Luka 23 - Bibilia Buk na Ŋun nagon koti luŋu a

Yesu ko Pilato i komor

¹ A lo momora liŋ ŋine ŋien, a lepeŋat joŋgi Yesu ko Pilato i komor.

² a lepeŋat suluje pökiŋdyö lepeŋ adi, Yi a ryö lo ŋuto i tulyaŋgu na jur likaŋ, teteŋgu ŋutu i ropakiŋdya na Kaisar usur, köti kulya adi nye ko mugun nanyit a Masia logon a mor.

³ A Pilato pije lepeŋ adi, Do nye ŋilo Mor lo Yudayaki lo? A Yesu waddi lepeŋ adi, Do lo jambu sona.

⁴ A Pilato kulyani ko koanejin temejik se ko lodir lo ŋutu adi, Nan a ko ryö toron nagon riŋari lo ŋuto.

⁵ Ama a se tiddye parik adi, Todiŋdyö nanyit toŋiju yeyeesi ti ŋutu i Yudaya liŋ, suluja i Galilaya ma ’di tojo ko na pirit.

Yesu ko Erode i komor

⁶ A na yiŋge Pilato kune kulya nu, a nye pije kode ŋuto lo ŋona a Galilayatyo,

⁷ a nagon nye aje denun kaŋo adi Yesu a lo jur logon Erode saŋu nye lu, a nye soŋdi lepeŋ ko Erode yu. Erode köti gwon Yerusalema i ŋinu diŋit.

⁸ A na meddi Erode Yesu nu, a nye lyöŋi lyöŋön parik kogwon diŋit a najo nye ’de ’dekan meddya lepeŋ, kogwon nye aje yiŋ liŋio i kulya kanyit, a nye yeŋdi meddya kunie kweyesi sörösi nagon lepeŋ lo koŋdya.

⁹ a nye pije lepeŋ ko piyesi jore, ama a Yesu gwe a ko wat lepeŋ kwöŋ.

¹⁰ a koanejin temejik se ko katodinök ti Saresi ti Mose gwo ’de gwo ’dan nyu i tiddya ko i pökiŋdyö na lepeŋ parik.

¹¹ Köti a Erode se ko ŋutu kanyit kamörök lauŋdye lepeŋ a kweni ’e kweni ’e lepeŋ, a kirut tojubbi lepeŋ ko boŋgo nakwekwelen, a sonyoddi lepeŋ bot ko Pilato yu.

¹² A i ŋilu lor gwak a Erode ko Pilato tomoke a julin, kogwon lepeŋat köju a merok ko ’börik.

Yesu a ’duŋöki i tatua

¹³ A Pilato luŋgi koanejin temejik, ko ŋutu kaliliyak lokukwön, se ko ŋutu kulo i pirit na geleŋ,

¹⁴ a kulyani ko lepeŋat adi, Ta aje jon lo ŋuto köyö i komor, a kulyani adi lepeŋ tulyaŋgu ŋutu. Nyena nan aje lilija kulya ti lepeŋ kasu i komor, a nan gwe a ko ryö toron nagon riŋari lepeŋ, nagon ta a ŋökin lepeŋ kune.

¹⁵ Erode koti a ko ryö nene ŋo naron ko lepeŋ, kogwon nye aje sunyun lepeŋ kayaŋ ni. Mete, lepeŋ a ko koŋdya nene ŋo nagon jujukin tatuari lepeŋ.

¹⁶ Nyena nan de titin lepeŋ i gwutö, a kölöddi lepeŋ. [

¹⁷ Temba i diŋit na rorwe Pilato agu ködyö pukukiŋdyö lepeŋat ŋuto geleŋ.]

¹⁸ Ama a lodir lo ŋutu liŋ woŋoro ki adi, Toliki lo ŋuto, yukuki yi Baraba.

¹⁹ (Baraba aje tiki i kadi rereket kogwon kulya ti mörö nagon mörörikin ko miri köji yu ko i kulya ti tatuja.)

²⁰ a Pilato köti jambi jambu ko lepeŋat, ’de ’dekan kölöddu Yesu;

²¹ ama a lepeŋat woŋoro ki adi, Ti lepeŋ ’bikikine i ködini na görö! Ti nye ’bikikine ’bikiki!

²² A Pilato pije lepeŋat daŋ tomusala adi, Ko nyo? Nan toron nagon lepeŋ a kon? Nan a ko ryö kwe na kulya nagon tatuarikin lepeŋ. Nyena nan de titin lepeŋ i gwuto, a kölöddi lepeŋ.

²³ Ama a se kölumbö tiddye woŋoro ki ko gworolo lobot adi ti lepeŋ ’bikikine i ködini na görö, a gworolo kase iŋge te ’ya.

²⁴ a kirut Pilato ’duŋökiŋdye adi, ŋo nagon lepeŋat ’de ’deggi na ködyö kokona.

²⁵ A nye yukuuŋdye ŋuto logon lepeŋat ’de ’deggi lo, logon aje tiki i kadi rereket kogwon kulya ti mörö ko miri se ko tatuja lo, ama a nye tiŋdi Yesu i kona gwoso na ’deggi se na.

Yesu a ’bikiki i ködini na göro

²⁶ A na joŋgi kamörök Yesu kaŋo nu, a se morgi Simona lo po Kurene, logon po kaŋo i jur, a se ’dukukiŋdye ködini na görö ko lepeŋ i ki ’diŋ anyen ’doggu ko Yesu i mukök.

²⁷ A ŋutu jore parik kepoddi lepeŋ, se ko wate jore nagon jojokaddu kidoni, gwiorö lepeŋ.

