Luka 2 - Bibilia Buk na Ŋun nagon koti luŋu a

Yuŋwe na Yesu

¹ A ko gwe sona i kilu perok a Kaisar Augusito tiŋdi saret adi ŋutu liŋ ti kak ködyö wuwuro.

² A ŋina gwe a wuret na kokwe nagon a kona i diŋit na gwoŋdi Kwirino a modir lo Suria nu.

³ Nyena a ŋutu liŋ geleŋ geleŋ iti kase i köjino i wuro na karin.

⁴ A Yosepa koti piu kaŋo Galilaya i köji na Najareta, a iti Yudaya i köji na Dawidi na luŋu a Beteleme, kogwon nye a lo ’duŋet ko a lo kotumit na Dawidi.

⁵ A lepeŋ ’ti i wuro na karin se ko Maria nagon a torukökin ko lepeŋ a narakwan na, a gwe ko pele.

⁶ A gwe sona, na gwoŋdi se yu nu, a diŋit nanyit iŋge temakiŋdya anyen nye tata ’duri.

⁷ A nye ta ’duuŋdye ŋuro lonyit kayu, a nye doggi lepeŋ ko boŋgo, a topirikiŋdye lepeŋ i saŋduk nagon toro ’bo nyesu kata i goro, kogwon pirit nase ’bayin i kadi na komu.

Malaikajin a pukokin ko kayukuk

⁸ A kayukuk gwe kata i ŋilu jur, lo sisi ’datu mu ’dio i tiju na yidin kase kwaje.

⁹ A malaikatat lo MATAT puköki ko lepeŋat, a minyo lo MATAT kobbi kobbu kase i mara, a se kujono ni kujönö parik.

¹⁰ A malaikatat lo kulyani ko lepeŋat adi, An ta ko kujono ta, kogwon mete ta, nan jakiŋdya ta lore lo ’but lo lyoŋon a duma logon mo gwon a lo ŋutu liŋ;

¹¹ kogwon i lo lor Kalwökönit a yuŋweki ta i köji na Dawidi logon a Masia ko a MATAT.

¹² A ŋina gwe kasu a kweyet: ta de ryöryö lupudi a doko ko boŋgo, ko a topiriki i saŋduk nagon toro ’bo nyesu kata i goro.

¹³ ’De ’de a teŋ duma na malaikajin ti ki gwe i pirit na geleŋ ko lo malaikatat pupurja ŋun adi,

¹⁴ Ti bulet gwe ko Ŋun lo ki, ko i kak ni ti taliŋ gwe ko ŋutu logon Ŋun lyölyoŋön ko lepeŋat kulo.

¹⁵ A nagon malaikajin aje kö ’yu lepeŋat, ko aje yitö ki nu, a kayukuk tokulyaki ko ’börik adi, Ti yi iti ta Beteleme yu i meddya na kinu ŋo nagon a ’durökin yu kunu, nagon MATAT aje tikin yi i deŋdya kune.

¹⁶ A se rumara rumara, a ryeji Maria ko Yosepa se ko lupudi lo a topiriki i saŋduk nagon toro ’bo nyesu kata i goro.

¹⁷ A na meddi se nu, a se tukokiŋdye lepeŋat ŋo nagon a jamaki se i kulya ti lo lupudi kune.

¹⁸ A ŋutu liŋ lo yiŋga kulo soŋi söŋu ko ŋo nagon kayukuk a jamakin se kune,

¹⁹ ama a Maria ’debbi kulo kulyaesi liŋ a yeyeji se kanyit i toili.

²⁰ A kayukuk kulo yitöni bot, gŋgotaddu ko pupuraddu Ŋun kogwon ŋo liŋ na yiŋ se ko na met se kunu, gwoso na jamaki ’e se nu.

Gwiyö na Yesu

²¹ A i perok budok a diŋit nanyit taweret aje temakiŋdya, a nye gwiyöni a Yesu ko karin nagon malaikatat aje gwikin lepeŋ a kokwe nagon nye a ko nyuŋ pikarikin nu.

Lupudi Yesu a joŋa i Kadi na Ŋun i kweya

²² A nagon diŋit nase Yosepa ko Maria tokelet aje temakiŋdya, gwoso i Saret lo Mose nu, a se joŋgi lupudi Yerusalema anyen wukiŋdya lepeŋ ko MATAT i komor,

²³ (gwoso na wuröri i Saret lo MATAT nu adi, Kayujin liŋ logon ŋaju pelela kilo mo gelwe a ti MATAT),

²⁴ koti anyen wukiŋdya rubaŋga gwoso i Saret lo MATAT logon adi, ŋuto ködyö joŋga gureki murek kode torela murek ti luguriet.

²⁵ A lele ŋuto gwe kata Yerusalema, karin kanyit a Simeona. Lepeŋ a ŋuto lorigwo ko a kakukanit lo Ŋun. Lepeŋ yeyeŋdu lwökö na ŋutu ti Yisaraele, a Mulökötyo Loke gwe ko lepeŋ.

²⁶ a Mulökötyo Loke aje kwekin lepeŋ adi lepeŋ mo ti twan tojo ko nye a met Masia lo MATAT.

