Matayo 10 - Bibilia Buk na Ŋun nagon koti luŋu a

Luyökie puök wot murek

¹ A Yesu lupundye ŋutu kanyit kajujumuk puök wot murek kulo kanyit ni, a tiŋdi se kido anyen riŋge muloko lorok kaŋo, ko anyen toke ’yi twana liŋ ka ’de ka ’de se ko gilosi liŋ.

² Kune a karin ti luyökie puek wot murek: lo kokwe a Simona lo luŋu a Petero, ko Apöalea luŋaser lonyit; ko Yakobo ŋuro lo Jebedayo, ko Yoane luŋaser lonyit;

³ ko Pilipo, ko Bartolomayo; ko Toma, ko Matayo kapepenanit lo usur; ko Yakobo ŋuro lo Alapayo, ko Tadayo;

⁴ ko Simona Kawelonit, ko Yuda Isikariota lo tiŋdu lepeŋ i tatua lo.

Yesu a sonyoddu luyökie puök wot murek i tokuöddu

⁵ A Yesu soŋdi kulo ŋutu puök wot murek, a sarakiŋdye se adi, Ko tiri ta i kiko lo tu i jurön ti Lwaka, ko lupö ta i nene köji na ŋutu ti Samaria;

⁶ ama kölumbö iti ta i yidin ti kotumit na Yisaraele nagon a likin kunu.

⁷ Na tiri ta nu, tukoddi ta adi, Tumatyan na Ki aje yepuŋdya.

⁸ Tokele ta ŋutu lo gilö, toŋiyu ta ŋutu logon a twatwa, tokele ta ŋutu ti rimajin, rikörö ta mulöko lorok kaŋo. Ta a wu ’bak ropet, tiki ta ’bak ropet.

⁹ Ko joŋga ta ginejin, kode asarajin, kode taripajin kasu i likitiat ti goman,

¹⁰ ko joŋga ta jurakan i jölö nasu, kode jolobiyajin murek murek, kode kamuka, kode turya; kogwon kakitanit kodyö tiki kinyo lonyit.

¹¹ A ko ta a lupö i nan köji kode i lon tur, galu ta kaŋo ko ta ryöryö ŋuto logon a lo ’but, mönuŋdye ta ko lepeŋ yu tojo ta a ŋiörö.

¹² A na lupöri ta kadi nu, rome ta roman ko ŋutu ti ŋinu mede,

¹³ a ko ŋutu ti ŋinu mede a lo ’but, ti taliŋ nasu poki ko lepeŋat, ama ko se ’bayin a lo ’but, ti taliŋ nasu yitwene bot kasu ni.

¹⁴ A ko lele ŋuto mo ti ’bön wuju ta kode ti ’bön yiŋga kulyaesi kasu, ko ta ŋiörö ŋiörö i ŋinu mede kode i ŋinu köji, nanane ta kujöŋ na ryoryok ta ko mokosi kasu kine kaŋo.

¹⁵ ’Diri nan takiŋdya ta adi, i lor ’duŋet kulya ti jur lo Sodoma ko lo Gomora mo ’duŋöki pölilyö Iwolwöŋ ’duŋöki na kulya ti na köji.

Yöyöŋesi se ko sasanyesi popo

¹⁶ Mete ta, nan ŋilo soŋdu ta kaŋo gwoso köbilu i kiden na lujin. Nyena gwe ta a lokoŋ gwoso munuö, ko gwe ta gwoso gureki nagon ti konakiŋdya ŋutu arabat.

¹⁷ Meddi ta ’bura i kulya ti ŋutu; kogwon se mo momok ta a joŋgi ta i putet, a se mo ’biddye ta i kadijik kase momoresi ko kurubasi logon a kwara,

¹⁸ a ta mo dudukajine ko mödirön i komor ko i moran kogwon kulya kwe, anyen tokurukiŋdyö kine kulya kase i komor ko i Lwaka.

¹⁹ A na wukiŋdye lepeŋat ta nu, an ta ko wiwinya ta ko ta kulya ada kode ko ta jambu nyo, kogwon i ŋinu diŋit ta mo titiki ŋo nagon ta jajam.

²⁰ Kogwon mo ’bayin a ta lo jambu, ama Mulökötyo lo Monye losu lo jambu kasu i mugunya.

²¹ A luŋaser mo wukiŋdye luŋaser i tatua, a monye mo wukiŋdye ŋuro lonyit, a ŋwajik mo ŋiki i mörö ko monye lose ko ŋote nase, a tiŋdi lepeŋat i tatua.