²⁸ A Yesu boŋgi lepeŋat, a kulyani adi, Ta wate ti Yerusalema, ko gwi ta ko nan, ama kölumbö gwine ta ko ’börik ko ŋwajik kasu.

²⁹ Kogwon mete ta, perok ’diri mo popo logon ŋutu mo kulyari adi, Ŋutu nagon a ’baŋin gwon a kalyoŋök, kweja adi nagon pelela a ko ta ’durikin ko nagon a ko nökö kinasi kwoŋ.

³⁰ A kirut ŋutu mo kulyani ko merya adi, ’Do ’done ta kayaŋ loki, a kulyani ko lurwat adi, Muŋge ta yi.

³¹ Kogwon ko ŋutu koŋdya kine ŋo a ködini nyuŋ a lodon, a nyo mo na konani ko gwe a loteyon?

³² Köti a kulye ŋutu murek logon a kamönyök nyömöjine kaŋo ko lepeŋ i pirit na geleŋ i tatua.

³³ A nagon se aje ’durökin i pirit na luŋu a Kululuŋ nu, a kamörök ’bikikiŋdye Yesu nyu, se ko kamönyök kulo, lele i swöt lo lutaten ko lele i swöt lo kadoŋe.

³⁴ a Yesu kulyani adi, Baba, pitöki lepeŋat, kogwon se ti den ŋo na kon se na. Ama a se kökorakiŋdye ’börik boŋgwat kanyit kune a gumbe guralan kode ŋa joŋga.

³⁵ a ŋutu gwo ’de nyu i diŋa; ama a ŋutu kaliliyak lokukwön kweni ’e kweni ’e lepeŋ ’dö ’döju, adi, Lepeŋ lwöggu kulye ŋutu; ti nye lwöki mugun, ko nye a Masia lo Ŋun logon nye a wulun lo!

³⁶ akamörök köti kwenine ko lepeŋ, a se poŋdi ko lepeŋ ni a ŋutukiŋdye lepeŋ binyo naparoroŋ,

³⁷ a kulyani adi, Ko do a Mor lo Yudayaki, lwöki mugun koi!

³⁸ A wuret köti gwe kata kanyit loki, nagon a wurö adi, LO A MOR LO YUDAYAKI.

³⁹ A lele lo kamönyök logon a ’bikiki nyu kulo, suluje ’dö ’döju lepeŋ adi, Do ’bayin a Masia le? Lwöki mugun koyi köti!

⁴⁰ Ama a lele lo goji lepeŋ parik adi, Do ti kujönö ma ’di Ŋun le? Do gwon i riŋa gwoso na riŋari lepeŋ na.

⁴¹ Yi ’diri riŋa a gwak, a yi ropakine ŋo nagon yi a kon kune; ama lo ŋuto a ko koŋdya nene ŋo naron kwöŋ.

⁴² a nye kulyani adi, Yesu, yeyene yeye nan ko do popo i tumatyan.

⁴³ a Yesu waddi adi, ’Diri nan takiŋdya do adi, i lo lor do de gwon ko nan i pirit na geleŋ i Melesen nakwekwelen na Ŋun.

Twan na Yesu

⁴⁴ Nyena i ŋinu diŋit a gwe a tuparan kiden. A kak liŋ worani a mudwe tojo ko saa musala na koriri,

⁴⁵ a parara na kolor iŋge musö; a boŋgo koret na Kadi na Ŋun iŋge ki ’ya murek.

⁴⁶ a Yesu woŋe parik ko gworo lobot adi, Baba, nan a tin ködudwö nio konut i könisi; a na kulyari nye sona nu, a nye duwuŋdye duwuŋdya.

⁴⁷ a na meddi duma lo kamörök mia geleŋ ŋo na kona nu, a nye pupurje Ŋun, a kulyani adi, ’Diri lo ŋuto a ŋuto lo rigwo.

⁴⁸ a nagon ŋutu jore parik lo momora i meddya na kunu ŋo kulo iŋge met ŋo nagon a kona kunu, a se yitöni midijik jojokaddu kidoni kase.

⁴⁹ Ama a julin kanyit liŋ se ko ŋutu wate nagon kipuŋdyö lepeŋ i Galilaya yu kune gwe i gwo ’dan pajo i meddya na kine ŋo.

Nuka na Yesu

⁵⁰ Nyena a lele ŋuto kata, karin kanyit a Yosepa, lo po i köji na Yudaya na luŋu a Arimataya. Lepeŋ a lele lo teŋ na kaliliyak ti kulya, ko a ŋuto lo ’but ko a lo rigwo.

⁵¹ Ŋilo ŋuto a ko juŋdyö yeyeesi kase se ko konesi kase. Lepeŋ yeyeŋdu Tumatyan na Ŋun.

⁵² A ŋilo ŋuto iti ko Pilato yu a piyuŋdye öpu na Yesu.

⁵³ A kirut nye ’dumuŋdye öpu na kak i ködini na görö a doggi ko boŋgo na ’but, a ’delakiŋdye i gulöm nagon a kuruwe i lurutat logon a ŋurupit, nagon a ko nyuŋ ’delarikin lele ŋuto kwoŋ.

⁵⁴ A gwe a Lor Tetenet a Sabata suluje suluja.

⁵⁵ a ŋutu wate nagon a moruŋdya ko Yesu i pirit na geleŋ Galilaya kunu kepoddi i mukök, a se iŋge met gulom ko öpu nanyit ’dela ada.

⁵⁶ A se yitöni midijik a teteŋdi welesi na mon ’bura se ko riyajin. A se yuke yukan i Sabata gwoso i saret.