Luka 1 - Bibilia Buk na Ŋun nagon koti luŋu a

Suluet na kulya

¹ Pon duma Teopilo; ŋutu jore aje moru i wuŋo na kulya ti ŋo nagon aje kona kayaŋ kiden kune.

² a se wuŋe ŋo nagon aje taki yi ko ŋutu lo meddya kine kulya suluja i suluet, a iŋge laŋa lore lo ’but lo kine kulya.

³ Nyena pon duma Teopilo, kogwon nan aje denun kine ŋo liŋ ’bura suluja i suluet, nan a yeyeju adi a na ’but i wurokiŋdyo na do se liŋ i miru,

⁴ anyen do boŋo deden adi ŋo nagon a todiniki do kune a gwak.

Malaikatat a tuggo yuŋwe na Yoane Kabatisanit

⁵ A i perok ti Erode mor lo Yudaya, lele koane kata karin kanyit a Takaria, a lo laŋet na koanejin nagon a na Abiya. Nakwan nanyit koti a na nyakwariat ti Arona, karin kanyit a Elisabeta.

⁶ A se murek liŋ gwe rigwo ko Ŋun i komor kekebbu saresi liŋ se ko jujuwesi ti MATAT ’bak ŋoit.

⁷ Ama a se gwe ’bak ŋuro, kogwon Elisabeta a ’baŋ, a se liŋ murek gwe a muduŋin.

⁸ A gwe a kiyuk na laŋet na Takaria anyen kita a koane ko ŋun i komor,

⁹ nyena gwoso i keri lo tokoaŋan a gura ’duki a na lepeŋ, a nye luponi i pirit nake na rurwan na MATAT i ’yuŋa na bökur.

¹⁰ A ŋutu liŋ lo momora kulo gwe kaŋo i kwakwaddu i diŋit na ’yurari bökur nu.

¹¹ A malaikatat lo MATAT puköki ko lepeŋ i komor gwo ’dan i swot lutaten lo pirit ’yuret na bökur.

¹² A Takaria rigwokoni rigwökö na meddi nye lepeŋ nu, a kujono iŋge mok lepeŋ.

¹³ A malaikatat lo kulyani ko lepeŋ adi, Takaria, an do ko kujönö; kwakwaddu inot aje yiŋa: Elisabeta nakwan inot mo yuŋwekiŋdyo do ŋuro lulalet, a do mo gwije lepeŋ a Yoane.

¹⁴ A do mo gwe ko lyoŋon ko nyola, a ŋutu jore mo lyoŋi lyoŋon i yuŋwe nanyit.

¹⁵ Kogwon nye mo gwon a duma ko MATAT i komor, a nye mo tine möju binyo kode yawa na pötwör, a Mulökötyo Loke jorene ko lepeŋ i mugun suluja ko ŋote i pele,

¹⁶ a nye mo lopukokiŋdye ŋutu jore ti Yisaraele i MATAT Ŋun lose.

¹⁷ A nye mo wöröjine kanyit i komor ko mulökötyo logon Ŋun koju a tikin Eliya se ko riŋit nanyit, anyen Iöpukökiŋdyö toilyet ti komonye i ŋwajik kase; ko anyen Iöpukökiŋdyo töilyet ti ŋutu karenyak i kebbu na koŋon na ŋutu lo rigwo, i tetenakiŋdya na MATAT ŋutu logon ’diri jujukin lepeŋ.

¹⁸ A Takaria pije malaikatat lo adi, Nan mo denun kine kulya ada? Nan gwe a modoŋ, koti nakwan nio aje doŋga.

¹⁹ A malaikatat waddi lepeŋ adi, Nan a Gabariele, lo gwo ’dan ko Ŋun i komor; nan aje sunyue i jambu ko do ko i jakiŋdya na do na lo lore lo ’but.

²⁰ Nyena mete, do mo yiŋa taliŋ a tine bulo jambu tojo ko lor logon kine ŋo a pokin konut, kogwon do a ko yuŋ kulyaesi kwe logon mo tetemakiŋdya i diŋit nase na wulwe.

²¹ A ŋutu kulo gwe i momoŋdu na Takaria, a iŋge soŋu kogwon lepeŋ a karakin i pirit nake na rurwan ko diŋit a najo.

²² A nagon nye aje lupuŋdyo kaŋo nu, a nye tine bulo jambu ko lepeŋat, a se iŋge gwulu adi lepeŋ aje meddya kulya nagon Ŋun a kwekin lepeŋ i pirit nake na rurwan; a nye yuyutakiŋdye lepeŋat kweyesi, a nye gwe a mumut.

²³ a ko gwe sona, nagon perok kanyit kitaesi aje temakiŋdya nu, a nye yitöni kanyit mede.

