Luka 3 - Bibilia Buk na Ŋun nagon koti luŋu a

Yoane Kabatisanit a tokujo Loŋe Lo ’but

¹ Nyena i kiŋa topuök wot mukanat lo gwoŋdi Kaisar Tiberio i tumatyan lu, a Pontio Pilato gwe a modir lo Yudaya, a Erode gwe a kasaranit lo Galilaya, a luŋaser lonyit Pilipo gwe a kasaranit lo jur lo iturea ko lo Tarakoniti, a Lusania gwe a kasaranit lo Abilene,

² a Ana se ko Kayapa gwe a koanejin temejik. A i ŋinu diŋit a kulyaet lo Ŋun poki ko Yoane ŋuro lo Takaria i yöbu yu.

³ A nye worojine i juron liŋ lo diŋö ko kare Yardene, totokuöddu adi ti ŋutu ködyö löpuŋge töilyet ko ti batisani batisa anyen toronjin kase pipitöki,

⁴ gwoso na wuröri kulyaesi ti nebi Yisaya i buk nu adi, Gworo lo lele ŋuto wowoŋon i yöbu adi, Yayaraki ta kiko lo MATAT jojo, rine ta gwokiot kanyit gwogwo.

⁵ Luruki liŋ mo yiyikö jojo, merya liŋ ko lurwat liŋ mo tuturökak; a kikolin lukwölöŋök motetenakine gwogwo, a kikolin lorayokok mo tetenani a loliliŋok;

⁶ a ŋutu liŋ mo meddi Ŋun i lwöggu na ŋutu.

⁷ A Yoane pije lodir lo ŋutu lo po i batisa kanyit ni kulo adi, Ta torela ti munuö, ŋa lo tokujöŋdu ta i woran na popo nu anyen ta rwörwöddu le?

⁸ Koŋdi ta ŋo nagon kwekiŋdya adi ta ’diri aje lopuggö töilyet. An ta ko suluja ta kulya ko ’börik adi, Abarayama a merenye likaŋ. Nan takiŋdya ta adi Ŋun bubulö pipiluŋdya nyakwariat ti Abarayama ma ’di i kilo ŋurupö.

⁹ Ma ’di soŋinana tulu a tetenaki ajo anyen tokori kaden i kokori. Kaden liŋ logon ti radan ludweki lo ’but toko kak a gubani i kimaŋ.

¹⁰ A ŋutu kulo pije lepeŋ adi, A kirut yi mo koŋdi nyo?

¹¹ A nye waddi lepeŋat adi, Ko ŋuto gwon ko jölöbiyajin murek, ti nye tiki nene i ŋuto logon ’bak nanyit; ti ŋuto lo gwon ko kinyo lo ti koŋdi sona köti.

¹² Köti a kulye kapepenak ti usur iŋge po i batisa, a se pije lepeŋ adi, Katodinönit, yi ködyö koŋdya nyo?

¹³ A nye waddi lepeŋat adi, An ta ko luŋgu ta gurut jore lwöŋgu nagon a saraki.

¹⁴ A kamörök köti pije lepeŋ adi, Yi köti ködyö koŋdya nyo? A nye waddi lepeŋat adi, An ta ko riŋuŋdya ta gurut ti lele ŋuto ko riŋit kode ko ’burönö; ama yimönöni ta ko gurut na ropaki ta.

¹⁵ A ŋutu kulo gwe ko yenet parik, a pije ’börik kase i töilyet adi kode ŋona Yoane a Masia, kode a leŋe.

¹⁶ A Yoane nyobbi se liŋ adi, Nan lo batiddya ta ko pioŋ, ama lele logon riŋit nanyit a duma lwölwöŋ nio lo ŋilo popo; nan ti jukin laggu patala ti kamuka kanyit. Lepeŋ mo batiddya ta ko Mulökötyo Loke ko kimaŋ.

