Lewi 4 - Bibilia Buk na Ŋun nagon koti luŋu a

¹ A MATAT jambi ko Mose adi,

² Taki ŋutu ti Yisaraele adi, Ko lele ŋuto a koŋdya toron ’bak denet i nene na kine ŋo nagon MATAT a sarakin adi ti kona kine, a mo koŋdi nene nase,

³ a ko ŋilo a koane lo welaki i kita lo a toroŋdya a iŋge jakiŋdya ŋutu toron sona, nyena ti lepeŋ wukiŋdye MATAT lele dwöt lo ’dit logon ’bak yuyuket a rubaŋga lo toron kogwon ŋina toron na kon nye na.

⁴ A nye ködyö joŋdi dwöt ko MATAT i komor i kötumit na kemia torumet, a sopakiŋdye könin lonyit i kwe na dwöt, a ’duŋge lu dwöt ko MATAT i komor.

⁵ A koane lo welaki i kita lo ’dumaddi kunie ti rima ti ŋilo dwöt a joŋgi lepeŋat tojo i kemia torumet;

⁶ a koane sööddi morinet lonyit i kine rima lukata, a gwagwaddi i kine rima kata daŋin buryo ko MATAT i komor, i komor na nu boŋgo koret na pirit nake na rurwan.

⁷ A koane seki-ŋdye kunie rima i oŋgwora ti nu pirit ’yuret na bökur lo mon paleleŋ ko MATAT i komor, na gwon i kemia torumet lukata, a nye ’bukökiŋdye pitönö ti rima ti ŋilo dwöt kune i mukök na pirit ’yuret na rubaŋgajin lo ’yu ’yura ’buluŋ, na gwon i kötumit na kemia torumet nu.

⁸ A nye ’dumaddi welesi liŋ ti ŋilo dwöt lo rubaŋga lo toron, kweja adi welet na röbbu monyet se ko welesi liŋ na gwon i monyet,

⁹ ko puleŋa murek ko welesi na gwon ko lepeŋat kune nyona ko nyutiöt, se ko pilya na munyet nagon nye ’dumara ko puleŋa i pirit na geleŋ na,

¹⁰ (jojo gwoso na ’dumwe i dwöt lo ’duŋö a lo rubaŋga lo taliŋ kune), a koane ködyö ’yuŋe lepeŋat i nu pirit ’yuret na rubaŋgajin lo ’yu ’yura ’buluŋ.

¹¹ Ama a gober lo dwöt ko lokore nanyit ’bukuluŋ, ko kwe nanyit, ko ŋutukujin kanyit, ko monyet kanyit, ko moyok kanyit,

¹² kweja adi nye ’dokoro ŋilo dwöt ’bukuluŋ i mera kaŋo tojo i pirit nake na ’bukörikin kurök, a totumbe ŋilo dwöt ko kimaŋ ko kaden; iŋkoi, ŋilo dwöt totumö i pirit na ’bukörikin kurök.

¹³ A ko momoret na Yisaraele liŋ a koŋdya toron ’bak denet, a ŋina ŋo iŋge mukö ko momoret i konyen, a se iŋge koŋdya nene na kine ŋo nagon MATAT a sarakin adi ti kona kune, a se gwe ko toron;

¹⁴ a ko toron na kon se na aje dena, a momoret ködyö wukiŋdye dwöt lo ’dit a rubaŋga lo toron, a joŋdi nye i komor na kemia torumet;

¹⁵ a temejik ti momoret sopakiŋdye könisi kase i kwe na ŋilo dwöt ko MATAT i komor, a ŋilo dwöt ’duŋöni ’duŋö ko MATAT i komor.

¹⁶ A koane lo welaki i kita lo ködyö joŋgi kunie ti kine rima ti ŋilo dwöt tojo i kemia torumet,

¹⁷ a koane sööddi morinet lonyit i kine rima lukata, a gwagwaddi se daŋin buryo ko MATAT i komor, i komor na nu boŋgo koret.

¹⁸ A nye sekiŋdye kunie rima i oŋgwora ti pirit ’yuret na rubaŋgajin na gwon i kemia torumet lukata ko MATAT i komor nu, a nye ’bukökiŋdye pitönö ti rima kune i mukök na pirit ’yuret na rubaŋgajin lo ’yu ’yura ’buluŋ, na gwon i kötumit na kemia torumet nu.

¹⁹ A nye ’dumaddi i ŋilo dwöt welesi kanyit lio a ’yuŋe se i nu pirit ’yuret na rubaŋgajin loki.

²⁰ A nye ködyö koŋdi nilo dwöt sona; kweja adi nye konakiŋdya ŋilo dwöt gwoso na konakiŋdye nye lele dwöt lo rubaŋga lo toron nu, a koane koŋdi sona anyen kilo ŋutu totokela, a se pitökine pitöki.

