Luka 9 - Bibilia Buk na Ŋun nagon koti luŋu a

Yesu a soŋdu luyökie puök wot murek i tokuöddu

¹ A kirut Yesu lupundye ŋutukanyit kajujumuk puök wot murek kulo i pirit na geleŋ, a nye tiŋdi lepeŋat riŋit ko kido anyen te ’yi mulökö lorok liŋ ko anyen toke ’yi twana,

² a nye soŋdi se i tokuöddu na kulya ti Tumatyan na Ŋun ko i toke ’ya na ŋutu logon a gigilötu.

³ A nye takiŋdye lepeŋat adi, An ta ko joŋga ta nene ŋo i jölö nasu; ta ti joŋga ma ’di turya, ma ’di jurakan, kode kinyo, kode gurut; an ta ko gwon ta ko jölöbiyajin murek murek.

⁴ a ko ta a lupö i nan kadi mönuŋdye ta nyu tojo ta a ŋiörö.

⁵ A ko nan pirit nagon ŋutu kanyit ti wu ta, ko ta ŋiörö ŋiörö i ŋinu köji, nanane ta kujöŋ na ryoryok ta ko mokosi kasu kine kaŋo anyen wi ’ya se i kwekiŋdya na ŋo nagon se a renyari kune.

⁶ A ŋutu kanyit kajujumuk ŋiörö ŋiörö, a wöröjine i turön liŋ totokuöddu Loŋe Lo ’but ko totoke ’ya ŋutu logon a gigilötu i piritön liŋ.

Erode dyadya ’yu

⁷ Nyena a Erode kasaranit iŋge yiŋ ŋo nagon aje kona kune, a nye iŋge dyadya ’yu parik, kogwon kulye ŋutu jambu adi, Yoane aje toŋiyu i twan,

⁸ a kulye jambi adi, Eliya aje pukun, a kulye adi, lele lo nebijin ti köju ’beron kulu aje ŋien i twan.

⁹ A Erode kulyani adi, Nan aje tikin kwe na Yoane i ’duŋwe kaŋo; ama ŋilo ŋuto a ŋa logon nan a yiŋ kine ŋo i kulya kanyit lo? A nye yöŋöni meddya lepeŋ.

Yesu a tunyeju Ŋutu aliŋan mukanat

¹⁰ A na yitwe ’i luyökie kulo nu, a se nyönyökökiŋdye Yesu ŋo liŋ nagon se aje kon kune. A nye joŋgi lepeŋat a ’danajine ka ’de i köji na luŋu a Betesaida.

¹¹ Ama a lodir lo ŋutu iŋge den a se kepoddi lepeŋ; a nye wuyuŋdye lepeŋat a jamakiŋdye lepeŋat kulya ti Tumatyan na Ŋun, a toke ’yi ŋutu logon ’de ’dekan tokela.

¹² A nagon kak gwe nyona ko sömukö nu, a ŋutu kanyit kajujumuk puök wot murek kulo poŋdi ko lepeŋ ni a kulyani adi, Sonyoro kilo ŋutu, ko ti se iti i köjinö ko i turön logon nyona, i galaddu na piritön dotoesi se ko kinyo; kogwon ni yi kulo gwon i pirit nagon ’bak ŋutu.

¹³ Ama a Yesu waddi lepeŋat adi, Ta ko ’börik tiki ta se ŋo lo nyenyei. A se waddi adi, Yi gwon ko ambatajin mukanat ko somot murek ka ’de ake koyi a tu i gwörökiŋdyö na kulo ŋutu liŋ kinyo.

¹⁴ Kogwon lepeŋat a ŋutu lyan gwoso aliŋan mukanat. A Yesu takiŋdye ŋutu kanyit kajujumuk adi, Tosi ’dane ta lepeŋat kak a teŋon, teŋ geleŋ ko ŋutu gwoso merya mukanat.

¹⁵ A se iŋge koŋdya sona i tosi ’daju na lepeŋat liŋ kak.

¹⁶ A Yesu ’dumuŋdye ambatajin mukanat se ko somot murek kune, a nye diŋe ki, a ’boroji ’boroja, a nye pipiŋdye se, a tiŋdi ŋutu kanyit kajujumuk kulo anyen tikin ko lodir lo ŋutu i komor.

¹⁷ A ŋutu liŋ nyesi nyesu a iŋge yimönö. A lepeŋat iŋge ’du ’dumun pitönö na kinyo lo pipinya lo kupöjin puök wot murek.

Petero a tökoŋu adi Yesu a Masia, a Yesu jambi kulya ti tatua nanyit

¹⁸ A ko gwe sona, na gwoŋdi Yesu i kwakwaddu geleŋ nu, a ŋutu kanyit kajujumuk gwe kata, a nye pije se adi, Ŋutu jambu adi nan a ŋa?

¹⁹ A se waddi adi, Kulye ŋutu kulya adi, Do a Yoane Kabatisanit; ama kulye adi, Do a Eliya; kulye adi, Do a lele lo nebijin ti köju ’beron kulu logon aje ŋien i twan lo.

