a teteŋdi yeyeet nagon mwönyörikin Yesu, ko lepeŋ tatua ada.

Koliponit logon ŋun a wulun

¹⁵ A Yesu iŋge den, a nye kö ’yi ŋinu pirit. A ŋutu jore kepoddi lepeŋ, a nye toke ’yi se liŋ,

¹⁶ a nye kukuji se adi, an se ködyö tin nye i dena.

¹⁷ Anyen kulya na jam MATAT ko nebi Yisaya i kutuk koju kunu ködyö kokona adi,

¹⁸ Malo koliponit liŋ logon nan a wulun, lo nyanyara liŋ logon toili liŋ a lyoŋgi lo. Nan mo tiŋdu Mulökötyo liŋ ko lepeŋ i mugun, a nye mo laikiŋdye ’duŋgö na rigwo i juron;

¹⁹ a nye mo tine rerenya a tine woŋon; a lele ŋuto mo tine yiŋ gworo lonyit i kikolin.

²⁰ A nye mo tine ’beleŋgu pa ’duŋi logon a ryoka, a mo tine tatuja kimaŋ i pata na lombo nagon nyore kana, tojo ko nye aje sonyoro ’duŋgo na rigwo i te ’ya.

²¹ A juron mo yeŋdi karin kanyit.

Yesu a Ŋoki adi lepeŋ gwon ko mulökötyo loron logon a Belejebula

²² A kulye ŋutu joŋdi ŋuto ko Yesu ni. Ŋilo ŋuto gwon ko mulökötyo loron logon tiŋdu lepeŋ gwon a mo ’doke ko a mumut, a Yesu toke ’yi lepeŋ. Nyena a ŋuto logon a mumut lo jambi jambu, a meddi meddya.

²³ A ŋutu liŋ soŋi soŋu, a totopine ko ’borik adi, Ŋilo ŋuto ŋona a Ŋuro lo Dawidi le?

²⁴ Ama a na yiŋge Parusijin nu, a se kulyani adi, Lo ŋuto rikoddu muloko lorok kaŋo tuŋ ko riŋit na Belejebula duma lo muloko lorok.

²⁵ a nye ko dene yeyeesi kase. a kulyani ko lepeŋat adi, Tumatyanjin liŋ nagon a koŋa ’borik kine kokoŋu, a ko nene köji kode nene mede a koŋa mugun a nye mo tine yeŋon.

²⁶ A ko Satani rikoddu Satani kaŋo, Satani a koŋa mugun; a tumatyan nanyit gwo ’de ada?

²⁷ A ko nan rikoddu muloko lorok ko riŋit na Belejebula, a ŋutu kasu rikörö se kaŋo ko riŋit niŋa? Nyenagon a se mo lo lilije kulya kasu.

²⁸ Ama ko nan kita ko Mulökötyo lo Ŋun anyen rikoddu muloko lorok kaŋo, nyena dene ta den adi Tumatyan na Ŋun ’diri aje yepuŋdya kasu.

²⁹ Kode köti ŋuto bubulö lupö ada ko ŋuto lo riŋit kadi i ryaggu na tito kanyit? A kokwe kiyaŋ lepeŋ totor ŋuto lo riŋit lo, a kirut a nye ’diri bulöni bulo ryaggu kadi nanyit.

³⁰ Nye logön ti gwon köyö i swöt lo mömörö ko nan, a nye logon tine pepeŋdya ko nan i pirit na geleŋ lo totorekiŋdya.

³¹ Nyenagon nan takiŋdya ta adi, ŋutu mo pipitöki i toronjin liŋ se ko laesi liŋ nagon se a lauŋdye Ŋun kine, ama ŋuto logon lauŋdya Mulökötyo Loke lo mo ti pitöki.

³² Ko ŋa lo jambu kulya kwe ti Ŋuro lo ŋuto arabat mo pipitöki; ama ko ŋa lo jambu kulya ti Mulökötyo Loke arabat mo ti pitöki ma ’di i na diŋit kode i diŋit na popo.

Ködini dena i ludweki kanyit

³³ Ludweki lo ’but agu rye i ködini lö ’but, a ludweki lorok agu ryeni i ködini loron, kogwon ködini a dena i ludweki kanyit.