²¹ A nye ködyö ’dokoddi ŋilo dwöt i mera kaŋo, a totumbe lepeŋ gwoso na totumbe nye dwöt lo kokwe lu; ŋilo a rubaŋga lo toron i kulya ti momoret na ŋutu.

²² A ko lele matat a toroŋdya, ko a koŋdya nene na kine ŋo liŋ ’bak denet nagon MATAT Ŋun lonyit a sarakin adi ti kona kine, a nye gwe ko toron,

²³ a ko Ŋina toron na kon nye na aje tokuruki lepeŋ, a nye ködyö joŋdi meetyo a lo rubaŋga lonyit, nilo meetyo ködyö gwon ’bak yuyuket,

²⁴ a nye sopakiŋdye könin lonyit i kwe na lu kine, a ’duŋge lepeŋ i nu pirit ’duŋet na rubaŋgajin lo ’yu ’yura ’buluŋ ko MATAT i komor; ŋilo a rubaŋga lo toron.

²⁵ a koane ködyö ’dumuŋdye ko morinet lonyit kunie rima ti lo rubaŋga lo toron, a sekiŋdye se i pogwora ti pirit ’yuret na rubaŋgajin lo ’yu ’yura ’buluŋ, a ’bukökiŋdye pitönö ti rima kanyit kune i mukök na pirit ’yuret na rubaŋgajin lo ’yu ’yura ’buluŋ.

²⁶ A nye ’yuŋe welesi kanyit liŋ i nu pirit ’yuret na rubaŋgajin, gwoso na ’yuŋe nye welesi ti rubaŋgajin ti taliŋ na; a koane koŋdi sona anyen ŋilo ŋuto totokela i toron nanyit, a nye pitökine pitöki.

²⁷ A ko lele lo ŋutu kana a toroŋdya ’bak denet i koŋdya na nene na kine ŋo nagon MATAT a sarakin adi ti kona kine, nye gwon ko toron,

²⁸ a ko Ŋina toron na kon nye na aje tokuruki lepeŋ, a nye ködyö joŋdi meetyo a na rubaŋga lonyit i kulya ti na toron nanyit na kon nye na; ŋina meetyo ködyö gwon ’bak yuyuket.

²⁹ A nye sopakiŋdye könin lonyit i kwe na meetyo na rubaŋga lo toron, a ’duŋge ŋina meetyo na rubaŋga lo toron i nu pirit na ’yurari rubaŋgajin lo ’yu ’yura ’buluŋ nu.

³⁰ A koane ködyö ’dumuŋdye kunie ti kine rima ko morinet lonyit, a sekiŋdye lepeŋat i pogwora ti pirit ’yuret na rubaŋgajin lo ’yu ’yura ’buluŋ, a ’bukökiŋdye pitönö ti rima kanyit kune i mukök na pirit ’yuret na rubaŋgajin.

³¹ A nye ’dumaddi welesi liŋ ti Ŋina meetyo, gwoso na ’dumaji ’e welet na rubaŋga lo taliŋ nu, a koane ködyö ’yuŋe se i nu pirit ’yuret na rubaŋgajin loki anyen möara paleleŋ ko MATAT yu; a koane koŋdi sona anyen ŋilo ŋuto totokela, a nye pitökine pitöki.

³² A ko ŋilo ŋuto a joŋdya kilolor köbilityo a rubaŋga lonyit lo toron, a nye ködyö joŋdi nene a nanakwan nagon ’bak yuyuket,

³³ a sopakiŋdye könin lonyit i kwe na ŋinu kilolor na rubaŋga lo toron, a ’duŋge lepeŋ a rubaŋga lo toron i pirit ’duŋet na ru-baŋgajin lo ’yu ’yura ’buluŋ nu.

³⁴ a koane ködyö ’dumuŋdye kunie ti rima ti rubaŋga lo toron ko morinet lonyit, a sekiŋdye lepeŋat i pogwora ti nu pirit ’yuret na rubaŋgajin lo ’yu ’yura ’buluŋ, a ’bukökiŋdye pitönö ti rima kanyit kune i mukök na ’yuret na rubaŋga.

³⁵ A nye ’dumaddi welesi liŋ ti ŋilo kilolor, gwoso na ’dumaji ’e welet na kilolor lo ’duŋö a lo rubaŋga lo taliŋ nu, a koane ködyö ’yuŋe se i pirit ’yuret na rubaŋgajin loki, i loki na ŋo lo ’yuraki MATAT; a koane koŋdi sona anyen ŋilo ŋuto totokela i Ŋina toron na kon nye na, a nye pitökine pitöki.