²² A ŋutu liŋ mo mane man ta kogwon karin kwe; ama ŋuto logon a ŋoŋga tojo ko ’dutet lo mo lwölwökö.

²³ a na sasaŋdi se ta i nene köji nu, wöki ta i nene, kogwon ’diri nan takiŋdya ta adi ta mo ti tutuŋ köjinö liŋ ti Yisaraele a kokwe na poŋdi nan ŋuro lo ŋuto.

²⁴ Kajujumunit ti bulö lwöŋgu katodinönit lonyit, kode ’dupiet ti lwöŋ duma lonyit.

²⁵ Ködyö a na ’but ko kajujumunit gwon jojo gwoso katodinönit lonyit, köti a na ’but ko ’dupiet gwon gwoso duma lonyit. Ko ŋutu luŋgu monye mede a Belejebula, a se mo luŋgi ŋutu ti mede nanyit ko karin nagon a narok bia parik!

Ko ta ködyö kujönö ŋa

²⁶ Nyenagem ko kujönö ta lepeŋat. Kogwon nene ŋo ’bayin na mukö nagon mo ti kweya, a nene ŋo gwe ’bayin na ’dela nagon mo ti dena.

²⁷ Ŋo nagon nan tukökin ta i mudwe kine tuke ta i parara; ŋo nagon a moŋaki kasu i swo kine laŋe ta i loteko ti kadijik.

²⁸ Köti ko kujönö ta ŋutu logon tatuja kune mugunya ama ti bulö tatuja kodudwölön; kolumbö kujönöni ta ŋun logon bubulö tukaŋu ko ködudwö ko mugun i Geena.

²⁹ Liliitan murek ti gwörö ko milinte geleŋ le? Ama nene nase ti ’doro kak nagon Monye losu a ko den.

³⁰ Ama i kulya kasu kupir kasu liŋ ti kusik aje kena.

³¹ Nyenagon ko kujönö ta; ta gwon ko ’bulit lwölwoŋ liliitan jore.

Ŋuto logon ruggö adi nye a lo Kristo kode renya adi nye ’bayin a lonyit

³² Nyena ŋutu liŋ geleŋ geleŋ logon ruggo nan ko ŋutu i komor, nan köti mo ruruk lepeŋat ko Baba lo gwon ki lu i komor;

³³ ama ko ŋa lo renya nan ko ŋutu i komor, nan köti mo rerenya lepeŋ ko Baba lo gwon ki lu i komor.

Nan a ko joŋdya taliŋ ama kölumbö nan joŋdya baŋdu

³⁴ Ko yeyeju ta adi nan a po i joŋdya na taliŋ i kak ni; nan a ko po i joŋdya na taliŋ ama kölumbö baŋdu.

³⁵ Kogwon nan a po i tiŋdu na ŋuto i ŋisa ko monye lonyit, ko ŋuro nakwan i ŋisa ko ŋote, ko nakwan na tore i ŋisa ko moken;

³⁶ a merok ti monye mede gwe a ŋutu ti mede nanyit.

³⁷ Ŋuto lo nyaŋu monye kode ŋote lwölwöŋ nan lo ti jukin i nan, köti nye lo nyaŋu ŋuro lonyit kode ŋuro nanyit lwölwöŋ nan lo ti jukin i nan.

³⁸ Koti ko ŋuto a ko ’doggu ködini na görö nanyit a kepoddi nan a nye tine jukin i nan.

³⁹ ŋuto lo ryeju ru nanyit lo mo totolikin ru nanyit, ama ko ŋa lo tolikiŋdyö ru nanyit kogwon kulya kwe mo ryöryö lepeŋ.

Ropet

⁴⁰ ŋuto lo wuju ta lo wuju nan, koti nye lo wuju nan lo wuju lepeŋ sunyuŋdyö nan lo.

⁴¹ ŋuto lo wuju nebi kogwon lepeŋ a nebi lo mo wuju ropet nagon ropaki nebi, koti nye lo wuju ŋuto lo loti lo rigwo kogwon lepeŋ a ŋuto lo loti lo rigwo lo mo wuju ropet nagon ropaki ŋuto lo löti lo rigwo.

⁴² ’Diri nan takiŋdya ta adi, ko ŋa lo tiŋdu lele geleŋ lo kilo lo ’di ’dik kopo lo piŋo nalilik anyen mamat kogwon lepeŋ a ŋuto liŋ kajujumunit, ŋilo ŋuto mo ti jaran i ropaki.