Luka 19 - Bibilia Buk na Ŋun nagon koti luŋu a

Yesu se ko Takayo

¹ A Yesu luponi Yeriko a gwe i tulöddu köji.

² A lele ŋuto gwe nyu, karin kanyit a Takayo; a nye gwe a duma lo kapepenak ti usur, ko a kwörinit.

³ A nye ’deke meddya Yesu ko nye gwon ada, ama a nye tine bulö meddya kogwon ŋutu jore köti kogwon nye a lorutut.

⁴ Nyena a nye woki ŋerot a kije i ki ’bi ki anyen meddya Yesu, kogwon lepeŋ tiri ŋilo kiko.

⁵ A Yesu ko ’dure i ŋina pirit a nye diŋe ki, a luŋgi adi, Takayo, kiyene kak ’de ’de; kogwon i lo lor nan ködyö si ’da konut midi.

⁶ A nye kiyene kak ’de ’de a wuji lepeŋ ko lyöŋön.

⁷ A na meddi ŋutu kine kulya nu, a se liŋ wiwinyani wiwinya adi, Lepeŋ aje tu ko katoronyanit mede a kömutöt!

⁸ Ama a Takayo gwo ’de gwo ’dan nyu a kulyani Ko MATAT adi, Mete, pon MATAT, nan titiŋdu lomerika swöt na tito kwe, a ko nan a mumulukuŋdya nene ŋo ko lele ŋuto, a nan de ropaki ropakin lepeŋ daŋin iŋwan.

⁹ A Yesu kulyani ko lepeŋ adi, I lo lor na mede a lwökö, kogwon lepeŋ köti a ŋuro lo Abarayama.

¹⁰ Kogwon nan Ŋuro lo ŋuto aje po i ga ’yu ko i Iwoggu na ŋo nagon aje likin kune.

Lilim lo ginejin

¹¹ A na yiŋge ŋutu kine kulya nu, a Yesu ’yalakiŋdye lele lilim, kogwon nye gwe nyona ko ’dur Yerusalema, köti kogwon lepeŋat yeyeju adi Tumatyan na Ŋuti pupukun ’de ’de kijek.

¹² A nye kulyani adi, Lele ŋuto duma a teteŋdya jölö i jur lo pajo, anyen tiki a mor, ko anyen yiyitwe.

¹³ A nye luŋgi köliŋönök kanyit puök, a tiŋdi se liŋ geleŋ geleŋ ŋine. A nye takiŋdye lepeŋat adi, Tujaŋi ta ko kune tojo ko po nio.

¹⁴ Ama a ŋutu kanyit ti jur maŋdi lepeŋ; a se yokiöddi ŋutu ko lepeŋ i mukök, adi, Yi ti ’bön ŋilo ŋuto gwon a mor likaŋ.

¹⁵ A nye ko tikine a mor, a nye yitwene yitwe. A nye luŋgi köliŋönök logon nye a korakin gurut kulo anyen po kanyit i komor, anyen nye denuŋdya kaŋo ko se a toworuŋdya gurut muda i döuŋdyo nase.

¹⁶ A köliŋönit togeleŋ lo poŋdi, a kulyani adi, Duma liŋ, ŋine inot na a toworuŋdya kunie puök.

¹⁷ A nye kulyani ko lepeŋ adi, A na ’but parik, köliŋönit lo ’but! Nyena, kogwon do yiyiniki i ŋo na ’dit parik, wuji kido saret na köjinö puök.

¹⁸ A tomurek lo poŋdi, a kulyani adi, Duma liŋ, ŋine inot na a toworuŋdya kunie mukanat.

¹⁹ A nye köti kulyani ko lepeŋ adi, Gwe do a duma lo köjinö mukanat.

²⁰ a lele lo poŋdi, a kulyani adi, Duma liŋ, mana ŋine inot nagon nan aje ’delakin i boŋgo na;

²¹ kogwon nan kukujönö do, kogwon do a kayuyukönit do ti lyöŋön ko kita na ŋuto; do ’du ’dumuŋdya ŋo nagon do a ko tiŋdu kata, do ŋeŋepa ŋo nagon do a ko weja.

²² a nye kulyani ko lepeŋ adi, Do köliŋönit loron, nan de ’duŋökiŋdyö do ko kulyaesi lo jam do kilo. Do ŋona a den adi nan a ŋuto kayuyukönit logon ti lyöŋön ko kita na ŋuto, adi nan ’du ’dumuŋdya i pirit nagon nan a ko tiŋdu kata nu, a nan pepi ŋo nagon nan a ko weja kune le?

²³ A kirut nyo do tine tin gurut kwe i ’dela i baŋki? A kirut i yitwe nio a nan ködyö wuji ko ’yalet?

²⁴ A nye kulyani ko ŋutu lo gwo ’dan nyona kulo adi, ’Dumara ta na ŋine kaŋo kanyit i könin, ko tiki ta koliŋonit logon ko ginejin puök lo.

