Luka 14 - Bibilia Buk na Ŋun nagon koti luŋu a

Yesu a toke ’ya ŋuto logon ko kadu ’ba

¹ A ko gwe sona i Sabata, a Yesu iti ko lele duma lo Parusijin mede i nyesu, a se diŋe lepeŋ go,

² Mete, a lele ŋuto logon ŋoŋoŋga ko kadu ’ba gwe nyu kanyit i komor.

³ A Yesu pije bodwat ti Saresi ti Mose se ko Parusijin adi, Saret a ruk adi ŋutu bubulo tokela i lor lo Sabata kode ’bayin?

⁴ Ama a se yiŋani taliŋ. A nye morgi ŋuto lo, a toke ’yi lepeŋ a sonyoddi lepeŋ.

⁵ A kirut nye pije lepeŋat adi, Ko lele losu kaine nanyit kode dwöt lonyit a ’dororo i kidi i lor lo Sabata, nye ŋona ti pikun lepeŋ kaŋo ’de ’de le?

⁶ Nyena a se tine bulo waddu lepeŋ i kine kulya,

Yesu a todiŋdyö ŋutu i to ’diddya na ’börik

⁷ A na meddi Yesu ŋutu logon a luŋwe kulo i wu ’yö na si ’daesi nagon kukuka kunu, a nye kulyani ko lepeŋat adi,

⁸ Ko lele ŋuto a luŋgu do i budu lo yema an do ko si ’daki i si ’daet nagon kukuka, kode ŋona lele ŋuto a luŋwe logon twötwöi Iwolwoŋ do,

⁹ a kirut monye budu logon a luŋgu do se ko ŋilo ŋuto mo poŋdi po a kulyani ko do adi, Kölöki ŋilo ŋuto pirit, a kirut do suluje tu i si ’daki i si ’daet na ’dutet ko yu na kwe.

¹⁰ Ama ko do a luŋu, iti, si ’dakine i si ’daet na ’dutet, anyen ko monye budu a po a nye mo takiŋdye do adi, Ju liŋ, iti ŋerot. A kirut do mo bulani bula i komor na ŋutu liŋ logon si ’da ko do i pirit na geleŋ kulo.

¹¹ Kogwon ŋutu liŋ logon toduma ’yu ’börik kilo mo toto ’dita, ama nye lo to ’diddya mugun lo mo totodumala.

¹² a Yesu koti kulyani ko ŋuto logon a lupuŋdya lepeŋ loadi, Ko do koŋdya rorwelotuparan kode lo tokotyaŋ, ko luŋgu julin kulök, kode luŋösurök, kode karu kulök, kode maratejin logon a kwörinikö, an se koti mo ko luŋgu do a do aje ropaki.

¹³ Ama ko do koŋdya rorwe luŋgi ŋutu lomerika, ko ŋutu logon a babatatu, ko ŋodeki, se ko mo ’dokeno;

¹⁴ a do mo gwe a kalyöŋi, kogwon se ’bak ŋo logon ropakiŋdye do; kogwon do mo roröpaki i diŋit nagon ijulu lo rigwo mo ŋiŋien i twan nu.

Lilim lo rorwe duma

¹⁵ A lele lo kilo ŋutu logon si ’da ko Yesu i nyesu lo, ko yiŋge kine kulya, a nye kulyani ko Yesu adi, Nye lo nyesu i Tumatyan na Ŋun lo a kalyoŋi!

¹⁶ A Yesu kulyani ko lepeŋ adi, Lele ŋuto a teteŋdya rorwe duma a luŋgi ŋutu Jore.

¹⁷ A nagon kinyo aje jo dera nu, a nye soŋdi koliŋonit lonyit i luŋgu na ŋutu logon a luŋu kulo, adi, Po ta, kogwon kinyo aje jo.

¹⁸ A se liŋ gwe ko yeyeet geleŋ a suluje ’buruddu ’borik kaŋo.

