Lewi 21 - Bibilia Buk na Ŋun nagon koti luŋu a

Koanejin ködyö gwon a loke

¹ A MATAT jambi ko Mose adi, Kulyani ko ŋwajik ti Arona koanejin kulo, ko jamakiŋdye lepeŋat adi, lele lose ködyö ’bayin logon toluddya mugun i kulya ti ŋutu kanyit lo twatwa,

² ake i kulya ti se logon a ti kötumit na geleŋ ko lepeŋ, kweja adi ŋote nanyit, ko monye lonyit, ko ŋuro lonyit, ko ŋuro nanyit, ko luŋaser lonyit,

³ ko kiaser nanyit nagon a ’diet nagon a kötumit na geleŋ ko nye, kogwon nye a ko nyuŋ ryeju lalet; koane bubulö toluddya mugun nanyit kogwon kulya ti ŋina ŋuro.

⁴ Nye ködyö ti toluddya mugun gwoso lalet i kiden na ŋutu kanyit a toŋoŋdi mugun nanyit.

⁵ A koanejin ködyö tine ’bariŋdu kusik kase a namelenyak kode ’bariŋdu goŋesi ti nyekema kase, a se ködyö tine ’du ’duŋujö mugunya kase.

⁶ A se ködyö gwe a loke ti Ŋun lose, a ködyö tine toluddya karin ti Ŋun lose; kogwon se wukiŋdya MATAT rubaŋgajin lo ’yu ’yura logon a kinyo lo Ŋun lose; nyenagon a se ködyö gwe a loke.

⁷ A se ködyö tine yemba kalupe kode nene ŋuto nagon a toluta; köti a se tine yemba ŋuto nagon a yanya ko lalet; kogwon koane a loke lo Ŋun lonyit.

⁸ A do ködyö geluŋdye lepeŋ kaŋo, kogwon nye lo wukiŋdya Ŋun losu kinyo; a nye ködyö gwe a loke kasu; kogwon nan MATAT logon a geluŋdya ta lo, nan a loke.

⁹ Ko ŋuro na lele koane a toluddya mugun i lulupötu, lepeŋ koti toluddya monye lonyit; a Ŋina ŋuro ködyö ’yurani ko kimaŋ.

¹⁰ A ŋilo koane logon a duma i kiden na luŋasirik kanyit lo, logon welet aje ’buköki kanyit i kwe, logon aje ’boroki i jupukiŋdya na kunu boŋgwat lo, ködyö ti laggu kupir kanyit ti kwe, kode kekereŋdya boŋgwat kanyit;

¹¹ nye ködyö ti lupö lukata i nene öpu, kode toluddya mugun nanyit, ma ’di i kulya ti monye kode ti ŋote nanyit;

¹² köti nye ködyö ti lupö kaŋo i nu pirit nake na rurwan, kode toluddya nu pirit nake na ŋun lonyit; kogwon welet na ŋun lonyit na ’boroki ’e nye na kanyit i mugun: nan logon a MATAT.

¹³ lepeŋ ködyö yemba nakwan nagon a ’diet.

¹⁴ Ama nye ködyö ti yemba karu ’be, kode nene nagon a yanya, kode ŋuto nagon a toluta, kode kalupe; ama nye ködyö yemba nakwan nagon a kö’disityo na ŋutu kanyit,

¹⁵ an nye ko toluddya ŋwajik kanyit i kiden na ŋutu kanyit; kogwon nan a MATAT logon a geluŋdya lepeŋ kaŋo a loke lo.

¹⁶ A MATAT jambi ko Mose adi,

¹⁷ Tambi ko Arona adi, Ko ŋa lo nya-kwariat kulök i toberon nase liŋ logon gwon ko nene yuyuket, ti nye gwe ti mijun nyona i wukiŋdya na Ŋun lonyit kinyo.

¹⁸ Kogwon ŋuto lo gwon ko nene yuyuket lo ködyö ti mijun nyona, kweja adi: ŋuto mo ’doke, kode logon moköt a bata, kode logon komor a böŋöji, kode logon ko nene batet,

¹⁹ kode logon a ’beleŋo i moköt kode i könin,

²⁰ kode logon ko gu ’du, kode logon a ŋuru, kode logon ko nene batet i koŋe, kode logon ko twanti lo pupuri, kode logon ko totosesi, kode logon tulu a joka;

²¹ iŋkoi a ŋuto gwe ’bayin lo nyakwariat ti koane Arona logon gwon ko nene yuyuket, logon ködyö mijun nyona i wukiŋdya na MATAT rubaŋgajin lo ’yu ’yura; iŋkoi lepeŋ ködyö ti mijun nyona i wukiŋdya na ŋun lonyit kinyo kogwon nye gwon ko yuyuket.

²² Nye bubulö nyesu kinyo lo ŋun lonyit, ko ti ŋo nake na rurwan na totopuŋdya, ko ti ŋo nake kune,

²³ ama nye ködyö ti po nyona ko boŋgo koret kode mijun nyona ko pirit ’yuret na rubaŋgajin, kogwon nye gwon ko yuyuket, an nye ko toluddya piritön kwe na rurwan; kogwon nan a MATAT logon a geluŋdya lepeŋat kaŋo a loke.

²⁴ Nyena a Mose jambi sona ko Arona ko ŋwajik kanyit se ko ŋutu liŋ ti Yisaraele.