Lewi 5 - Bibilia Buk na Ŋun nagon koti luŋu a

¹ Ko lele ŋuto a luŋu i tökoŋu na kulya, a ko lepeŋ a kukuki go i tuggö na ŋo nagon nye a met kode a yiŋ kune, a nye gwe a ko tukun kaŋo, ŋilo ŋuto gwon ko toron a mo ’doggi toron nanyit.

² A ko lele ŋuto a ’bo ’yu nene ŋo nagon a lut i kulya ti keri, kode a lokore na kijakutat nagon a lut i kulya ti keri, kode a lokore na turu ’buti nagon a lut i kulya ti keri, kode a lokore na ŋo na koko ’yokta kak nagon a lut i kulya ti keri, a nye gwe a ko den kine kulya, a nye aje wora a lut, ŋilo ŋuto gwon ko toron.

³ Kode ko nye a ’bo ’yu lut ti ŋuto, kode a lon gweyari lo lut nagon tolud-dya lepeŋ i kulya ti keri, a nye gwe a ko den kine kulya, ko nye a den kine kulya, ŋilo ŋuto gwon ko toron.

⁴ Kode ko lele ŋuto a tuggö ko kutuk nanyit milye lo rarame anyen nye koŋdya ŋo naron kode ŋo na ’but, kweja adi lon gweyari lo milyejin lo rarame logon ŋutu mimilyeji kulo, a nye gwe a ko den kine kulya, ko nye a den kine kulya, ŋilo ŋuto gwon ko toron i nene na kine kulya.

⁵ A ko lele ŋuto gwon ko toron i nene na kine kulya, ti nye tuŋge toron nanyit na kon nye na,

⁶ a nye ködyö joŋdi rubaŋga a ropet lo toron ko MATAT ni kogwon ŋina toron na kon nye na. Turu ’buti na jon nye a ropet na toron na ködyö gwon a kine nanakwan na ’dumwe i teŋ na yidin, kode a tore na köbilityo kode a tore na meetyo, a koane wukiŋdye ŋina turu ’buti anyen ŋilo ŋuto totokela i toron nanyit.

⁷ Ama ko nye ti jukin tiŋdu kilolor, nyena a nye ködyö joŋdi gureki murek kode torela murek ti luguriet ko MATAT ni a rubaŋga lo lyaŋan i kulya ti nu toron na kon nye nu. Nene kwenti a na rubaŋga lo toron, a nene gwe a na rubaŋga lo ’yura ’buluŋ.

⁸ A nye joŋdi se ko koane ni; a koane wukiŋdye a kokwe kwenti nagon a na rubaŋga lo toron na;

⁹ a nye ködyö miriŋdye kwe nanyit i murut, kweja adi nye ti ’duŋun kaŋo, a nye pokakiŋdye kunie rima ti rubaŋga lo toron i merete lo pirit ’yuret na rubaŋgajin, ama a pitönö ti rima kune towuene kak i mukök na pirit ’yuret na rubaŋgajin; ŋilo a rubaŋga lo toron.

¹⁰ A koane wukiŋdye kwenti tomurek na a rubaŋga lo ’yu ’yura ’buluŋ gwoso isaret; a koane koŋdi sona anyen ŋilo ŋuto totokela i ŋina toron na kon nye na, a nye pitökine pitöki.

¹¹ Ama ko nye ti jukin tiŋdu gureki murek kode torela murek ti luguriet, nyena ti nye joŋdi swöt topuökit geleŋ na wuyit nagon a epa na ’bolot na jiö a naliliŋök a ti rubaŋga lonyit lo ŋina toron na kon nye na; a nye ködyö tine tiŋdu welet i se, a köti tine tiŋdu bökur lokwe nyin, kogwon ŋilo a rubaŋga lo toron.

¹² A nye joŋdi lepeŋat ko koane ni, a koane sunuŋdye se ko könin jore gwoso koret toyeyeet, a ’yuŋe se i pirit ’yuret na rubaŋgajin, i loki na rubaŋgajin lo ’yuraki MATAT kulo ŋilo a rubaŋga lo toron.

¹³ Nyena a koane koŋdi sona anyen ŋilo ŋuto totokela i Ŋina toron na kon nye i nene na kine kulya na jama kunu, a nye pitökine pitöki. A pitönö ti ’bolot kune ködyö gwe a ti koane gwoso i ’doket na ’bolot.

Rubaŋgajin i kulya ti lyaŋan

¹⁴ A MATAT jambi ko Mose adi,

¹⁵ Ko lele ŋuto a ’beleŋgu saret a iŋge toroŋdya ’bak denet i nene na ŋo nake na rurwan ti MATAT, ti nye joŋdi lopijot ko MATAT ni a rubaŋga lonyit lo lyaŋan. ŋilo lopijot köbilityo lo ’dumwe i teŋ na yidin kata lo ködyö gwon ’bak yuyuket. Do ködyö keŋdya ’bulit na ŋilo lopijot köbilityo gwoso pödöjin na tema ko sekele na pirit nake na rurwan; ŋilo a rubaŋga i kulya ti lyaŋan.

¹⁶ A ŋilo ŋuto köti ködyö ropakiŋdye ŋo nagon nye a kon a lyanit i ŋo nake na rurwan, a ’yala-kiŋdye swöt geleŋ na mukanat nyin a tiŋdi koane; a koane wukiŋdye lopijot köbilityo a rubaŋga i kulya ti lyaŋan, anyen ŋilo ŋuto totokela a nye pitökine pitöki.

¹⁷ A ko lele ŋuto a toroŋdya i koŋdya na nene na kine ŋo nagon MATAT aje sarakin adi ti kona kune, ma ’di nagon nye a ko den, ama nye gwon ko toron a nye mo ’doggi toron nanyit.

¹⁸ A nye ködyö jakiŋdye koane lopijot köbilityo logon ’bak yuyuket lo ’dumwe i teŋ na yidin kata, gwoso i kenet inot na ropet na rubaŋga i kulya ti lyaŋan, a koane wukiŋdye ŋilo lopijot kogwon lyanit na kon ŋilo ŋuto ’bak denet na anyen lepeŋ totokela, a nye pitökine pitöki.

¹⁹ Ŋilo a rubaŋga i kulya ti lyaŋan; kogwon ŋilo ŋuto gwon ko toron ko MATAT i komor.