Luka 13 - Bibilia Buk na Ŋun nagon koti luŋu a

Löpuŋge ta töilyet an ta twatwa

¹ Nyena i ŋinu diŋit gwak a kulye ŋutu gwe nyu logon takiŋdya Yesu kulya ti ŋutu ti Galilaya logon Pilato a tiŋdu rima kase i ’buköki i pirit ’duŋet na rubaŋgajin.

² A nye waddi se adi, Ta yeyeju adi kilo ŋutu ti Galilaya a katoronyak lwölwöŋ kulye ŋutu liŋ ti Galilaya le, kogwon se a ŋoŋga kine ŋo?

³ Nan takiŋdya ta adi, ’Bayin sona; ama ko ta a ko löpuggö töilyet a ta liŋ mo twatwane sona gwoso lepeŋat.

⁴ Kode ŋutu puök wot budök logon bilili lo gwon Siloama yu lo a ’doro ko lepeŋat loki a tatuje se, ta yeyeju adi se ŋona a ŋutu lorok parik lwölwöŋ kulye ŋutu liŋ lo si ’da Yerusalema kulo le?

⁵ Nan takiŋdya ta adi, ’Bayin sona; ama ko ta a ko löpuggö töilyet a ta liŋ mo twatwane sona gwoso lepeŋat.

Lilim lo ki ’bi logon ti radan ludweki

⁶ A Yesu kulyani ko lepeŋat ko lo lilim adi, Lele ŋuto gwon ko ki ’bi logon a ’yutuki kanyit i luköbi na kaden ti binyo, a nye poŋdi i ga ’yu na ludweki i ŋilo ki ’bi, ama a nye gwe a ko ryo.

⁷ A nye kulyani ko ŋuto lo tiki i kuŋu lo adi, Mete, kilo kiŋajin musala nan a po i lo ki ’bi i ga ’yu na ludweki, ama a nan gwe a ko ryö. Tukuki nye kak. Nyo nye muggo kak ko kana?

⁸ A ŋuto lo waddi lepeŋ adi, Duma liŋ, kölöki lepeŋ i lo kiŋa köti, a nan mo ’boggi mukök nanyit a tiŋdi woro kata;

⁹ nyena ko nye mo a radan ’bura a mo gwe a na ’but, ama ko ti gwon sona, a do mo tukukiŋdye lepeŋ kak.

I lor lo Sabata Yesu a toke ’ya ŋuto nagon a bata nagon dula na

¹⁰ A Yesu gwe i todiŋdyö i nene kadi momoret i lor lo Sabata.

¹¹ A nene ŋuto gwe nyu nagon a gwon ko mulökötyo lo tomunyan kiŋajin puök wot budök, logon tiŋdu lepeŋ gwon a namunyan, a nye gwe dula, a tine bulö riuŋdyö mugun ki kwoŋ.

¹² A na meddi Yesu lepeŋ nu,

¹³ a nye lupundye lepeŋ kanyit ni, a kulyani adi, Do ŋina ŋuto, tomunyan inot aje laka; Da nye sopakiŋdye könisi kanyit ko ŋina ŋuto ki, ’de ’de a ŋina ŋuto riuŋdye mugun ki gwogwo a suluje pupurja Dun.

¹⁴ Ama a duma lo kadi momoret iŋge woran kogwon Yesu aje toke ’ya i lor lo Sabata, a kulyani ko lodir lo ŋutu adi, Perok buker kata logon a kitaesi, po ta i kilo perok i tokela, ti gwon i lor lo Sabata.

¹⁵ a MATAT waddi lepeŋ adi, Ta kamumulukak, ta liŋ geleŋ geleŋ ti yukuuŋdyö dwönin kasu kode kaineki kasu i gorwat, anyen joŋ se i möju na pioŋ i lor lo Sabata le?

¹⁶ Nyena na ŋuto nagon a nyakwari na Abarayama na, nagon Satani a rerek ko kiŋajin puök wot budök na, ti nye ködyö gwe ti laka i rerekesi kanyit i lor lo Sabata le?

¹⁷ A na kulyari nye sona nu, a merok kanyit liŋ yune yu kusik, a lodir lo ŋutu liŋ lyöŋi lyöŋön ko ŋo liŋ temejik nakwekwelen na kon lepeŋ kune.

