Lewi 7 - Bibilia Buk na Ŋun nagon koti luŋu a

¹ Ŋilo a saret logon wuki ’e rubaŋga i kulya ti lyaŋan. Nye a loke parik lo rurwan.

² Se ködyö ’duŋgö turu ’buti lo rubaŋga i kulya ti lyaŋan i nu pirit ’duŋet na rubaŋgajin lo ’yu ’yura ’buluŋ, a rima kanyit pokakine i nu pirit ’yuret na rubaŋgajin i mara kanyit.

³ Welesi ti ŋilo turu ’buti liŋ kodyo wuwuki, kweja adi kotet nagon a welet, ko welet na röbbu monyet,

⁴ ko puleŋa murek ko welesi na gwon ko lepeŋat kune nyona ko nyutiöt, se ko pilya na munyet nagon nye ’dumara ko puleŋa i pirit na geleŋ;

⁵ a koane ’yurakiŋdye MATAT lepeŋat a rubaŋga i nu pirit ’yuret na rubaŋgajin; ŋilo a rubaŋga i kulya ti lyaŋan.

⁶ ŋutu lyan liŋ i kiden na kötumit na koanejin bubulö nyesu kata, nye ködyö nyei i nene pirit nake na rurwan; ŋilo a rubaŋga loke parik lo rurwan.

⁷ Rubaŋga i kulya ti lyaŋan gwon gwoso rubaŋga lo toron, saret lose geleŋ kata, adi koane lo wukiŋdya ŋilo rubaŋga anyen ŋutu totokela lo joŋgi lepeŋ a lonyit.

⁸ A koane lo wukiŋdya rubaŋga lo ’yu ’yura ’buluŋ i kulya ti lele ŋuto lo, bubulö joŋga gober lo turu ’buti logon nye a wukin a rubaŋga lo ’yu ’yura lo a lonyit.

⁹ A ’dokesi liŋ ti ’bolot na pelo i pirit namet ko se liŋ na kelo i sape kode i doka kune gwe a ti koane lo wukiŋdya se lo.

¹⁰ A ’dokesi ti ’bolot liŋ, kode a ŋola ko welet kode a nateyok liŋ gwe a ti ŋwajik ti Arona, lepeŋat ŋaŋu jojo.

¹¹ Ŋilo a saret logon wuki ’e rubaŋgajin ti taliŋ logon ŋuto kodyo wuwukin MATAT.

¹² A ko nye a wukiŋdya rubaŋga lo taliŋ a lyöŋit, nyena a nye wukiŋdye ko ŋilo rubaŋga lyöŋit i pirit na geleŋ ambatajin nagon ’bak kape nagon a ŋola ko welet, ko kisera nagon ’bak kape na welaki welet loki, se ko ambatajin ti ’bolot na jiö a naliliŋök nagon a ŋola ’bura ko welet.

¹³ Nye kodyo joŋdya rubaŋga lonyit lo taliŋ a lyöŋit mora ko ambatajin nagon ko kape.

¹⁴ A i kine ’dokesi a nye wukiŋdye geleŋ i gweyari geleŋ, geleŋ i gweyari geleŋ a ’doket na ’dumaki MATAT; a kine ŋo geleŋ geleŋ gwe a ti koane lo pokakiŋdya rima ti rubaŋgajin ti taliŋ lo.

¹⁵ A lokore na ’duŋö a na rubaŋga lonyit lo taliŋ logon a lyöŋit lo ködyo nyeni i lor lo wuki ’e nye lu; a nye tine pitun nene pitönö nanyit tojo i ko ’bure.

¹⁶ Ama ko rubaŋga lo wukin nye lo a rubaŋga lo milye, kode logon wuki ko tupalikan na töili lo, ködyo nyeni i lor logon nye wukiŋdye rubaŋga lonyit lu, a ŋo nagon a pituŋdyö kata kune nyeni i ko ’bure,

¹⁷ ama a pitönö na lokore na pituŋdyö i ŋilo rubaŋga i perok musala na kodyo totumöni ko kimaŋ.

¹⁸ A ko nene lokore na ’duŋö a na rubaŋga lonyit lo taliŋ a nyei i lor tomusala lonyit, a nye lo wukiŋdya lepeŋ lo tine rukö, a ŋilo rubaŋga tine kena a lonyit; a ŋilo rubaŋga gwe a ŋo lo mamana, a ŋuto logon a nyesu kata lo mo ’doggi toron nanyit.