²⁴ A i mukok na kilo perok, a Elisabeta nakwan nanyit piŋge pigga, a nye ’de ’deleji mugun ko yapala mukanat, a kulyani adi,

²⁵ Ŋilo a MATAT lo konakiŋdya nan sona i diŋit na meddi nye nan ko lyoŋon nu, ko aje ’dumaddu ’do ’doyo nio kaŋo ko ŋutu kiden.

Malaikatat a tuggo yuŋwe na Yesu

²⁶ A i yapa tobuker lonyit, a Ŋun sonyoddi malaikatat logon a Gabariele Galilaya yu i köji na luou a Najareta.

²⁷ Nye a sonyo i ’diet nagon a torukökin toyem ko lele ŋuto karin kanyit a Yosepa, a lo kotumit na Dawidi. Karin ti ŋina ’diet a Maria.

²⁸ a malaikatat lo lupöni ko lepeŋ yu, a rome ko lepeŋ adi, Madao, do na ’boria parik na, MATAT gwon ko do.

²⁹ Ama a nye iŋge rigwökö parik ko kilo kulyaesi, a yeyeji kanyit i toili ko ŋina roman kweja nyo.

³⁰ A malaikatat kulyani ko lepeŋ adi, Maria, an do ko kujono, kogwon Ŋun a ’boroja do.

³¹ Nyena, mete, do mo pipigga a mo ta ’duuŋdye ŋuro lulalet, a do mo gwije lepeŋ a Yesu.

³² a nye mo gwe a duma, a nye mo luguni a ŋuro lo Katoŋanit lo ki liŋ, a MATAT Ŋun mo tiŋdi lepeŋ si ’daet na tumatyan na merenye lonyit Dawidi.

³³ a nye mo lo tumatyane i kotumit na Yakobo ŋupi, a tumatyan nanyit mo tine ’duddyo kwöŋ.

³⁴ Ama a Maria pije malaikatat lo adi, Kine kulya mo gwon ada kogwon nan nyuŋ a ko den lalet?

³⁵ A malaikatat waddi lepeŋ adi, Mulökötyo Loke mo pokin konut, a riŋit na Katoŋanit lo ki liŋ mo muŋge do, nyenagon ko ŋina kwe lupudi logon mo yuyuŋwe lo mo luŋuni a loke, a Ŋuro lo ŋun.

³⁶ Koti Elisabeta karutyo inot aje pigga ŋuro lulalet i tomodoŋan nanyit; nye nagon koju luŋu a ’baŋ na soŋinana lo gwe a yapa tobuker lonyit.

³⁷ Kogwon nene ŋo ’bayin nagon bubulo te ’ya Ŋun.

³⁸ A Maria kulyani adi, Nan mana koliponit na MATAT, ti gwe koyo gwoso na jambi do na. A kirut malaikatat kö ’yi lepeŋ.

Maria a ’yo ’yu Elisabeta

³⁹ A i ŋinu diŋit a Maria ŋine ŋien a rumara i jur lo merya i köji na Yuda.

⁴⁰ A nye lupöni ko Takaria kadi a rome ko Elisabeta.

⁴¹ A na yiŋge Elisabeta roman na Maria nu, a lupudi boboŋdi boboŋdu kanyit i pele. A Elisabeta iŋge jore ko Mulokotyo Loke.

⁴² a nye jambi ko gworo lobot adi, Do a ’boria i kiden na ŋutu wate, koti rimatat lo gwon konut i pele lo aje ’boria.

⁴³ Nan a ŋa anyen ŋote MATAT liŋ poŋdi i ’yo ’yu na nan na?

⁴⁴ Kogwon ’de ’de na yiŋge nan roman inot nu, a lupudi boboŋdi boboŋdu koyo i pele ko lyoŋon.

⁴⁵ Do nagon a yuŋ kulyaesi ti MATAT lo jamaki do kulo a kalyoŋi, kogwon se mo kokonaki do jojo.

Maria a yo ’yu koli pupurja Ŋun

⁴⁶ A Maria kulyani adi, Kodudwo nio toduma ’yu MATAT,

⁴⁷ toili liŋ lyolyoŋi ko Ŋun Kalwokonit liŋ,

⁴⁸ kogwon nye aje met tokoyok nio na koliponit nanyit. Kogwon mete, suluja soŋinana nyakwariat liŋ mo luŋgu nan a kalyoŋonit.

⁴⁹ Kogwon nye logon ko riŋit lo aje konakin nan ŋo dumalak. Karin kanyit a nake.

⁵⁰ Lepeŋ wowon konyen ko ŋutu liŋ logon kukuk lepeŋ kilo suluja i nyakwari tojo i lele.

⁵¹ Lepeŋ aje kweja riŋit nanyit ko konin lonyit iŋgo, a nye iŋge torekin ŋutu logon a kabulak ti ’borik i yeyeesi ti toilyet kase.

