Lewi 6 - Bibilia Buk na Ŋun nagon koti luŋu a

¹ A MATAT jambi ko Mose adi,

² Ko lele ŋuto a toroŋdya ko a ’bele-ŋgu saret lo MATAT, i mumulugga na marate lonyit i kulya ti ŋo nagon tiki lepeŋ anyen ’de ’de kune kode nagon tiki a togwoet, ko lepeŋ a koko ’ya, kode ko nye aje ru ’ya marate lonyit,

³ kode ko nye a ryö ŋo nagon a likin a iŋge jambu ’burönö i kine kulya, kode a milyeju a ’burönö, kweja adi ko lepeŋ a koŋdya nene na kine ŋo nagon ŋutu yeŋon koŋdya a toroŋdi kata kune;

⁴ a ko lele ŋuto aje toroŋdya a gwe ko toron, a nye ködyö nyökökiŋdye ŋo nagon nye a kokolara na kode ŋo na ryö nye ko ru ’ya na, kode ŋo na tiki lepeŋ anyen ’de ’de kune, kode ŋo na likin na ryö lepeŋ nu,

⁵ kode nene ŋo nagon nye aje milyeju a ’burönö i kulya kanyit na. Nye ködyö roröŋ ŋina ŋo ’bukuluŋ, a ’yalakiŋdye swöt geleŋ na mukanat nyin, a tiŋdi monye kine ŋo, i lor lo wukiŋdye nye rubaŋga lonyit i kulya ti lyaŋan lu.

⁶ A nye jakiŋdye koane rubaŋga lonyit lo konaki MATAT i kulya ti lyaŋan. ŋilo rubaŋ ködyö gwon a lopijot köbilityo logon ’bak yuyuket, lo dumwe i teŋa yidin kata, gwoso i kenet inot na ropet na rubaŋga i kulya ti lyaŋan;

⁷ a koane wukiŋdye ŋilo lopijot ko MATAT i komor anyen ŋilo ŋuto totokela, a nye pitökine pitöki i konesi kanyit liŋ nagon a lyaŋesi, nagon a tiŋdu lepeŋ i gwon ko toron kune.

Kulye saresi i kulya ti wuki na rubaŋgajin

⁸ A MATAT jambi ko Mose adi,

⁹ Saŋi Arona ko ŋwajik kanyit adi, Ŋilo a saret lo rubaŋga lo ’yu ’yura ’buluŋ. rubaŋga lo ’yu ’yura ’buluŋ kodyo gwon i pirit namet i nu pirit ’yuret na rubaŋgajin loki tukwaje liŋ tojo ko ko ’bure. Ti kimaŋ gwe ti twan i pirit ’yuret na rubaŋgajin loki.

¹⁰ A koane kodyo jupukiŋdye boŋgo nanyit na waratat, a jupukiŋdye boŋgo na mok nagon a waratat kanyit i mugun,

¹¹ A nye sukuŋdye kurök ti rubaŋga lo ’yu ’yura ’buluŋ logon kimaŋ a totum lo i pirit ’yuret na rubaŋgajin loki, a nye tiŋdi se kak i merete lo nu pirit ’yuret. A nye rösöddi kine boŋgwat kanyit kaŋo a jupukiŋdye kunie, a yunaddi kine kurök kaŋo i ŋiera a joŋgi i nene pirit nake.

¹² A kimaŋ na nu pirit ’yuret na rubaŋgajin ködyö kobbi i loki nanyit, a tine twan; a koane nambi kaden i loki nanyit temba i ko ’bure, a nye peddi rubaŋga lo ’yu ’yura ’buluŋ lo i miru kanyit loki, a ’yuŋe welesi ti ’toro ’bo ti rubaŋgajin ti taliŋ kanyit loki.

¹³ Kweja adi kimaŋ kodyo kokob-bu i nu pirit ’yuret na rubaŋgajin i diŋitan liŋ a tine twan.

¹⁴ A ŋilo gwe a saret lo ’doket na ’bolot. ŋwajik ti Arona ködyo wukiŋdya se ko MATAT i komor, i komor na nu pirit ’yuret na rubaŋgajin.