²⁰ A nye köti pije lepeŋat adi, Ama ta ko ’börik kulya adi nan a ŋa? A Petero waddi adi, Do a Masia logon Ŋun a sunyun lo.

²¹ Ama a nye kukuji lepeŋat a saŋi se adi an se tukökin lele ŋuto kine kulya,

²² adi, Nan ŋuro lo ŋuto ködyö ŋoŋga ŋo jore, a ŋutu temejik ko koanejin temejik se ko katodinök ti Saresi ti Mose mo renyani nan, a mo tatuje nan, a i perok musala a nan mo toŋiyuni toŋiyu i twan.

²³ A nye kulyani ko lepeŋat liŋ adi, Ko ŋuto logon ’de ’dekan gwon a kakeponit liŋ a ti nye paji mugun, ko ti ’dumuŋdye ködini nanyit na goro perok liŋ a kepoddi nan.

²⁴ Kogwon ko ŋuto logon ’dek Iwoggu ru nanyit a ŋilo ŋuto mo tolikiŋdye ru nanyit, ama ŋuto logon tolikiŋdyö ru nanyit kogwon kulya kwe lo a nye mo lwöggi ru nanyit.

²⁵ Kogwon ’bulit a nyo i ŋuto logon a ryeju ŋo liŋ ti kak a kanyit a tuyaŋgi kode a tolikiŋdye mugun?

²⁶ Kogwon ko ŋuto logon kwe nanyit yuyu i kulya kwe se ko i todinesi kwe, a kwe nio na Ŋuro lo ŋuto köti mo yune yu i kulya kanyit, na poŋdi nan ko malaikajin loke i pirit na geleŋ i minyo liŋ se ko lo Baba nu.

²⁷ Ama nan ’diri takiŋdya ta adi, Kulye ŋutu kata i kulo ŋutu logon gwogwo ’dan ni kulo logon mo ti waŋ twan a kokwe na meddi se tumatyan na Ŋun.

Yesu a wora ka ’de a metani ko minyo

²⁸ A i mukök na perok budök na jambi Yesu kine kulya nu, a nye joŋgi Petero, ko Yoane, ko Yakobo, a kiyaddi ki i mere i kwakwaddu.

²⁹ a na gwoŋdi nye i kwakwaddu nu, a komor nanyit worani ka ’de, a boŋgwat kanyit worani a nakwe bia parik ti jukin i meta.

³⁰ Nyena mete, a ŋutu murek gwe i jambu ko lepeŋ, logon a ko Mose ko Eliya,

³¹ a se puku ko minyo, a jambi kulya ti wuddya nanyit i na kak nagon nye ’diri mo tu kökon Yerusalema yu kunu anyen temakiŋdya i ŋo nagon Ŋun ’de ’dekan.

³² A Petero se ko ŋutu lo gwon ko nye kulo lure lur, ama i diŋit nagon konyen kase gwe a loke nu, a se meddi minyo lo lepeŋ ko ŋutu murek gwogwo ’dan ko lepeŋ nyona.

³³ A nagon se gwe i kö ’yu na lepeŋ nu, a Petero kulyani ko Yesu adi, Katodinönit, a na ’but i gwon nikaŋ ni; ti yi teteŋdi murugujin musala, nene a inot, ko nene a na Mose, ko nene a na Eliya—ti den ŋo na kulyani nye kine.

³⁴ A na jambi nye kine kulya nu, a ’diko na puku a muŋge lepeŋat; a se iŋge kujönö na muŋge ’diko lepeŋat nu.

³⁵ A gworo lo kuu i ŋina ’diko adi, Ŋilo a Ŋuro liŋ lo wulwe; yiŋge ta kulya kanyit!

³⁶ a nagon gworo lo aje jo jambu nu, a Yesu ko metani a gwe geleŋ. A ŋutu kajujumuk kulo yiŋani taliŋ, a i ŋinu diŋit a se gwe a ko takin lele ŋuto nene ŋo na met se na.

Yesu a toke ’ya ŋuro logon a moka ko lomerya

³⁷ A kotumalu na luluruŋdye se kak i mere nu, a ŋutu jore parik rume ko Yesu.

³⁸ Mete, a lele ŋuto i kiden na lodir lo ŋutu woŋoro ki adi, Katodinönit, nan mo ’yu do böŋö boŋgi ŋuro liŋ kogwon nye a pilili liŋ lo ŋuro;

³⁹ mete, mulökötyo momok lepeŋ, a ’de ’de rumöne parik; a nye kiki iŋge lepeŋ tojo ko köŋutö a yu kanyit i kutuk, a pire pir lepeŋ, a gwe a nago i kö ’yu na lepeŋ.

⁴⁰ a nan iŋge mamaŋdu ŋutu kulök kajujumuk anyen riköddu ŋilo mulökötyo kaŋo, ama a se tine bulö riköddu.

