Lewi 8 - Bibilia Buk na Ŋun nagon koti luŋu a

’Boroki na Arona se ko ŋwajik kanyit

¹ A MATAT jambi ko Mose adi,

² Joŋgi Arona ko ŋwajik kanyit i pirit na geleŋ, se ko boŋgwat, ko nu welet na welaki ’e se a koanejin na, ko dwöt lo rubaŋga lo toron, ko lopijoki murek, se ko kupö lo ambatajin nagon ’bak kape;

³ luŋgi ŋutu liŋ i momoruŋdya i kötumit na kemia torumet.

⁴ A Mose koŋdi koŋdya gwoso na saŋi MATAT nye nu; a ŋutu liŋ momoruŋdye i kötumit na kemia torumet.

⁵ A Mose jambi ko momoret adi, Na a ŋo nagon MATAT a sarakin i kona.

⁶ A Mose joŋdi Arona ko ŋwajik kanyit, a tukwöji lepeŋat ko pioŋ.

⁷ A nye tojubbi Arona ko jölöbiya, a dukuki-ŋdye lepeŋ kamba, a tojubbi lepeŋ ko boŋgo muit, a tiŋdi epoda ko lepeŋ i mugun, a doggi lepeŋ ko kamba na epoda na gweya ko tobodwan, a tora-kiŋdye lepeŋ kanyit i mugun.

⁸ A nye tiŋdi muket na kido ko lepeŋ i jujuk, a nye sukiŋdye Urim ko Tumim i nu muket na kido lukata.

⁹ A nye tiŋdi ema kanyit i kwe, a nye tiŋdi beleŋ beleŋ nagon a dakap nagon a Iŋguya loke lo rurwan, i nu ema loki i komor nanyit, gwoso na saŋi MATAT Mose nu.

¹⁰ A Mose ’dumuŋdye ŋinu welet, a nye we ’yi nu kemia ko ŋo liŋ na gwon lukata kune, a nye geluŋdye se a nake na rurwan.

¹¹ A nye gwatakiŋdye nene welet i pirit ’yuret na rubaŋgajin daŋin butyo, a nye we ’yi pirit ’yuret ko tito kanyit liŋ, ko lalaet se ko mukök nanyit, anyen geluŋdya se a nake na rurwan.

¹² A nye ’bukökiŋdye nene na ŋina welet ko Arona i kwe, a we ’yi lepeŋ anyen geluŋdya lepeŋ a loke lo rurwan.

¹³ A Mose joŋdi ŋwajik ti Arona kulo, a tojubbi se ko jölöbiyajin, a doggi mukökö kase ko kambajin, a torakiŋdye lepeŋat töröbusijin, gwoso na saŋi MATAT Mose nu.

¹⁴ A nye joŋdi dwöt a lo rubaŋga lo toron; a Arona ko ŋwajik kanyit sopakiŋdye könisi kase i kwe na dwöt lo rubaŋga lo toron lo.

¹⁵ A Mose ’duŋge lepeŋ, a ’dumuŋdye rima, a sekiŋdye ko morinet lonyit i oŋgwora ti pirit ’yuret na rubaŋgajin kanyit i mara, a toke ’yi nu pirit ’yuret, a ’bukökiŋdye rima i mukök na pirit ’yuret na rubaŋgajin, a geluŋdye lepeŋ a nake na rurwan, anyen lepeŋ totokela,

¹⁶ A nye ’dumaddi welesi liŋ na gwon i monyet, ko pilya na munyet, se ko puleŋa murek ko welesi kase, a Mose ’yuŋe lepeŋat i pirit ’yuret na rubaŋgajin.

¹⁷ Ama a nye totumbe lu dwöt, ko gober lonyit, ko lokore nanyit, se ko moyok kanyit i kaŋo na mera, gwoso na saŋi MATAT Mose nu.

¹⁸ A nye joŋdi lopijot a lo rubaŋŋ lo ’yu ’yura ’buluŋ, a Arona ko ŋwajik kanyit sopakiŋdye könisi kase ko lopijot i kwe.

¹⁹ A Mose ’duŋge lepeŋ, a pokakiŋdye rima i mara ti pirit ’yuret na rubaŋgajin.

²⁰ A nye gögöŋdi lu lopijot, a Mose ’yuŋe kwe ko gonyesi ko welet.

