Luka 11 - Bibilia Buk na Ŋun nagon koti luŋu a

Yesu a todiŋdyö kulya ti kwakwaddu

¹ A gwe sona a Yesu gwe i kwakwaddu i nene pirit, a nagon nye aje jo kwakwaddu nu, a lele lo ŋutu kanyit kajujumuk kulyani ko lepeŋ adi, MATAT, todiniki yi i kwakwaddu gwoso na todiŋdye Yoane ŋutu kanyit kajujumuk na.

² A nye kulyani ko lepeŋat adi, Ko ta kwakwaddu, kwakwaddi ta adi, Baba, ti karin kunök bulani bula;ti tumatyan inot po.

³ Temba i lor tiki yi kinyo likaŋ lo lor.

⁴ Pitöki yi toronjin kaŋ, kogwon yi köti aje pitokiŋdyö ŋutu liŋ logon a konakiŋdya yi arabat kulo. An do ko tikin yi i tema.

⁵ A kirut nye kulyani ko lepeŋat adi, Ko kodyö lele losu gwon ko ju lonyit a iti ko lepeŋ yu kwaje kiden, a kulyani adi, Ju liŋ, paraki nan ko ambatajin musala,

⁶ kogwon lele ju liŋ logon jöjolo a ’durökin köyö mede, a nan gwe ’bak nene ŋo nagon nan tikin lepeŋ.

⁷ A monye kadi ruŋge kadi kata adi, An do ko tudara nan. Soŋinana kötumit aje kinu, ŋwajik kwe se ko nan aje peron kak; nan ti bulö ŋien ki anyen tiŋdu do nene ŋo.

⁸ Nyena nan takiŋdya ta adi, ma ’di nye ti ŋien ki i tiŋdu na lepeŋ ŋo kogwon lepeŋ a ju lonyit, ama kogwon nye titiddya parik a nye mo ŋine ki a tiŋdi ŋilo ŋuto ŋo liŋ nagon nye ’de ’dekan kune.

⁹ Nyenagon nan kulya ko ta adi, Pije ta, a ta de tikine tiki; gale ta, a ta de ryöni ryö; totoggi ta, a ta de ŋakine ŋaki;

¹⁰ kogwon ŋutu liŋ lo piyuŋdya kilo wuwuju, nye lo ga ’yu lo ryöryö, a nye lo totoggu lo ŋakine ŋaki.

¹¹ Ta komonye, lon losu logon ko ŋuro lonyit a piyuŋdya sumuti, a i pirit na somuti a kölumbö tiŋdi lepeŋ munu?

¹² Kode ko nye a piyuŋdya katulukuti a nye mo tiŋdi lepeŋ kito le?

¹³ a ko ta logon a ŋutu lorok kulo deden tiŋdu ŋwajik kasu ŋo na ’but, a bia parik Monye losu lo gwon ki lu mo titin ŋutu logon a pija lepeŋ kulo Mulökotyo Loke!

Kulye ŋutu a jambu adi Yesu gwon ko mulökötyo loron logon a Belejebula

¹⁴ A Yesu iŋge rikörö mulökötyo loron kaŋo logon a mumut. A nagon mulökötyo loron aje po kapo nu, a ŋuto logon a mumut lo jambi jambu. A nutu kulo soŋi soŋu.

¹⁵ Ama a kulye kase kulyani adi, Lepeŋ rikoddu muloko lorok kaŋo ko riŋit na Belejebula, duma lo mulökö lorok.

¹⁶ A kulye koti mori lepeŋ, ’dekan kweyet na po ki.

¹⁷ Ama nye iŋge den yeyeesi kase a kulyani ko lepeŋat adi, Tumatyanjin liŋ nagon a koŋa ’borik kine kokoŋu, iŋkoi, mede nagon a koŋa mugun murek na, ŋina mede kakaŋu.

¹⁸ a ko Satani koti a koŋa mugun a tumatyan nanyit gwo ’de ada? Kogwon ta kulya adi nan rikoddu muloko lorok ko riŋit na Belejebula.

¹⁹ A ko nan rikoddu muloko lorok ko riŋit na Belejebula, a ŋutu kasu rikörö se kaŋo ko riŋit niŋa? Nyenagon a se mo lo lilije kulya kasu.