⁴¹ a Yesu waddi adi, Ta ŋutu ti na toberon logon ’bak yupet ko a karenyak kulo, diŋit ŋornan nagon nan si ’da ko ta ko dara ko kulya kasu? Jo ŋuro ilot ni.

⁴² a nagon ŋuro nyuŋ jwejwe nu a mulökötyo gubakiŋöe lepeŋ kak a kiki iŋge lepeŋ. Ama a Yesu riŋge mulökötyo loron, a toke ’yi ŋuro lo, a ŋutukiŋdye monye.

⁴³ a ŋutu liŋ iŋge söŋu ko todumalan na Dun. A na gwoŋdi ŋutu liŋ i söŋu ko ŋo liŋ nagon Yesu aje kon kunu, a nye kulyani ko ŋutu kanyit kajujumuk kulo adi,

Yesu koti a jambu kulya ti tatua nanyit

⁴⁴ Yiŋe ta kilo kulyaesi go; kogwon nan Ŋuro lo ŋuto mo papaki ko ŋutu i könisi.

⁴⁵ Ama a se tine kurun ŋo na jam Yesu kune, a kine kulya iŋge ’dela ko lepeŋat, anyen se gwon ti kurun; a se kujönöni kujönö pija lepeŋ ko ŋo na jam nye kune.

Ŋutu kajujumuk a pija Yesu adi ŋa lose lo gwon a duma

⁴⁶ A lepeŋat poki i rerenya ko ’borik ko lon lose lo gwon a duma.

⁴⁷ A Yesu inge den no na yeye toilyet kase kune, a nye joŋdi ŋuro lo ’dit a togwi ’dikiŋdye lepeŋ kanyit i merete,

⁴⁸ a nye kulyani ko lepeŋat adi, Ko na lo wuju lo nuro i karin kwe wuju nan, a ko na lo wuju nan wuju lepeŋ lo sunyuŋdyo nan lo; kogwon ŋuto logon a lo ’dit bia parik kasu kiden liŋ lo lepeŋ logon a duma.

Yesu a kulya adi ŋuto logon ti mörö ko ta lo gwon kasu i swot

⁴⁹ A Yoane waddi adi, MATAT, yi a met lele ŋuto rikoddu muloko lorok kano i karin kunök a yi inge teŋ lepeŋ, kogwon lepeŋ ’bayin a lele likaŋ.

⁵⁰ Ama a Yesu kulyani ko lepeŋ adi, An ta ko teŋ ta lepeŋ kogwon ko ŋuto logon ti mörö ko ta lo gwon kasu i swöt.

Ŋutu ti tur lo Samaria a renya wuyuŋdya Yesu

⁵¹ A nagon diŋit nanyit nagon joŋari Yesu ki gwe nyona ko po nu, a nye komorgi i tu Yerusalema,

⁵² a nye sonyoddi luyökie kanyit ŋerot. A se iti tu a lupöni i tur lo nutu ti Samaria, i tetenakiŋdya na lepeŋ no liŋ;

⁵³ ama a nutu ti nilu tur tine ’bön wuju lepeŋ kogwon lepeŋ tiri kiko lo tu Yerusalema.

⁵⁴ A nagon nutu kajujumuk logon a ko Yakobo ko Yoane ko mete kine kulya, a se pije adi, MATAT, do ’de ’dekan yi lungu kimaŋ anyen po kak ki yu i totumbo na se?

⁵⁵ A nye woriŋoni woriŋo a ririŋge se parik, [adi, Ta ti den ko ta gwon ko lon mulökötyo,

⁵⁶ kogwon Ŋuro lo ŋuto a ko po i köŋu na ködudwolor ti nutu, ama po i lwöggu na se.] A se iti i lele tur.

Ŋutu logon jambu adi se ’de ’dekan kepoddu Yesu

⁵⁷ A na tiri se i kiko nu, a lele ŋuto kulyani ko Yesu adi, Nan de kekeporo do ko do tu da.

⁵⁸ A Yesu waddi lepeŋ adi, Liŋgojin gwon ko dilyo kase, kwen gwon ko kadijik kase, ama nan Ŋuro lo ŋuto ’bak pirit nagon nan sukiŋdye kwe nio.

⁵⁹ a nye takiŋdye lele ŋuto adi, Kipuŋdye nan, ama a nilo ŋuto waddi adi, MATAT, a kokwe rukoro nan i tu i nugga na baba.

⁶⁰ Ama a nye kulyani ko lepeŋ adi, Koloki lo twatwa i nugga na lo twatwa kase, ama do ti do iti i tokuddu na Loŋe Lo ’but lo Tumatyan na Ŋun.

⁶¹ Köti a lele ŋuto kulyani adi, MATAT, nan de kekeporo do, ama a kokwe rukoro nan i sara ko nutu lo gwon köyö midi kulu.

⁶² a Yesu kulyani ko lepeŋ adi, Lele ŋuto ’bayin logon a suluja kuŋu a kirut boŋgi bot logon jujukin i Tumatyan na Ŋun.