Luka 10 - Bibilia Buk na Ŋun nagon koti luŋu a

Yesu a soŋdu ŋutu merya buryo wot murek i tokuoddu

¹ A mukök na nina, a MATAT wuluŋdye kulye nutu merya buryo wot murek, a sonyoddi lepeŋat murek murek kanyit nerot i köjinö liŋ ko i piritön liŋ nagon lepeŋ ko mugun nanyit ’de ’dekan tu kata kunu.

² A nye kulyani ko se adi, Kinyojin aje yone parik, ama kaŋerak ku ’dik. Nyena mo ’yi ta Monye melesen anyen soŋdu kulye kanerak kanyit i melesen.

³ iti ta; nan nilo soŋdu ta gwoso yisi i kiden na lujin.

⁴ An ta ko jonga ta likitiat ti gurut, kode jurakan, kode kamuka; an ta ko roman ta ko nutu i kiko.

⁵ A ko ta a lupo i nan kadi, a kokwe kulyani ta adi, Ti taliŋ gwe i na kadi.

⁶ a ko ŋuto lo taliŋ gwon nyu a taliŋ nasu mo poki ko lepeŋ, ama ko ’bayin, a nina taliŋ mo yitwene bot kasu ni.

⁷ Si ’dani ta i nina kadi, nyesi ta ko möji ta po nagon a tiki ta kune, kogwon kakitanit ködyö roröpaki kita nanyit. An ta ko wöröji abur i midijik.

⁸ A ko ta a lupö i nan köji a nutu wuji ta, nyesi ta no nagon se a tikin kasu i komor kune.

⁹ Toke ’yi ta nutu lo gilö lo gwon nyu; kulyani ta ko lepeŋat adi, Ŋun aje yepuŋdya kasu ni i tumatyan.

¹⁰ A ko ta a lupö köji a nutu tine wu ta, iti ta i kikolin ti ŋina köji, ko kulyani ta adi,

¹¹ Kune kujöŋ ti köji nasu nagon yi a ryoryok kune yi a nanaara kaŋo anyen wi ’ya ta, ama dene ta den adi Ŋun aje yepuŋdya i tumatyan.

¹² Nan takiŋdya ta adi, i lor ’duŋet, kulya ti Sodoma mo ’duŋöki pölilyö lwölwöŋ ’duŋöki na na köji.

Köjinö nagon ŋutu kase ti ’bön yubbö Yesu

¹³ Wöidiö Korajina! Wöidiö Betesaida! ko ködyö kitajin sörösi nagon a kona kasu kiden kune ködyö a kona Turo se ko Sidona a ŋutu kase ködyö aje ’beron löpuggö töilyet, a si ’dani i delya a jupu boŋgwat terekesi ko a we ’ya ’börik ko kurök.

¹⁴ Ama kulya ti Turo se ko Sidona mo ’duŋöki putet pölilyö lwölwöŋ ’duŋöki nasu.

¹⁵ Ama do Kaperanauma, do yeyeju adi do ŋona mo totodumala tojo i ’diko le? ’Bayin, ama do mo jojoŋa kak i pirit na mulökö.

¹⁶ Ŋuto lo yiŋga ta lo yiŋga nan; nye lo renya ta lo renya nan; a ko ŋa lo renya nan lepeŋ renya nye lo sunyuŋdyö nan lo.

Yitwe na ŋutu merya buryo wot murek lo sonyo kulo

¹⁷ A ŋutu merya buryo wot murek kulo yitwene bot ko lyöŋön, a kulyani adi, MATAT, koyi a ’diŋdya karin kunök a ma ’di mulökö lorok twöji yi.

¹⁸ A nye waddi se adi, Nan a met Satani a gube kak ki yu adi wulek gwoso meme ’dekta na ki.

¹⁹ Mete ta, nan aje tikin ta kido anyen ryoggi munuö ko kitoni, ko anyen te ’ya riŋit ’bukuluŋ na miriku, a nene ŋo gwe ’bayin na böŋöddu ta.

²⁰ Ama an ta ko lyöŋön ta kogwon mulökö twötwö ta, ama lyöŋi ta kogwon karin kasu aje wurö ki yu.

Yesu a jore ko lögön

²¹ A i nu diŋit gwak a Yesu iŋge jore ko lyöŋön kogwon Mulökötyo Loke, a nye kulyani adi, Tinate pon Baba, MATAT lo ki ko lo kak, kogwon do aje ’de ’ya kine kulya i ŋutu lokoŋ ko i ŋutu lo kukurun kulya, a do iŋge kwekin se i lupudiet. Iŋkoi, Baba, do aje koŋdya sona kogwon meta a na ’but konut.