²⁰ Ama ko nan kita ko morinet lo Ŋun anyen rikoddu muloko lorok kaŋo, nyena dene ta den adi, Tumatyan na Ŋun ’diri aje yeŋundya kasu.

²¹ A ko ŋuto lo riŋit a jupu tito moriesi a tiji kadi nanyit, nyena aŋo kanyit liŋ gwe ’bura.

²² Ama ko ŋuto logon ko riŋit lwölwöŋ lepeŋ a po, a möroni ko lepeŋ, a te ’yi lepeŋ, a ’dokoddi tito möriesi ti ŋuto logon yinikiŋdyö mugun i se lo, a kökoroji toro ’bo na ryakun nye kune.

²³ Nye logon ti gwon köyö i swöt lo mömoro ko nan, a nye logon tine pepeŋdya ko nan i pirit na geleŋ lo totorekiŋdya.

Yitwe na mulökötyo loron ko ŋuto i töili

²⁴ A nagon mulökötyo loron aje po kaŋo ko ŋuto i mugun nu, a worojinei piritön nagon ’bak pioŋ gaga ’yu yukan; a ko nye a ko ryö pirit a nye kulyani adi, Nan de yiyitwe köyö mede nagon nan po kata nu.

²⁵ a nye ko ’dure, a nye ryeji nu kadi a reya a nake, ko a kukuna ’bura.

²⁶ Nyena a nye i ti tu a joŋdi kulye mulökö buryo logon a lorok lwölwoŋ nye, a se liŋ lupöni lukata a si ’dani nyu; a gwiliŋit lo ŋilo Ŋuto i ’dutet worani a loron parik lwölwöŋ lo kokwe lu.

Ŋutu logon ’diri a kalyöŋök

²⁷ A nagon Yesu nyuŋ jambu kine kulya nu, a nene ŋuto i kiden na lodir lo ŋutu kulyajine ki ko lepeŋ adi, Ŋuto na yupuŋdyö do na nagon do a nöggu kinasi kanyit kulo na a kalyoŋi.

²⁸ Ama a nye kulyani adi, Bia do kulya adi, Ŋutu logon yiyiŋ kulyaet lo Ŋun ko ’de ’dep nye kulo a kalyöŋök.

Ŋutu ’de ’dekan meddya kweyesi

²⁹ A na momoruŋdye ŋutu jore ko Yesu ni nu, a nye kulyani adi, Ŋutu ti na toberon a ŋutu lorok; se gaga ’yu kweyet, ama kweyet mo ti kweki lepeŋat ka ’de kweyet na Yona.

³⁰ Kogwon gwoso nagon Yona köju a gwon a kweyet i ŋutu ti Ninewe nu, nyena köti nan Ŋuro lo ŋuto mo gwon a kweyet i ŋutu ti na toberon.

³¹ Mor na swot lo Loki mo ŋiŋien ki i lor ’duŋet lo putet ko ŋutu ti na toberon, a mo ’duŋöki kulya kase arabat, kogwon nye köju a po i ’dutet na kak i yiŋga na koŋon na Solomona; nyena mete ta, ŋo duma kata ni nagon Iwolwöŋ Solomona.

³² ŋutu ti Ninewe mo ŋiŋien ki i lor ’duŋet lo putet ko ŋutu ti na toberon, a mo ’duŋöki kulya kase arabat, kogwon se löpuggö töilyet kase ko tokujö na Yona; nyena mete ta, ŋo duma kokona ni nagon Iwolwöŋ Yona.

Parara na mugun

³³ Lele ŋuto ’bayin logon mokakiŋdya lombo a ’dele ’de nye, kode a muke muk ko kupö, ama nye togwi ’dikin ki anyen ŋutu lo lupö kadi kulo boŋo memet.

³⁴ Konyen kulök a lombo lo mugun inot; ko konyen kulok a lo ’but mugun inot liŋ koti a jore ko parara; ama ko konyen kulök a lorok. köti a mugun inot gwe i mudwe.

³⁵ Nyenagon meddi ’bura an parara na gwon konut i mugun na gwon a mudwe.