⁵² Nye aje nyokun kasarak kak i si ’daesi kase ti tumatyanjin, ama a nye iŋge ’bilikin ŋutu lokoyokak ki.

⁵³ Nye aje toyimonoju ŋutu logon ko magor ko ŋo na ’but, a nye iŋge rikörö ŋutu kwörinikö ko konisi kana.

⁵⁴ A nye iŋge parakin koliponit lonyit Yisaraeleŋwoso na milyekiŋdye nye merenyejin kaŋ nu;

⁵⁵ a nye iŋge yeyeju won konyen ko Abarayama se ko nyakwariat kanyit liŋ ŋupi ŋupi.

⁵⁶ A Maria iŋge si ’da ko lepeŋ yu ko yapala musala, a kirut yitwene mede.

Yuŋwe na Yoane Kabatisanit

⁵⁷ A diŋit na Elisabeta iŋge temakiŋdya nagon ta ’duuŋdye ŋuro; a nye yuŋuŋdye ŋuro lulalet.

⁵⁸ a maratejin kanyit se ko karu kanyit ko yiŋge adi MATAT aje won konyen ko lepeŋ parik, a se poki i lyoŋon ko lepeŋ i pirit na geleŋ.

⁵⁹ A kirut i perok budok a se poŋdi i taweŋu na lupudi, a se kodyo ’deke gwijo lepeŋ a Takaria ko karin ti monye lonyit.

⁶⁰ Ama a ŋote lupudi kulyani adi, ’Bayin, lepeŋ kodyo gwiyo a Yoane,

⁶¹ a lepeŋat kulyani ko lepeŋ adi, Lele karutyo ilot ’bayin logon a gwiyo ko kine karin.

⁶² a se yuyutakiŋdye monye lupudi anyen denuŋdya kaŋo ko nye ’dek lepeŋ gwiyo a na.

⁶³ A Takaria piyuŋdye ŋo anyen nye wuwur, a wuŋe adi, Karin kanyit a Yoane. A ŋutu liŋ iŋge soŋu.

⁶⁴ ’De ’de a kutuk nanyit ŋaji ŋaju, a ŋedep lonyit laggi laggu, a nye jambi jambu pupurja ŋun.

⁶⁵ A maratejin liŋ moka ko kujono, a kine kulya iŋge toreki i jur liŋ lo Yudaya logon a merya.

⁶⁶ A ŋutu liŋ lo yiŋga kulo ’delakiŋdye kine kulya kase i töilyet, pipija adi, A lo ŋuro mo worani a nyo? Kogwon ’diri konin lo MATAT gwon ko lepeŋ.

Koli lo Takaria

⁶⁷ A monye lonyit Takaria iŋge jore ko Mulökötyo Loke, a nye keŋ keju adi,

⁶⁸ Ti MATAT Ŋun lo Yisaraele purani pura, kogwon nye aje po i parakiŋdya na ŋutu kanyit, ko aje Iwoggu se.

⁶⁹ Nye aje topukokiŋdyo yi Kalwo konit lo riŋit i kotumit na koliponit lonyit Dawidi,

⁷⁰ gwoso na jambi nye i kutusen ti nebijin kanyit loke ti koju kulu,

⁷¹ adi nye mo Iwolwokun yi i merok kaŋ, ko i konisi ti ŋutu liŋ logon maman yi kilo.

⁷² Lepeŋ koti koju a kulya adi nye mo wowon konyen ko merenye-jin kaŋ, a nye mo yeyeji tomoret nanyit nake ko ŋutu kanyit.

⁷³ Nye aje milyekin merenye likaŋ Abarayama milye,

⁷⁴ adi, nye mo Iwolwokun yi i konisi ti merok kaŋ, a yi kitakiŋdye lepeŋ ’bak kujono,

⁷⁵ i kelan ko i torigwo kanyit i komor i perok liŋ logon yi gwogwolorgi kulo.

⁷⁶ Koti do ŋuro liŋ mo luou a nebi lo Katoŋanit lo ki liŋ, kogwon do mo woroji ko MATAT ŋerot i tetenaddu na kikolin kanyit,

⁷⁷ i tiŋdu na ŋutu kanyit i deŋdya na lwökt kogwon toronjin kase a pitöki.

⁷⁸ Kogwon Ŋun likaŋ a kanyaranit ko wowon konyen, a nye mo tiŋdi lor i nyerakin kayaŋ ki,

⁷⁹ anyen pararakiŋdya i ŋutu liŋ logon si ’da i mudwe logon twan gwon kata kilo, ko anyen tuworoddu mokosi kaŋ i kiko lo taliŋ.

⁸⁰ A ŋuro ’duroddi ki a worani a iŋgo i toili. A nye gwe i yobu tojo ko lor lo pukokiŋdye nye ko ŋutu ti Yisaraele lu.