¹⁷ A nye gwe ko köbi setet kanyit i könin, anyen seddya ’bolot liŋ lo gwon kanyit i pirit gwutet na ’bolot, a yuŋdye ’bolot kanyit i gugu; ama a nye mo ’yuŋe pudi ko kimaŋ nagon ti bulo peŋa.

¹⁸ Nyena a Yoane iŋge tokukin ŋutu Loŋe Lo ’but ko kulye saresi jore gwoso kulo.

¹⁹ Ama a nye yuyuŋge Erode kasaranit i kulya ti Erodia nakwan na luŋaser Erode, ko konesi narok liŋ nagon lepeŋ aje kon kune.

²⁰ Nyena a Erode ’ya ’yi kulya narok a kinikiŋdye Yoane i kadi rereket.

Batisa na Yesu

²¹ A nagon ŋutu liŋ aje batisa nu, a Yesu köti lo batisani, a gwe i kwakwaddu, a ki ŋaji ŋaju,

²² a Mulökötyo Loke poŋdi kak kanyit loki a gwe ko mugun gwoso gure. A gworo lo kuu ki yu adi, Do a pilili liŋ lo ŋuro lo nyanyara, nan a lyöŋön ko do parik.

Kenet na kotumit nase Yesu

²³ A Yesu gwe ko kiŋajin gwoso merya musala na suluje nye kita nanyit nu. A ŋutu yeyeji adi lepeŋ a ŋuro lo Yosepa, ŋuro lo Eli,

²⁴ ŋuro lo MATAT a, ŋuro lo Lewi, ŋuro lo Meleki, ŋuro lo Yanai, ŋuro lo Yosepa,

²⁵ ŋuro lo Matatia, ŋuro lo Amosa, ŋuro lo Naum, ŋuro lo Eseli, ŋuro lo Nagai,

²⁶ ŋuro lo Mata, ŋuro lo Matatia, ŋuro lo Semein, ŋuro lo Yoseke, ŋuro lo Yoda,

²⁷ ŋuro lo Yöanan, ŋuro lo Resa, ŋuro lo Jerubabela, ŋuro lo Salatiele, ŋuro lo Neri,

²⁸ ŋuro lo Meleki, ŋuro lo Adi, ŋuro lo Losam, ŋuro lo Elemadam,

²⁹ ŋuro lo Emuro lo Yosua, ŋuro lo Eliejer, ŋuro lo Yorim, ŋuro lo MATAT a ŋuro lo Lewi,

³⁰ ŋuro lo Simeona, ŋuro lo Yuda, ŋuro lo Yosepa, ŋuro lo Yonam, ŋuro lo Eliakim,

³¹ ŋuro lo Melea, ŋuro lo Mena, ŋuro lo MATAT a, ŋuro lo Natana, ŋuro lo Dawidi,

³² ŋuro lo Yisai, ŋuro lo Obede, ŋuro lo Boaja, ŋuro lo Salamona, ŋuro lo Nasona,

³³ ŋuro lo Amina-daba, ŋuro lo Adimin, ŋuro lo Ami, ŋuro lo Keseron, ŋuro lo Perese, ŋuro lo Yuda,

³⁴ ŋuro lo Yakobo, ŋuro lo Yisaka, ŋuro lo Abarayama, ŋuro lo Terak, ŋuro lo Nakor,

³⁵ ŋuro lo Seruga, ŋuro lo Reu, ŋuro lo Pelege, ŋuro lo Eber, ŋuro lo Sela,

³⁶ ŋuro lo Kenan, ŋuro lo Arepakesada, ŋuro lo Seme, ŋuro lo Noa, ŋuro lo Lamek,

³⁷ ŋuro lo Metusela, ŋuro lo Enoka, ŋuro lo Yarede, ŋuro lo Malalele, ŋuro lo Kenan,

³⁸ ŋuro lo Enosa, ŋuro lo Sete, ŋuro lo Adama, ŋuro lo Ŋun.