²⁵ a se kulyani ko lepeŋ adi, MATAT, lepeŋ gwon ko ginejin puök.

²⁶ Nan takiŋdya ta adi, Ŋutu liŋ geleŋ geleŋ lo gwon ko ŋo kulo mo ’ya ’yalaki kunie, ama ŋuto logon ’bak nene ŋo lo, ma ’di ŋo na gwon ko lepeŋ na mo ’du ’dumaji kaŋo kanyit.

²⁷ Ama kilo merok kwe logon ti ’bön nan tumatyan ko se kilo, joŋdi ta se ni ko tatuje ta se koyo i komor.

Yesu a lupö Yerusalema ko todumalan

²⁸ A nagon Yesu aje jambu kine kulya nu, a nye iti ŋerot i kiko logon tu Yerusalema.

²⁹ a gwe sona, nagon nye gwe nyona ko ’durökin Betepage ko Betania nyona ko mere lo luŋu a Jeitun lu, a Yesu ’deke soŋdu kulye ŋutu kanyit kajujumuk murek ŋerot,

³⁰ a yokije se adi, Iti ta i tur logon kasu ŋerot lu, a nagon ta aje ’dur nyin nu, a ta de ryeji kaine kolojityo a munuki kak, logon lele ŋuto a ko nyuŋ wörö ko lepeŋ; yokone ta lepeŋ ko jo ta lepeŋ ni.

³¹ A ko lele ŋuto a pija ta adi, Ko nyo ta yoyoko lepeŋ? ruŋge ta adi, nan MATAT ’de ’dekan lepeŋ.

³² a ŋutu lo sonyo kulo iti tu, a ryeji ŋo liŋ gwoso nagon lepeŋ aje sarakiŋdye se nu.

³³ a nagon se nyuŋ yoyokoju kaine kolojityo nu, a komonye kaine pije lepeŋat adi, Nyo ta yoyoko lepeŋ?

³⁴ a se waddi adi, MATAT ’de ’dekan lepeŋ.

³⁵ A se joŋdi kaine kolojityo ko Yesu ni, a se peddi boŋgwat kase i loki na ŋina kolojityo, a tosi ’dakiŋdye Yesu i loki nanyit.

³⁶ a na tiri nye nu, a se peddi boŋgwat kase i kiko.

³⁷ a nagon nye gwe nyona ko ’dur köji, a gwe i dudulet na Mere lo Jeitun nu, a teŋ liŋ na ŋutu kanyit kajujumuk suluje lyoŋon ko pupurja Ŋun ko gworolo lobot kogwon kitajin sörösi liŋ nagon se aje met kune.

³⁸ A se woŋoro ki adi, Mor lo po i karin ti MATAT lo, ti ’boriani ’boria! Ti taliŋ gwe ki yu se ko minyo i piriton ti ki.

³⁹ A kulye Parusijin logon gwon i kiden na lodir kulyani ko Yesu adi, Katodinönit, riŋe ŋutu kulök kajujumuk.

⁴⁰ A nye waddi adi, Nan takiŋdya ta adi, ko lepeŋat yiŋa taliŋ a ma ’di ŋurupo de wowoŋoro ki!

Yesu gwi ko Yerusalema

⁴¹ A nagon Yesu gwe nyona ko ’dur nu, a nye meddi köji a nye gwine lepeŋ ko ŋolitan,

⁴² adi, A dyoŋ, ma ’di do, ko ködyö do a den i lo lor ŋo na tiŋdu do gwon taliŋ! Ama soŋinana aje ’dela konut i konyen.

⁴³ Kogwon perok molu popokin konut logon merok kulök mo gömökiŋdyo do kiden ko liŋo logon a ’du ’dulu, a se mo lorgi do a goŋi do i swötön liŋ;

⁴⁴ a mo dukakiŋdye do kak se ko ŋwajik kulok lo gwon konut i mariŋ lukata, a mo tine kölokin do ŋurupit geleŋ i gwo ’dan i loki na nene, kogwon do a ko gwulu diŋit nagon Ŋun ’yö ’yi do na.

Yesu a tu i Kadi na Ŋun

⁴⁵ A Yesu lupöni i Kadi na Ŋuri, a suluje riggö kaŋo ŋutu lo tugwöŋu,

⁴⁶ a nye kulyani ko se adi, A wurö adi, Kadi nio mo gwon a kadi kwakwaset, ama ta aje kon nye a pirit ’danaet na karyakak.

⁴⁷ a nye gwe i Kadi na Ŋun i todiŋdyö perok liŋ. A koanejin temejik ko katodinök ti Saresi ti Mose se ko ŋutu lokukwön ga ’yi tatuja lepeŋ;

⁴⁸ ama a se gwe a ko ryö kiko, kogwon ŋutu liŋ ’depakiŋdya i yiŋga na kulyaesi ti lepeŋ.