³⁴ Ta torela ti munuö! Ta bubulö jambu kulya na ’but ada a ta ko ’börik a lorok? Kogwon kulya jore na gwon ko ŋuto i töili kune pupukun kaŋo kanyit i kutuk.

³⁵ Ŋuto lo ’but topukuŋdyö kaŋo ŋo na ’but i kulya na ’but nagon a ’dela kanyit i töili kune, köti ŋuto loron topukuŋdyö kaŋö ŋö narok i kulya narok nagon a ’dela kanyit i töili kune.

³⁶ Nan takiŋdya ta adi, kulyaesi liŋ logon ŋutu jajam a wuya kilo mo piyarikin lepeŋat i lor ’duŋet lo putet.

³⁷ Kogwon kulyaesi kulök mo lo tiŋdu do kurwe a loke, a kulyaesi kulök mo lo tiŋdi do ’duŋöki arabat.

Ŋutu ’de ’dekan meddya kweyesi

³⁸ A kulye katodinok ti Saresi ti Mose se ko Parusijin kulyani ko Yesu adi, Katodinönit, yi ’dek metuŋdya kweyet konut.

³⁹ Ama a nye waddi lepeŋat adi, Toberon na ŋutu lorok logon a paju Ŋun kulo gaga ’yu kweyet. ama kweyet mo ti kweki lepeŋat, ka ’de kweyet na nebi Yona.

⁴⁰ Kogwon gwoso na gwoŋdi Yona ko sumuti i pele perok musala, ko tuparan ko tukwaje nu, a nan Ŋuro lo ŋuto köti mo nukakine kak a gwe nyu perok musala ko tuparan ko tukwaje.

⁴¹ Ŋutu ti Ninewe mo ŋiŋien ki i lor ’duŋet lo putet lo ŋutu ti na toberon, a mo ’duŋöki kulya kase arabat, kogwon se löpuggö töilyet kase ko tokujo na Yona; nyena mete ta, ŋo duma kokona ni nagon lwölwöŋ Yona.

⁴² Mor na swot lo Loki mo ŋiŋien ki i lor ’duŋet lo putet lo ŋutu ti na toberon, a mo ’duŋöki kulya kase arabat; kogwon nye köju a po i ’dutet na kak i yiŋga na koŋon na Solomona; nyena mete ta, ŋo duma kata ni nagon lwölwöŋ Solomona.

Yitwe na mulökötyo loron ko ŋuto i töili

⁴³ A nagon mulökotyo loron aje po kaŋo ko ŋuto i mugun nu, a worojine i piriton nagon ’bak pioŋ gaga ’yu yukan, ama a nye tine ryö pirit.

⁴⁴ a nye kulyani adi, Nan de yiyitwe köyö i mede nagon nan po kata nu. A nye ko ’dure, a nye ryeji nu kadi gwon kana, a reya a nake, ko a kukuna ’bura.

⁴⁵ Nyena a nye iti tu, a joŋdi kulye mulöko lorok buryo logon lwölwöŋ nye, a se liŋ luponi lukata a si ’dani nyu, a gwiliŋit lo ŋilo ŋuto i ’dutet worani a loron parik Iwolwöŋ lo kokwe lu. Köti a mo poki sona i na toberon na ŋutu lorok.

Ŋote Yesu se ko luŋasirik ti Yesu a po

⁴⁶ A nagon Yesu nyuŋ kukulya ko ŋutu nu, mete, a ŋote se ko luŋasirik kanyit gwo ’de kaŋo, ’de ’dekan jambu ko lepeŋ.

⁴⁷ A lele ŋuto kulyani ko lepeŋ adi, Meddi, ŋuti ko luŋösurök kulu gwo ’dan kaŋo ’dek jambu ko do.

⁴⁸ Ama a Yesu pije ŋuto lo takiŋdya lepeŋ lo adi, Ŋa nagon a yaŋgo? Ko ŋa logon a luŋasirik kwe?

⁴⁹ a Yesu yuddye ŋutu kanyit kajujumuk kulo, a kulyani adi, Kulo ŋutu a yaŋgo ko a luŋasirik kwe!

⁵⁰ Kogwon ŋuto logon kökon ŋo nagon Baba lo gwon ki lu ’de ’dekan na, nye lo gwon a luŋaser liŋ, ko a kiaser nio, ko a yaŋgo.