²² Baba aje ’burukin nan ŋo liŋ; lele ŋuto a ko den ko nan Ŋuro a ŋa ama Baba ka ’de lo deŋdya, köti ŋuto a ko den ko Baba a ŋa, ama nan Ŋuro ka ’de lo deŋdya, se ko ŋutu logon nan ŋuro a wakun kwekiŋdya se Baba.

²³ A Yesu löŋuköjine ko ŋutu kanyit kajujumuk yu, a takiŋdye lepeŋat a lwön adi, Ŋutu logon a met ŋo nagon ta a met kune a kalyöŋök.

²⁴ Nan takiŋdya ta adi, nebijin jore se ko moran jore ’de ’dekan meddya ŋo na met ta kune, ama lepeŋat ti met se, a se ’deke yiŋga ŋo nagon ta a yiŋ kune ama a se tine yiŋ se.

Lilim lo Samariatyo lo ’but

²⁵ Mete, a bodo lo Saresi ti Mose ŋine ki a ’deke möŋu lepeŋ pija adi, Katodinönit, nan koŋdya nyo anyen wuju ru na yeŋ nyin?

²⁶ A Yesu waddi pija lepeŋ adi, Ŋo a nyo nagon a wuröki i Saresi? Do a kenuŋdya nyo kata?

²⁷ A ŋuto lo waddi adi, A wurö adi, Do ködyö nyanyar MATAT Ŋun ilot ko töili ilot liŋ, ko ködudwö inot liŋ, ko riŋit inot liŋ se ko yeyeesi kunök liŋ; köti adi, Do ködyö nyanyar marate ilot gwoso mugun inot.

²⁸ A Yesu kulyani ko lepeŋ adi, Do aje ruggö ’bura, kone kon kine ŋo a do mo gwe jörun.

²⁹ Ama a nye ’deke to ’buddya mugun, a nye pije Yesu adi, Ŋa logon a marate liŋ?

³⁰ A Yesu waddi adi, Lele ŋuto lururun Yerusalema tu Yeriko, a nye ’dorone ko karyakak i könisi, a se ryakuŋdye boŋgwat kanyit kune kaŋo a ’biddye lepeŋ, a se iti tu a kolokiŋdye lepeŋ gwe nyona ko twan.

³¹ A gwe sona a lele koane tiri ŋilu kiko, a na meddi lepeŋ ŋilo ŋuto nu, a nye giraddi swöt.

³² Köti jojo a Lewityo lo ’dure i ŋinu pirit, a na meddi lepeŋ ŋilo ŋuto nu, a nye giraddi swot.

³³ Ama a Samariatyo na jolöri nye nu ’dure i pirit nagon nye gwon kata nu, a na meddi nye ŋilo ŋuto nu, a nye wone konyen ko lepeŋ.

³⁴ a nye iti ko lepeŋ yu, a nye ’bukokiŋdye welet ko binyo i ’dikasin a doggi ko rubatan. A nye ’dukukiŋdye lepeŋ kanyit i kaine loki, a joŋgi lepeŋ i kadi na kömu, a meddi lepeŋ ’bura.

³⁵ a kotumalu a nye ’dumuŋdye podojin murek a tiŋdi monye kadi, a kulyani adi, Mete met lepeŋ ’bura, ko do a ’yalakiŋdya kunie a nan mo ropakiŋdye do ko nan a yitwe.

³⁶ Nyena, do yeyeju i kilo ŋutu musala lon lose logon a temakiŋdya a marate lo ŋuto logon a ’doro ko karyakak i könisi lo?

³⁷ A nye waddi adi, Ŋilo logon a won konyen ko lepeŋ lo. A Yesu kulyani ko lepeŋ adi, Iti, koŋdi sona koti.

Yesu a ’yö ’yu Marata se ko Maria

³⁸ A na jölöri Yesu se ko ŋutu kanyit kajujumuk nu, a nye ’dure i lele tur, a nene ŋuto na luŋu a Marata wuyuŋdye lepeŋ kanyit mede.

³⁹ a nye gwe ko kiaser na luŋu a Maria, nagon a si ’da ko Yesu i mokosi i yiŋga na kulyaesi logon lepeŋ jajam kulo.

⁴⁰ Ama a Marata taŋgi mugun ko kitajin jore; nyena a nye poŋdi ko Yesu ni, a pije lepeŋ adi, MATAT, do ti yeyeju adi kiaser nio aje kolökin nan i kita geleŋ le? Böŋö taki nye anyen po i parakiŋdya na nan.

⁴¹ Ama a MATAT waddi adi, Marata, Marata, do wiwinya ko dedelya i kulya ti ŋo jore.

⁴² Ŋo geleŋ na ’dekarikin tuŋ. Maria aje wuluŋdyö swöt lo ’but logon mo ti ’dumaji kaŋo kanyit kwöŋ.