Lewi 9 - Bibilia Buk na Ŋun nagon koti luŋu a

¹ A ko gwe sona i lor tobudök lonyit, a Mose luŋgi Arona ko ŋwajik kanyit ko temejik ti Yisaraele;

² a nye kulyani ko Arona adi, ’Dumuŋdye dwöt kolojityo a lo rubaŋga lo toron, se ko lopijot a lo rubaŋga lo ’yu ’yura ’buluŋ logon ’bak yuyukesi, ko wukiŋdye se ko MATAT i komor.

³ A do kulyani ko ŋutu ti Yisaraele adi, ’Dumuŋdye ta lopijot meetyo a lo rubaŋga lo toron, ko tagwok se ko kilolor liŋ murek logon ko kiŋa geleŋ logon ’bak yuyukesi a ti rubaŋga lo ’yu ’yura ’buluŋ,

⁴ se ko dwöt ko lopijot logon a ti rubaŋgajin ti taliŋ, anyen ’du ’duŋö ko MATAT i komor, se ko ’doket na ’bolot na ŋola ko welet; kogwon i lo lor MATAT de pupukökin kasu.

⁵ A se joŋdi ŋo na sarakin Mose kunu i komor na kemia torumet; a ŋutu liŋ lo momora kulo miju nyona a gwo ’de gwo ’dan ko MATAT i komor.

⁶ A Mose kulyani adi, ŋina a ŋo nagon MATAT a sarakin ta i koŋdya na; a minyo lo MATAT de puköki kasu.

⁷ A Mose kulyani ko Arona adi, Miju nyona i pirit ’yuret na rubaŋgajin, ko wukiŋdye rubaŋga ilot a lo toron ko rubaŋga ilot lo ’yu ’yura ’buluŋ, anyen do se ko mede inot totokela; ko wukiŋdye rubaŋga a lo kilo ŋutu, anyen se totokela; gwoso na saŋi MATAT nu.

⁸ Nyena a Arona miju nyona i nu pirit ’yuret na rubaŋgajin, a ’duŋge kolojityo a lo rubaŋga lo toron logon a lo mugun nanyit.

⁹ A ŋwajik ti Arona wukiŋdye lepeŋ rima, a nye sukiŋdye morinet lonyit i kine rima a sekiŋdye lepeŋat i oŋgwora ti pirit ’yuret na rubaŋgajin, a nye ’bukökiŋdye kine rima i mukök na pirit ’yuret na rubaŋgajin;

¹⁰ ama a nye ’yuŋe welesi ko puleŋa, se ko pilya na munyet ti ŋilo turu ’buti lo rubaŋga lo toron i pirit ’yuret na rubaŋgajin, gwoso na saŋi MATAT Mose nu.

¹¹ A nye ’yuŋe lokore se ko gober i kaŋo na mera.

¹² A nye ’duŋge rubaŋga lo ’yu ’yura ’buluŋ; a ŋwajik ti Arona tiŋdi lepeŋ rima, a nye pokakiŋdye se i mara ti pirit ’yuret na rubaŋgajin.

¹³ A se tiŋdi lepeŋ rubaŋga lo ’yu ’yura ’buluŋ a gonyesi gonyesi se ko kwe; a nye ’yuŋe se i pirit ’yuret na rubaŋgajin.

¹⁴ A nye lalaji monyet se ko ŋutukujin ko pioŋ, a ’yuŋe se ko rubaŋga lo ’yu ’yura ’buluŋ i pirit na geleŋ i pirit ’yuret na rubaŋgajin.

¹⁵ A nye wukiŋdye rubaŋga lo kilo ŋutu, a nye ’dumuŋdye meetyo lo rubaŋga lo toron logon a lo kilo ŋutu, a ’duŋge lepeŋ, a nye wukiŋdye lepeŋ a lo toron, gwoso rubaŋga lo kokwe lo toron lu.

¹⁶ A nye tiŋdi rubaŋga lo ’yu ’yura ’buluŋ, a wukiŋdye lepeŋ gwoso i saret.

¹⁷ A nye wukiŋdye ’doket na ’bolot, a sunuŋdye se ko könin jore, a ’yuŋe se i pirit ’yuret na rubaŋgajin, wat rubaŋga lo ’yu ’yura ’buluŋ lo ko ’bure.

¹⁸ A nye koti ’duŋge dwöt ko lopijot logon a ti rubaŋgajin ti taliŋ i kulya ti kilo ŋutu; a ŋwajik ti Arona tiŋdi lepeŋ rima nagon nye pokakin i mara ti pirit ’yuret na rubaŋgajin na,

¹⁹ se ko welet na dwöt ko na lopijot, ko kotesi nagon a welesi ko röpisi ti monyet, ko puleŋa, ko pilya na munyet;

²⁰ a se tiŋdi welesi i jujukön loki, a nye ’yuŋe welesi i pirit ’yuret na rubaŋgajin,

²¹ ama a Arona kweji jujukön kune ko nyutiöt lutatenyan kulo a rubaŋga lo kwekweya ko MATAT i komor; gwoso na saŋi Mose nu.

²² A kirut Arona ’biluddi könisi kanyit ki ko ŋutu kulo yu a ’boroji lepeŋat; a nye kiyuŋdye kak i mukök nagon nye aje wukiŋdya rubaŋga lo toron ko rubaŋga lo ’yu ’yura ’buluŋ se ko rubaŋgajin ti taliŋ nu.

²³ A Mose se ko Arona lupöni i kemia torumet lukata; a na lupuŋdye se kaŋo nu a se ’boroji kilo ŋutu, a minyo lo MATAT puköki i ŋutu liŋ.

²⁴ A kimaŋ puku kaŋo ko MATAT i komor a totumbe rubaŋga lo ’yu ’yura ’buluŋ se ko welet na gwon i pirit ’yuret na rubaŋgajin loki na; a na meddi ŋutu liŋ kine kulya nu, a se woŋoro ki, a ’dorone kak rupu.