¹⁹ A lokore na ’bo ’yu nene ŋo nagon a lut i kulya ti keri na ködyö tine nyei; a nye totumöni totumö ko kimaŋ. ŋutu liŋ logon a loke i kulya ti keri kulo bubulö nyesu lokore,

²⁰ ama ŋuto lo nyesu lokore na ’duŋö a na rubaŋga lo wuki MATAT kogwon taliŋ lo, ko nye gwon ko nene ŋo kanyit i mugun nagon tiŋdu lepeŋ gwon a lut i kulya ti keri, a lu ŋuto kodyo riköjine kaŋo i ŋutu kanyit.

²¹ A ko lele ŋuto a ’bo ’yu nene ŋo nagon a lut i kulya ti keri, kode a lut ti ŋuto, kode a kijakutat logon a lut i kulya ti keri, kode a nene ŋo na mamana nagon a lut, a nye nyesi lokore na ’duŋö a na lubaŋga lo wuki MATAT kogwon taliŋ na, ŋilo ŋuto kodyo riköji kaŋo i ŋutu kanyit.

²² A MATAT jambi ko Mose adi,

²³ Taki ŋutu ti Yisaraele adi, Ta ti nyesu welet na dwöt, kode na köbilityo, kode na meetyo.

²⁴ Welet na turu ’buti nagon twan ka ’de, kode welet na turu ’buti nagon gworoŋ lo koja bubulö kitarikin kunie kitajin, ama ta ti nyö se kwöŋ.

²⁵ Ko lon ŋuto lo nyesu welet na turu ’buti, nagon nye a wukin MATAT lele swöt anyen ’yu ’yura, a ŋuto lo nyesu lo ködyö riköjine kaŋo i ŋutu kanyit.

²⁶ Ta ködyö ti nyesu rima kwöŋ kasu i midijik, kode se a rima ti kwen, kode a ti toro ’bo, kode a ti kijakwa.

²⁷ A ko ŋa lo nyesu rima, ŋilo ŋuto riköji kaŋo i ŋutu kanyit.

²⁸ A MATAT jambi ko Mose adi,

²⁹ Taki ŋutu ti Yisaraele adi, ŋuto logon wukiŋdya nan MATAT rubaŋga lonyit lo taliŋ lo ködyö joŋdya swöt logon gelwe a lo MATAT i ŋilo rubaŋga.

³⁰ Nye joŋdya ko könisi kanyit ŋo na ’yuraki MATAT kune; kweja adi nye joŋdya welet na ŋilo turu ’buti se ko jujuk, anyen ŋina jujuk kwekweya ko MATAT i komor a rubaŋga lo kwekweya.

³¹ A koane ködyö ’yuŋe ŋina welet i pirit ’yuret na rubaŋgajin loki, ama jujuk gwon a na Arona ko ŋwajik kanyit.

³² A ta tiŋdi koane nyuti lo lutaten a ’doket na ’dumaki i ’duŋesi kasu ti rubaŋgajin ti taliŋ;

³³ A koane logon a lo ŋwajik ti Arona, logon a wukiŋdya rima ti toro ’bo se ko welet lo wuji nyuti lo lutaten a koret nanyit.

³⁴ Kogwon jujukön na kwekweya kune ko nyutiöt lo wuwuki kulo nan aje ’dumara kaŋo i ŋutu ti Yisaraele, i rubaŋgajin kase ti taliŋ, a tiŋdi koane Arona se ko ŋwajik kanyit a koret na yeŋ nyin i ŋutu ti Yisaraele.

³⁵ ŋina a koret nagon tiki Arona se ko ŋwajik kanyit i rubaŋgajin lo ’yuraki MATAT kulo, logon a gelaki se i lor lo jwe ’i se ko MATAT i komor i kitakiŋdya na lepeŋ a koanejin lu;

³⁶ MATAT a sara-kiŋdya adi ti ŋutu ti Yisaraele tiki lepeŋat kine ŋo i lor lo welaki ’e se a koanejin lu; ŋina a koret na yeŋ nyin temba i nyakwariat kase.

³⁷ Kilo a saresi ti rubaŋga lo ’yu ’yura ’buluŋ, ko lo ’doket na ’bolot, ko lo lubaŋga lo toron, ko lo rubaŋga i kulya ti lyaŋan, ko lo ’boroki, ko lo taliŋ,

³⁸ logon MATAT a sarakin Mose i mere Sinai, i lor lo saŋi nye ŋutu ti Yisaraele i joŋdya na rubaŋgajin kase ko MATAT i komor i yöbu na Sinai lu.