Luka 18 - Bibilia Buk na Ŋun nagon koti luŋu a

Lilim lo karu ’be se ko ka ’duŋönit lo putesi

¹ A Yesu jamakiŋdye lepeŋ atilim anyen kwekiŋdya adi ti se ködyö gwe ti jaran i momo ’yu na Ŋun, a tine dara.

² A nye kulyani adi, Lele ka ’duŋonit lo putesi köju kata i nene köji, logon ti kujono Ŋun ko ti yeye ŋutu.

³ A nene karu ’be köju gwe kata i ŋinu köji, nagon wörö diŋitan liŋ ko lepeŋ yu, a kulyani adi, Liline kulya kaŋ ko miriku liŋ.

⁴ Diŋit a najo ŋilo ka ’duŋonit a renya, ama i mukok a nye kulyani ko mugun adi, Ma ’di nagon nan ti kujönö Ŋun ko ti yeye ŋutu,

⁵ ama kogwon na karu ’be yöyoŋgu nan parik, a nan de lilije kulya kanyit, an nye tudaraju nan parik ko wöro nanyit diŋitan liŋ.

⁶ A MATAT kulyani adi, Yiŋge ta kulyaesi ti ka ’duŋönit loron.

⁷ Nyena Ŋun ŋona mo ti ’duŋokiŋdyö gwogwo kulya ti ŋutu kanyit lo wulwe logon gwigwikin lepeŋ ko tuparan ko tukwaje le? Nye ŋona mo kakarakin i parakiŋdya na se le?

⁸ Nan takiŋdya ta adi, Nye mo ’de ’de ’du ’duŋökin kulya ti lepeŋat gwogwo. Nyenagon ko nan ŋuro lo ŋuto mo popo, nan ŋona mo ryoryö ŋutu logon ko yupet i na kak le?

Lilim lo Parusityo se ko kapepenanit lo usur

⁹ A nye köti jamakiŋdye lo lilim i kulye ŋutu logon yinikiŋdyo ’borik adi se a ŋutu lo rigwo, a lauŋdye kulye ŋutu liŋ.

¹⁰ Adi, Ŋutu murek a tu i Kadi na Ŋun i kwakwaddu; lele a Parusityo, a lele gwe a kapepenanit lo usur.

¹¹ A Parusityo lo gwo ’de gwo ’dan a momo ’yi pupurja mugun adi, A pon Ŋun, tinate ilot kogwon nan ’bayin gwoso kulye ŋutu logon goma ŋo liŋ, kode ŋutu logon ti yiniki, kode kalupok, kode ma ’di gwoso lo kapepenanit lo usur.

¹² Nan mimiŋdya daŋin murek i jima, nan ’do ’dogga ko swöt topuökit lo ŋo kwe liŋ lo ryo nan kulo.

¹³ Ama a kapepenanit lo usur lo gwo ’de pajo, a tine ’bon ma ’di ’bi ’yu konyen ki, ama a kolumbö joggi kido nanyit, a momo ’yi adi, Pon ŋun, wone konyen ko nan logon a katoronyanit lo.

¹⁴ Nan takiŋdya ta adi, Lo ŋuto a tu kanyit mede a ’buruji ko ŋun i komor Iwolwoŋ lele lo; kogwon ŋutu liŋ logon toduma ’yu ’börik kilo mo toto ’dita, ama nye lo to ’diddya mugun lo mo totodumala.

Yesu a ’boroja lupudiet lo ’di ’dik

¹⁵ A ŋutu joŋdi lupudiet logon nyuŋ ’de ’depa kulo ko Yesu ni, anyen lepeŋ böŋo sopakiŋdya konisi kanyit kase loki; a ŋutu kanyit kajujumuk ko meddi, a se riŋge se.

¹⁶ Ama a Yesu lupundye lupudiet kulo anyen jwe kanyit ni, a kulyani adi, Kolu ta kilo lupudiet ti poŋdi koyö ni, an ta ko teŋ ta lepeŋat; kogwon Tumatyan na Ŋun a na ŋutu logon gwoso kulo lupudiet.

¹⁷ ’Diri nan takiŋdya ta adi, Ko ŋuto a ko ruk sara ko ŋun gwoso na ruŋge lupudi i sara na, a nye mo tine lupö i ŋina tumatyan.

Ŋuto kwörinit

¹⁸ A lele temejiktyo pije Yesu adi, Katodinönit lo ’but; nan kodyö koŋdya nyo anyen wuju ru na yeŋ nyin?

¹⁹ A Yesu waddi pija lepeŋ adi, Nyo do luŋ nan a lo ’but? Ŋuto ’bayin logon a lo ’but ama ka ’de a Ŋun.