³⁶ Ko mugun inot liŋ a jore ko parara, a lele swöt gwe ’bayin logon a mudwe, a nye ’bukuluŋ mo gwe a parara gwoso nagon lombo lo kokobbu parik tiŋdi do parara na.

Yesu a jambu kulya ti Parusijin se koti katodinök ti Saresi ti Mose adi se a lorok

³⁷ A nagon Yesu aje tutuŋgö jambu nu, a lele Parusityo luŋgi lepeŋ i nyesu ko nye i pirit na geleŋ. Nyena a nye luponi kadi a si ’dakine kak i nyesu.

³⁸ A Parusityo lo iŋge söŋu na meddi nye lepeŋ a ko lalaju a kokwe na nyesu nu.

³⁹ A MATAT kulyani ko lepeŋ adi, Ta Parusijin lalaju kaŋo na kopojin ko na kalabajin; ama kasu lukata ta a jore ko ryaggu se ko ŋo narok.

⁴⁰ Ta ŋutu lu ’böŋ, Kagweyanit lo ŋutu ŋona a gweja kaŋo ka ’de, a ko gweja lukata köti le?

⁴¹ Nyena tiki ta ŋo na gwon i lukata kune a ’dokesi; mete, a ŋo liŋ mo gwe a nake kasu.

⁴² Woidio ta Parusijin! Ta ’dogga ko swöt topuökit lo nana ko lo mulukia logon a jiyo, se ko lo koropo liŋ na to ’busarikin kinyo, ama a ta kölökiŋdye ’duŋgo na kulya gwogwo se ko nyaŋu na ŋun. Kine ŋo a se nagon ta kodyö kökon, a gwe ti kölokin kunie a ko kona.

⁴³ Woidio ta Parusijin! Ta nyanyar si ’daesi ti kokwe i kadijik momoresi, ko nyanyar romarikin i piritön gwöriesi.

⁴⁴ Woidio ta! Ta gwon gwoso gulomö nagon ’bak ŋo gwuluesi, a ŋutu wöröni kase loki a tine den adi se a gulömo.

⁴⁵ A lele lo bodwat ti Saresi ti Mose waddi lepeŋ adi, Katodinönit, na jambi do kine kulya nu, do koti a yuyuggö yi parik.

⁴⁶ a nye kulyani adi, Woidio ta bodwat ti Saresi köti! Ta sobba ŋutu ko ŋo nagon pömöni i ’doko ama ta ko ’börik ti ’bön taŋdu ŋo lo ’do ’doko kulo ko lele lo morin kasu.

⁴⁷ Woidio ta! Ta logon gweja gulomö ti nebijin logon merenyejin kasu köju a tatu kulu.

⁴⁸ Nyena a ta totokoŋi adi ta a ruk konesi nagon merenyejin kasu aje kon kune; lepeŋat aje tatuja nebijin, a ta gweji gulomö kase.

⁴⁹ Kogwon ŋina kwe Koŋon na Ŋun a kulya adi, Nye mo susunyukin se nebijin se ko luyökie, a se mo tatune tatu kulye kase, a mo sasanye sasan kulye.

⁵⁰ Ko ŋina kwe a ŋutu ti na toberon mo ropakine rima ti nebijin liŋ kase i kusik logon aje tatua suluja i gweya na kak kulo,

⁵¹ suluja i tatua na Ebele tojo ko tatua na Takaria i kiden na pirit ’yuret na rubaŋgajin se ko pirit nake na rurwan. Iŋkoi, nan takiŋdya ta adi, kine rima liŋ mo ropaki i kusik ti ŋutu ti na toberon.

⁵² Wöidiö ta bodwat ti Saresi! Ta aje ’dumara kaŋo ŋaet lo kotumit nagon ŋutu lupö i kuruŋdyö na kulya; ta ko ’börik a ko lupö nyin, a ta teŋgi ŋutu logon lupö lukata kulo.

⁵³ A nagon Yesu aje lupuŋdyo kaŋo i ŋinu kadi nu, a katodinök ti Saresi ti Mose se ko Parusijin suluje tiddya lepeŋ ko tomirikulan, a pije lepeŋ ko kulya jore,

⁵⁴ möŋu domba lepeŋ anyen logga lepeŋ ko ŋo nagon lepeŋ kodyo jajamun kune.