Luka 17 - Bibilia Buk na Ŋun nagon koti luŋu a

Yesu a todiŋdyö kulya ti toron

¹ A Yesu kulyani ko ŋutu kanyit kajujumuk adi, Ŋo na lokuŋdya ŋutu i toroŋdya kune ’diri agu mo popo, ama woidio i ŋuto logon kine ŋo po ko lepeŋ.

² Kodyo a na ’but ko lepeŋ a toraki kijo kanyit i murut, a nye gubajine i tor, lwölwöŋ nagon nye lokuŋdya lele lo kilo ŋwajik lo ’di ’dik i toroŋdya.

³ Kunyar ta ’borik; ko luŋösur a koŋdya arabat riŋe riŋ lepeŋ, a ko lepeŋ a löpuggö toili, pitöki lepeŋ.

⁴ A ko nye a konakiŋdya do arabat daŋin buryo i lor geleŋ, a yitwene konut ni daŋin buryo a kulyani adi, nye a löpuggö toili, do agu ködyö pipitökin lepeŋ.

Yesu a todiŋdyö kulya ti yupet

⁵ A luyökie kulyani ko MATAT adi, ’Yalaki yi nene yupet!

⁶ a MATAT waddi adi, Ko ta gwon ko yupet ma ’di a na ’dit gwoso nyomotti lo kiteta, ta bubulö kulya ko lo ki ’bi adi, Gwunyu mugun kaŋo ko ’yutuki mugun i tor, a nye ködyö yiŋge ta a koŋdi sona.

Yesu a todiŋdyö kulya ti kita na köliŋönit

⁷ Ko lele losu gwon ko köliŋönit lo kukuŋu kode lo yuggu köbilu, a na pöri lepeŋ mu ’diŋ nu, do ŋona bubulö takiŋdya lepeŋ adi, Poŋdi ’de ’de ko si ’dakine kak i nyesu le?

⁸ Ŋilo ŋuto ŋona de ti kulya adi, Tetenakiŋdye nan kinyo, ko kukunaki mugun ’bura, ko yekakiŋdye nan tojo ko nan a nyesu ko a möju; a i mukok a do de nyesi nyesu ko a moji möju le?

⁹ Lepeŋ ŋona titiŋdu köliŋönit tinate kogwon nye aje kon ŋo na saraki kune le?

¹⁰ Nyena ta köti, ko ta aje koŋdya ŋo liŋ na saraki ta kune, kulyani ta adi, Yi a köliŋönök logon ’bak ’bulit; yi a koŋdya kita nikaŋ ka ’de.

Yesu a toke ’ya ŋutu puök ti rimajin

¹¹ A gwe sona, na tiri Yesu i kiko lo tu Yerusalema nu, a nye Iwoŋoddi i kiden na Samaria ko Galilaya.

¹² A na tulöddi nye i lele tur nu, a ŋutu puök ti rimajin rume ko lepeŋ. A se gwo ’de pajo,

¹³ a luŋgi ko gworolo lobot adi, Yesu MATAT, wone konyen koyi.

¹⁴ A nye ko meddi se, a kulyani ko se adi. Iti ta i kwekiŋdya na ’börik ko koanejin.

¹⁵ A lele lose ko dene mugun adi nye a tokela. a yitwene bot pupuruŋdya Ŋun ko gworo lobot;

¹⁶ a nye ’dorone kak ko komor nanyit ko Yesu i mokosi, a kulyani adi, Tinate. Ŋuto lo a Samariatyo.

¹⁷ A Yesu pije adi, Ŋutu puök a ko tokela le? Kuliya buŋwan kulo?

¹⁸ Kulye a ko yitwe i pupurja na Ŋun ama tuŋ lo lwakatyo le?

¹⁹ A nye kulyani ko ŋuto lo adi, Ome ki ko iti tu. Yupet inot a Iwoggu do.

Po na Tumatyan na Ŋun

²⁰ A na pije Parusijin Yesu adi, Tumatyan na Ŋun molu popo nanu nu, a nye waddi lepeŋat adi, Tumatyan na Ŋun ti po memetwe.

²¹ A ŋutu mo tine kulya adi, Meddi, Tumatyan mana, kode adi, Manu. Kogwon mete, Tumatyan na Ŋun gwon kasu kiden.

²² A nye kulyani ko ŋutu kanyit kajujumuk adi, Diŋit mo popo nagon ta mo yoŋö meddya na lele lo perok kwe ti ŋuro lo ŋuto, ama a ta mo tine met.

²³ A ŋutu mo kulyani ko ta adi, Meddi ta, malu, kode adi, Malo!

²⁴ An ta ko tu ta, an ta ko kepoddu ta lepeŋat;kogwon gwoso na meme ’dekti kipya lo ki i lele swot lo kak a pararaaddi tojo ko lele swot nu, a nan ŋuro lo ŋuto koti mo gwe sona i lor liŋ.

²⁵ Ama a kokwe kiyaŋ nan ködyö ŋoŋoŋga ŋo jore, a ŋutu ti na toberon mo renyani nan.

²⁶ Nyena a perok kwe ti ŋuro lo ŋuto mo gwe gwoso perok ti Noa koju kulu;

²⁷ adi ŋutu nyenyesu ko momöju, lepeŋat yeyemba ko yeyema, tojo ko lor logon Noa lupöri i ki ’bo kata lu, a bar lo poŋdi a köŋi lepeŋat liŋ.

²⁸ a koti mo gwe gwoso perok ti Loto koju kulu: adi ŋutu nyenyesu ko mömoju, lepeŋat gwogwöro ko tugwöŋu, lepeŋat ’yu’yuddu ko ’du ’duko.

²⁹ Ama i ŋilu lor lo tiri Loto kaŋo i Sodoma lu, a kimaŋ ko pisek ’duruu kak ki yu gwoso kudu a koŋi se liŋ.

³⁰ Köti a mo gwe sona i lor logon nan ŋuro lo ŋuto mo kwekweyari lu.

³¹ I ŋilu lor, ti ŋuto lo gwon i lo ’dek lo kadi a tito kanyit gwe i lukata na kadi lo, ti gwe ti kiuŋdya kak anyen ’dumaddu kine tito, koti ti ŋuto lo gwon i melesen lo gwe ti yitwe bot.

³² Yeyene ta kulya ti nakwan na Loto.

³³ Ko ŋuto logon ’dek ga ’yu rurugga ru nanyit a nye mo tolikiŋdye ru nanyit, ama ŋuto lo tolikiŋdyö ru nanyit lo mo lwölwok ru nanyit.

³⁴ Nan takiŋdya ta adi, i ŋilu tukwaje, ŋutu murek mo gwon i doto i dotoet geleŋ; lele mo ’du ’dumaji, a lele mo kölokine kölöki.

³⁵ A ŋutu murek mo gwe i jijö i pirit na geleŋ; nene mo ’du ’dumaji, a nene mo kölokine kölöki. [

³⁶ A ŋutu murek mo gwe i melesen; lele mo ’du ’dumaji, a lele mo kölökine kolöki.]

³⁷ A kajujumuk pije Yesu adi, Ya, MATAT? A nye waddi se adi, Ko ’burwö mo gwon ya, a logulusen mo momoraddi nyu.