¹⁹ A lele lo takiŋdye ŋuto lo sonyo lo adi, Nan a gwöruŋdyo melesen; nan agu ködyö tu i meddya. Nan mo ’yu do ti do böŋö kölörö nan a lele lo kulyani adi, Nan a gwöruŋdyö dwönin puök logon kuŋu murek murek. Nan lo tu i möŋu na se. Nan mo ’yu do ti do boŋö kölörö nan.

²⁰ a lele lo kulyani adi, Nan pete yemba nakwan, nyena ko ŋina kwe nan ti bulo tu.

²¹ A koliŋonit lo yitwene bot a takiŋdye duma lonyit kine kulya. A kirut monye ’baŋ wore woran, a kulyani ko koliŋönit lonyit lo adi, Iti ’de ’de i kikolin ko i gwokiot ti köji, ko joŋdi lomerika ni, ko ŋutu logon a babatatu, ko mo ’dokeno se ko ŋodeki.

²² a koliŋönit lo kulyani adi, Duma liŋ, nan aje kon ŋo nagon do aje sarakin kune, ama pirit nyuŋ gwon kata.

²³ a duma lo kulyani ko koliŋönit lonyit lo adi, Iti i kikolin ti jur ko i gwokiot, ko ri ’diuŋdye ŋutu i po ni, anyen kadi nio jojore.

²⁴ Nan takiŋdya ta adi, Lele lo kilo ŋutu logon kokwe a luŋwe kilo ’bayin logon de wawaŋ kinyo lo rorwe liŋ.

Ŋutu ti Yesu kajujumuk ködö paju ŋo liŋ

²⁵ A ŋutu jore parik moraddi ko Yesu, a nye wöriŋo jine ko lepeŋat yu, a kulyani adi,

²⁶ a ko lele ŋuto po koyo ni a tine maŋdu monye lonyit, kode ŋote, kode nakwan, kode ŋwajik, kode luŋasirik, kode kiasirik, ma ’di mugun nanyit, a nye koti tine bulo gwon a ŋuto liŋ kajujumunit.

²⁷ Ko ŋuto a ko ’doggu ködini na goro nanyit a kepoddi nan, a nye tine bulö gwon a ŋuto liŋ kajujumunit.

²⁸ Lon losu logon ’de ’dekan ’duggö bilili lo kadi, a tine si ’daki kak a kokwe i denuŋdya kaŋo ko joŋga gurut muda? Lepeŋ ködyö deden ko nye ŋona gwon ko gurut nagon tetemakiŋdya i tutuŋgö na ŋinu kadi,

²⁹ anyen i diŋit nagon nye aje tiŋdu pipilesi ti kadi a tine bulo tutuŋgö lepeŋ nu, an ŋutu liŋ lo meddya kulo ko suluja kwekweni ko lepeŋ adi,

³⁰ Ŋilo ŋuto a suluja ’duko ama a nye tine bulö tutuŋokiŋdyö.

³¹ Kode lon mor logon tu i mörö ko lele mor, a tine si ’daki kak a kokwe i yeyeju kode ŋona ŋutu aliŋan puök jujukin anyen nye tu i mörö ko ŋuto logon po ko ŋutu aliŋan merya murek lo?

³² a ko nye ti jukin, a nye yökioddi ŋutu, na gwoŋdi mor nyuŋ pajo nu, anyen tu piyuŋdya kikolin lo tetenari taliŋ.

³³ Nyena koti lele losu ’bayin logon bubulo gwon a ŋuto liŋ kajujumunit ko nye a ko paju ŋo kanyit liŋ.

Lilim lo ’balaŋ nagon ’bak ’bulit

³⁴ ’Balaŋ a na ’but, ama ko ’balaŋ a wora poto, nye bubulö to ’busa ada?

³⁵ A ŋina ’balaŋ gwe ’bak ’bulit i kujoŋ kode i ki ’diro, a ŋutu gubaddi nye mu ’diŋ ŋuto logon ko swo yiŋesi ti nye yiŋge kine kulya.