Lewi 3 - Bibilia Buk na Ŋun nagon koti luŋu a

¹ A ko ŋuto a ’duŋgö rubaŋga lonyit a lo taliŋ, a ko nye a tiŋdu kiteŋ, kode a mönik, kode a nanakwan, a nye ködyö wukiŋdye lepeŋ ’bak yuyuket ko MATAT i komor.

² A nye sopakiŋdye könin lonyit i kwe na turu ’buti lo wukin nye a rubaŋga lo a ’duŋge lepeŋ i kötumit na kemia torumet; a ŋwajik ti Arona logon a koanejin kulo pokakiŋdye rima i pirit ’yuret na lubaŋgajin i mara kanyit.

³ A nye ’duŋuŋdye i rubaŋga lo taliŋ kata lele swöt logon ’yuraki MATAT, kweja adi welet na röbbu monyet ko welesi liŋ na gwon i monyet,

⁴ ko puleŋa murek ko welesi kase nyona ko nyutitöt, se ko pilya na munyet nagon nye ’dumara ko puleŋa i pirit na geleŋ na.

⁵ A ŋwajik ti Arona ködyö ’yuŋe se i pirit ’yuret na rubaŋgajin, i rubaŋga lo ’yu ’yura ’buluŋ loki lo gwon i kaden na gwon i kimaŋ kune; ŋilo rubaŋga ’yura ko kimaŋ anyen möara paleleŋ ko MATAT yu.

⁶ A ko rubaŋga lonyit logon ’du-ŋöki MATAT a lo taliŋ lo a turu ’buti lo ’dumwe i teŋ na yidin, kode a mönik, kode a nanakwan, a nye ködyö wukiŋdye lepeŋ ’bak yuyuket.

⁷ A ko nye tiŋdu kilolor a rubaŋga lonyit, nyena a nye ködyö wukiŋdye lepeŋ ko MATAT i komor,

⁸ A nye sopakiŋdye könin lonyit i kwe na turu ’buti logon nye wukin a rubaŋga lu, a ’duŋge lepeŋ i komor na kemia torumet; a ŋwajik ti Arona ködyö pokakiŋdye rima kanyit i nu pirit ’yuret na rubaŋgajin i mara kanyit.

⁹ A nye ’duŋuŋdye i rubaŋga lo aliŋ kata lele swöt logon ’yuraki MATAT logon a welesi ti turu ’buti, kweja adi kotet nagon a welet ’bukuluŋ nagon nye ködyö ’du ’duŋun i gwiri nyona gwak na, se ko welet na röbbu monyet ko welesi liŋ na gwon i monyet,

¹⁰ ko puleŋa murek ko welesi na gwon ko lepeŋat nyona ko nyutiöt, se ko pilya na munyet nagon nye ’dumara ko puleŋa i pirit na geleŋ na.

¹¹ A koane ködyö ’yuŋe se i pirit ’yuret na ru-baŋgajin loki; ŋilo a kinyo logon ’yuraki MATAT.

¹² A ko rubaŋga lonyit gwon a kine, nyena a nye ködyö wukiŋdye lepeŋ ko MATAT i komor,

¹³ a nye sopakiŋdye könin lonyit ko ŋilo turu ’buti i kwe, a ’duŋge lepeŋ i komor na kemia torumet; a ŋwajik ti Arona pokakiŋdye rima kanyit i pirit ’yuret na rubaŋgajin i mara kanyit.

¹⁴ A nye ködyö tiŋdi i ŋilo rubaŋga lonyit kata lele swöt logon ’yuraki MATAT, kweja adi welet na röbbu monyet, se ko welesi liŋ na gwon i monyet,

¹⁵ ko puleŋa murek ko welesi na gwon ko lepeŋat nyona ko nyutiöt kune, se ko pilya na munyet nagon nye ’dumara ko puleŋa i pirit na geleŋ na.

¹⁶ A koane ködyö ’yuŋe se i pirit ’yuret na rubaŋgajin loki a kinyo lo ’yu ’yura logon wuki a ŋo na mon paleleŋ. Welesi liŋ a ti MATAT.

¹⁷ A ŋilo gwe a saret lo wurö anyen yeyeŋon ŋupi temba i nyakwariat kasu i midijik kasu liŋ, adi ta ködyö ti nyesu i lokore kata kode welet kode rima.