¹⁵ A lele lose sunuŋdye kata könin geleŋ lo ’bolot naliliŋök ti nu ’doket na ’bolot se ko welet nanyit, ko bökur lokwe liŋ lo gwon i nu ’doket na ’bolot loki lu, a nye ’yuŋe se i nu pirit ’yuret na rubaŋgajin loki koret toyeyeet, anyen möara paleleŋ ko MATAT yu.

¹⁶ a Arona ko ŋwajik kanyit nyesi pitönö kune; a se nyesi kine ’bolot kana ’bak kape i nene pirit nake na rurwan i mariŋ na kemia torumet lukata.

¹⁷ a se ködyo tine dera ko kape. Nan aje tin lepeŋat kine ’bolot i gwon a koret nase na rubaŋga jin kwe lo ’yu ’yura; se a ŋo nake parik na rurwan, gwoso rubaŋga lo toron se ko rubaŋga i kulya ti lyaŋan.

¹⁸ Ŋutu lyan liŋ i kiden na nyakwariat ti Arona nyesu kata, gwoso na saraki ’e ŋupi temba i nyakwariat kasu liŋ nu. i rubaŋgajin logon ’yuraki MATAT kulo; ko ŋa lo ’bo ’yu kilo rubaŋgajin a ködyö gelwene kaŋo a lo rurwan.

¹⁹ A MATAT jambi ko Mose adi,

²⁰ ŋilo a rubaŋga logon Arona ko ŋwajik kanyit ködyö wukin nan MATAT i lu lor lo wuki ’e lepeŋ lu, kweja adi, swöt topuökit geleŋ na wuyit nagon a epa na ’bolot na jiö a naliliŋök a ’doket na ’bolot nagon yeŋon koko-natu, lele swöt lose tiki i ko ’bure ko lele i sömukö.

²¹ A kine ’bolot ködyö keloni ko welet i doka loki; do joŋdya se a ŋola ’bura, a do wukiŋdye se a tupesi na dedera gwoso i nene ’doket na ’bolot, a do wukiŋdye se anyen möara paleleŋ ko MATAT yu.

²² A koane logon a welaki logon a lele lo ŋwajik ti Arona logon ruddya lepeŋ lo kodyo wukiŋdye kine ’bolot; a se ’yurakine MATAT kogwon saret lo wurö anyen yeŋon ŋupi. Se kodyo ’yu ’yura ’buluŋ.

²³ Kweja adi ’dokesi ti ’bolot nagon koane lo ’doggi MATAT kune ’yu ’yura ’bukuluŋ, a tine nyei kwöŋ.

²⁴ A MATAT jambi ko Mose adi,

²⁵ Taki Arona ko ŋwajik kanyit adi, ŋilo a saret lo rubaŋga lo toron. rubaŋga lo toron ködyo ’du ’duŋö koyo i komor nan MATAT i nu pirit ’duŋet na rubaŋga lo ’yu ’yura ’buluŋ; nye a loke parik lo rurwan.

²⁶ A koane lo wukiŋdya rubaŋga a lo toron lo nyesi lepeŋ i nene pirit nake na rurwan i mariŋ na kemia torumet lukata.

²⁷ A ŋo liŋ lo ’bo ’yu lokore nanyit kulo gwe a lo rurwan, a ko kunie rima kanyit a gwatakiŋdya i nene boŋgo, a do ködyo lalaji nu boŋgo na gwataki rima nu i nene pirit nake na rurwan.

²⁸ A sape lo derarikin lokore lo ködyö gwalakani gwalaka; ama ko nye a dera i sape logon a mölwö, a ŋilo sape potoni poto a lalani ko pioŋ.

²⁹ A ŋutu lyan liŋ i kiden na kötumit na koanejin kilo buloni bulö nyesu kata; ŋilo a loke parik lo rurwan.

³⁰ A ma ti rubaŋga lo toron gwe ti nyei logon rima kanyit a joŋa tojo i kemia torumet lukata, anyen tokelarikin toron i lukata na pirit nake na rurwan; ŋilo rubaŋga totumö ko kimaŋ.