²⁰ Do a den Saresi adi, Do kodyö ti lubbö, do ködyo ti tatuja ŋuto; do ködyo ti koko ’ya; do ködyö ti lipikiŋdyö; bule bu munyi kase ŋuti.

²¹ a nye ruŋge adi, Nan aje ’dep kilo saresi liŋ suluja i toteton nio.

²² a na yiŋge Yesu kine kulya nu, a nye kulyani ko lepeŋ adi, Do yoŋgi ŋo geleŋ nagon do nyuŋ a ko kon. Tugwore tugwor ŋo kunök liŋ, ko kökoraki i lomerika, a do mo gwe ko tukwörien ki yu, a kirut poŋdi ko kipuŋdye nan.

²³ Ama a nye ko yiŋge kine kulya, a nye delyani delya, kogwon nye a kwörinit parik.

²⁴ a Yesu ko meddi lepeŋ, a kulyani adi, ’Diri a nago i ŋutu kwörinikö i lupö i Tumatyan na Ŋun.

²⁵ Gwon polilyö ko kamilo i lupö i dili na libira lwölwöŋ lupö na ŋuto kwörinit i Tumatyan na Ŋun.

²⁶ A ŋutu lo yiŋga kulo pije adi, A kirut ŋa logon bubulö lwökö?

²⁷ a nye waddi adi, Ŋo nagon ŋutu ti bulo koŋdya kine Ŋun bubulo koŋdya.

²⁸ Nyena a Petero kulyani adi, Mete, yi aje ko ’yu midijik kaŋ anyen kebbu do.

²⁹ A Yesu kulyani ko lepeŋat adi, ’Diri nan takiŋdya ta adi, ŋuto ’bayin logon aje kö ’yu mede, kode nakwan, kode luŋasirik, kode monye ko ŋote, kode ŋwajik, kogwon kulya ti Tumatyan na Ŋun,

³⁰ logon mo ti wuju jore lwölwöŋ kune i na diŋit, a mo wuji ru na yeŋ nyin i diŋit na popo.

Yesu a nyöggu jambu daŋ nene i kulya ti tatua nanyit

³¹ A Yesu joŋgi luyökie puök wot murek kulo i swöt, a kulyani ko lepeŋat adi, Mete ta, yi kulo tu Yerusalema, a ŋo liŋ nagon nebijin koju a wur i kulya kwe ti ŋuro lo ŋuto kune mo kokona.

³² Kogwon nan mo paki ko Lwaka i könisi, a mo kweniarikin kweniarikin, a mo ’döyöni ’döyö, a yakarikin kamulak;

³³ a se mo ’biddye nan ko kurubat logon a kwara, a tatuje nan, a i perok musala a nan mo ŋine ŋien i twan.

³⁴ Ama a lepeŋat tine kurun nene na kine kulya; a nyonyökit na kine kulya iŋge ’dela kase, a se gwe a ko kurun ŋo na jama kune.

Yesu a toke ’ya ŋuto logon a mo ’doke ko a kaŋoŋoliani

³⁵ A nagon Yesu gwe nyona ko ’dur Yeriko nu, a lele ŋuto mo ’doke gwe i si ’da i merete lo kiko i ŋoŋolija.

³⁶ a na yiŋge lepeŋ lodir lo ŋutu i lwöpöddu nu, a nye pije adi, Ŋinu ŋo a nyo?

³⁷ A se takiŋdye lepeŋ adi, Yesu lo Najareta lo lwöpöddu.

³⁸ A nye woŋoro ki adi, Yesu! Ŋuro lo Dawidi, wone kanyen ko nan!

³⁹ a ŋutu logon woro ŋerot kulu riŋge lepeŋ adi, Yiŋani taliŋ! Ama a nye koti woŋoro ki bia parik adi, Ŋuro lo Dawidi, wone konyen ko nan!

⁴⁰ A Yesu gwo ’de gwo ’dan, a saŋi adi ti ŋuto lo jweni kanyit ni; a nagon nye aje po nyona, a Yesu pije lepeŋ adi,

⁴¹ Do ’dek ti nan konaki do nyo? A nye waddi adi, Pon matat, böŋö tiki nan i meddya.

⁴² a kirut Yesu kulyani ko lepeŋ adi, Meddi meddya; yupet inot na toke ’ya do.

⁴³ a ’de ’de nye meddi meddya, a moraddi ko lepeŋ i kiko pupuraddu Ŋun, A ŋutu liŋ pupurje Ŋun na meddi se kine kulya nu.