Lilim lo nyomotti lo kiteta

¹⁸ A Yesu pije adi, Tumatyan na Dun gwon gwoso nyo? Nan de töjukin lepeŋ i nyo?

¹⁹ Nye gwon gwoso nyomotti lo kiteta logon lele ŋuto a ’dumun a gubakiŋdye kanyit i melesen, a nye ’duŋe ’duŋö a worani a ködini, a kwen sakani i kenia kanyit.

Lilim lo kape

²⁰ A Yesu köti pije adi, Nan de töjukin Tumatyan na Ŋun i nyo?

²¹ Nye gwon gwoso kape logon nene ŋuto a ’dumun a polakiŋdye i pelela musala ti lojiet lo wi ’di tojo liŋ a yu.

Lilim lo kötumit nagusu

²² A Yesu wöröjine i köjinö ko i turön totodinöddu na tiri nye Yerusalema nu.

²³ A lele ŋuto pije lepeŋ adi, MATAT, ŋutu ku ’dik mo lo lwökö le? A nye waddi se adi,

²⁴ Möŋi ta lupöri kötumit nagusu, kogwon nan takiŋdya ta adi, ŋutu jore mo gaga ’yu lupö lukata ama a se mo tine bulö.

²⁵ a nagon monye kadi aje ŋien ki ko aje kiŋdu kotumit nu, a ko ta gwo ’dan kaŋo a totoggi kotumit, a kulyani adi, MATAT, ŋaki yi, a nye mo waddi adi, Nan a ko den ko ta po ya.

²⁶ A ta kirut mo kulyani adi, Yi aje nyesu ko a möju ko do i piril na geleŋ, a do iŋge todiŋdyo kayaŋ i kikolin.

²⁷ Ama a nye koti mo kulyani ko ta adi, Nan a ko den ta ko ta po ya. Wuddye ta wuddya koyo i komor, ta ŋutu liŋ logon a kakonak ti toronjin.

²⁸ A ta mo gwine gwien a pije kala nyu, na meddi ta Abarayama, ko Yisaka, ko Yakobo se ko nebijin liŋ i Tumatyan na Ŋun nu, ama a ta ko ’borik kasu mo lo kinikine kaŋo.

²⁹ A ŋutu mo poŋdi i swot lo ’yure, ko i swot lo tokotyaŋ, ko i swot lo lobot, ko i swot lo loki, a mo si ’dakine i nyesu i Tumatyan na Ŋun.

³⁰ Iŋkoi, kulye logon a ti ’dutet mo gwe a ti kokwe, a kulye logon a ti kokwe mo gwe a ti ’dutet.

Yesu nyanyar Yerusalema

³¹ A i ŋinu diŋit gwak a kulye Parusijin poŋdi ko Yesu ni, a takiŋdye lepeŋ adi, ŋiöro kaŋo ni ko iti tu; kogwon Erode ’de ’dekan tatuja do.

³² A nye waddi se adi, Iti ta ko takiŋdye ta ŋilu likito adi, I lo lor ko ko ’bure nan ririkoro mulöko lorok kaŋo, a totoke ’yi ŋutu, a i perok musala a nan mo tutuŋge kita nio.

³³ Nyenagon nan agu ködyö tutu i lo lor ko kotumalu ko molu lu, kogwon nebi ti bulo tatua i nene pirit kwöŋ ama tatua Yerusalema.

³⁴ A, Yerusalema, Yerusalema, ŋutu kulök a katatuak ti nebijin, a gugubuje ŋutu logon a sunyuki do kilo ko ŋurupö! Diŋitan muda nagon nan ’de ’dekan sukuŋdyö ŋwajik kulök köyo ni i pirit na geleŋ, gwoso sukuri nagon sukokiŋdyö torela kanyit i köpukön na, ama a ta tine ’bon!

³⁵ Mete ta, kadi nasu a kölöki ta kana. Nyena nan takiŋdya ta adi, ta mo ti met nan tojo ko diŋit a po nagon ta kulyari adi, Ti nye lo po i karin ti MATAT lo ’boriani ’boria.