²⁷ a Mulökötyo Loke nyomuŋdye lepeŋ tojo i Kadi na Ŋun kata; a nagon monye ko ŋote aje joŋdya lupudi Yesu lukata anyen konakiŋdya lepeŋ gwoso i ŋo liŋ nagon Saresi ti Mose ’de ’dekan nu,

²⁸ a Simeona ’dukukiŋdye lepeŋ kanyit i könisi a pupurje Ŋun adi,

²⁹ Pon MATAT, soŋinana böŋö kölöt di nan kölipönit ilot, ti nan iti ko taliŋ gwoso na jambi do na,

³⁰ kogwon nan a met ko konyen kwe lwökit nagon do lwöggi ŋutu na.

³¹ Ŋina lwökt do aje tetenakin ko ŋutu ti juron liŋ i komor;

³² anyen gwon a parara nagon kwekweki i Lwaka na, ko a minyo lo ŋutu kulok ti Yisaraele.

³³ A monye lupudi se ko ŋote iŋge soŋu ko ŋo na jama i kulya ti lepeŋ kune.

³⁴ A Simeona ’boroji lepeŋat, a kulyani ko Maria ŋote lupudi adi, Mete, lo ŋuro a wulwe a to ’dorowet ko a toŋiyit lo ŋutu jore ti Yisaraele, a nye mo gwe a kweyet logon ŋutu mo renya lepeŋ,

³⁵ anyen yeyeesi na gwon ko ŋutu jore i töilyet kune böŋö kwekweya. Iŋkoi, delya mo soso töili ilot gwoso wale.

³⁶ A nene nebi kata karin kanyit a Ana ŋuro na Panuele, na kötumit na Aser. Lepeŋ a modoŋ parik, aje si ’da ko lalet i pirit na geleŋ ko kiŋajin buryo i mukok na yema nanyit,

³⁷ a kirut nye gwe a karu ’be kiŋajin merya budök wot iŋwan. A nye tine jaran i kadi na Ŋun kwöŋ, a kitakiŋdye ŋun tuparan ko tukwaje, mimiŋdya ko kwakwaddu.

³⁸ A i ŋinu diŋit a nye iŋge ’dur a tiŋdi Ŋun puresi, a jamakiŋdye kulya ti lupudi i ŋutu liŋ logon yeŋdu lwökö na Yerusalema kilo.

Yosepa ko Maria se ko lupudi a yito Najareta

³⁹ A nagon Yosepa ko Maria aje tutuŋgö ŋo liŋ nagon ’de ’dekarikin i Saret lo MATAT nu, a se yitöni Galilaya, kase i köji na Najareta.

⁴⁰ A lupudi iŋge ’duŋö a worani a iŋgo, a nye gwe a lokoŋ parik, a ’busan na Ŋun gwe ko lepeŋ.

ŋuro Yesu pipija temejik i Kadi na ŋun

⁴¹ Temba i kiŋajin liŋ monye ko ŋote Yesu wörö Yerusalema i rorwe lo Pasaka.

⁴² A na gwoŋdi Yesu ko kiŋajin puök wot murek nu, a se iti tu gwoso i keri lo rorwe.

⁴³ a nagon rorwe aje jo kona, na yitwene se nu, a ŋuro Yesu karaki bot Yerusalema, ama a ko monye ko ŋote gwe a ko den.

⁴⁴ a se yeyeji adi lepeŋ ŋona gwon ko kajölök kiden, nyena a se iŋge jolo lor geleŋ, a kirut se suluje ga ’yu lepeŋ i kiden na karu kase ko na julin.

⁴⁵ a se gwe a ko ryö lepeŋ, nyena a se yitöni Yerusalema i galaddu na lepeŋ.

⁴⁶ A gwe sona, i mukök na perok musala a se ryeji lepeŋ i kadi na ŋun, si ’da i kiden na bodwat lo todiŋdyö saresi, i yiŋga na se ko i pipija na lepeŋat.

⁴⁷ a ŋutu liŋ lo yiŋga lepeŋ kilo söŋi söŋu parik i kuruŋdyö nanyit se ko wasesi kanyit.

⁴⁸ a na meddi monye ko ŋote lepeŋ nu, a se söŋi söŋu, a ŋote nanyit pije lepeŋ adi, ŋuro liŋ, nyo nagon do konakiŋdya yi sona? Mete, yi ko munyi gwon i ga ’yu na do ko delya a duma.

⁴⁹ a nye waddi pija lepeŋat adi, Nyo ta ga ’yu nan? Ta a ko den le adi nan agu ködyö gwon ko kulya ti Baba?

⁵⁰ A se tine kurun ŋo nagon lepeŋ kulyari ko se kune.

⁵¹ A nye moraddi ko lepeŋat tojo Najareta, a nye gwe a lokoyok ko lepeŋat i komor. A ŋote nanyit ’delakiŋdye kilo kulyaesi liŋ kanyit i toili.

⁵² A Yesu ’duŋe ’duŋo i mugun a puputuru ŋerot i koŋon ko i nyara ko ŋun se ko ŋutu.