²¹ A nye lalaji monyet ko ŋutukujin ko pioŋ, a Mose ’yuŋe lu lopijot ’bukuluŋ i pirit ’yuret na rubaŋgajin loki a rubaŋga lo ’yu ’yura ’buluŋ, anyen möara paleleŋ, a ŋo nagon ’yuraki MATAT, gwoso na saŋi MATAT Mose nu.

²² A nye joŋdi lele lopijot logon a ’boriet; a Arona se ko ŋwajik kanyit sopakiŋdye könisi kase ko ŋilo lopijot i kwe.

²³ A Mose ’duŋge lepeŋ, a ’du-muŋdye kunie rima kanyit a sekiŋdye ko Arona i kaböbölöŋti na swöt lo lutaten ko i morinet duma lo könin lonyit lo lutaten, ko i morinet duma lo moköt lonyit lo lutaten.

²⁴ A nye joŋdi ŋwajik ti Arona kulo, a Mose sekiŋdye kunie rima i kaböbölöŋon ti swö kase lutatenyan, ko i morin dumalak ti könisi kase lutatenyan, ko i morin dumalak ti mokosi kase lutatenyan; a Mose pokakiŋdye rima i mara ti pirit ’yuret na rubaŋgajin.

²⁵ A nye ’dumu-ŋdye welet, ko kotet nagon a welet, ko welesi liŋ na gwon i munyet, ko pilya na munyet, ko puleŋa murek ko welesi kase, se ko nyuti lo lutaten;

²⁶ a nye ’dumaddi ambata geleŋ nagon ’bak kape, ko ambata geleŋ nagon a ŋola ko welet, ko kisera geleŋ i lo kupö, a nye sopakiŋdye se i welet loki ko i nyuti lo lutaten loki;

²⁷ a nye tiŋdi kine ŋo liŋ ko Arona i könisi ko i könisi ti ŋwajik kanyit, a nye kweji lepeŋat a rubaŋga lo kwekweya ko MATAT i komor.

²⁸ A Mose wuji kine ŋo kase i könisi, a ’yuŋe se i pirit ’yuret na rubaŋgajin ko lu rubaŋga lo ’yu ’yura ’buluŋ i pirit na geleŋ, gwoso rubaŋga ’boriet, nye a ŋo na mon paleleŋ na ’yuraki MATAT.

²⁹ A Mose ’dumuŋdye jujuk, a kweji lepeŋ a rubaŋga lo kwekweya ko MATAT i komor; ŋina a koret na Mose i lopijot ’boriet, gwoso na saŋi MATAT Mose nu.

³⁰ A Mose ’dumuŋdye nene welet ko kunie rima na gwon i pirit ’yuret na rubaŋgajin kune, a nye gwatakiŋdye se ko Arona i mugun ko i boŋgwat kanyit, ko koti i ŋwajik kanyit ko i boŋgwat ti ŋwajik kanyit; a nye geluŋdye Arona ko boŋgwat kanyit, ko ŋwajik kanyit ko boŋgwat ti ŋwajik kanyit anyen se gwon a loke lo rurwan.

³¹ A Mose takiŋdye Arona ko ŋwajik kanyit adi, Deŋi ta lokore i kotumit na kemia torumet, ko nyesi ta lepeŋ nyu se ko ambatajin na gwon i kupö lo wuki ’e ’boriesi lu, gwoso na saŋi nanadi, Arona ko ŋwajik kanyit ködyö nyesu se nu;

³² a ta ’yuŋe lokore nagon a pituŋdyö na se ko ambatajin nagon a pituŋdyö kune.

³³ a ta tine tu kaŋo i kötumit na kemia torumet ko perok buryo tojo ko perok kasu ’boriesi a temakiŋdya, kogwon ’boroki nasu mo joŋga perok buryo.

³⁴ Ŋo nagon a kona i lo lor na MATAT lo sarakiŋdya anyen ta totokela.

³⁵ A ta momordi i kötumit na kemia torumet tuparan ko tukwaje perok buryo i ’debba na saret lo MATAT an ta twatwa; kogwon a saraki nan sona.

³⁶ A Arona ko ŋwajik kanyit koŋdi ŋo liŋ nagon MATAT a sarakin ko Mose i kutuk kunu.