Lewi 2 - Bibilia Buk na Ŋun nagon koti luŋu a

’Dokesi ti ’bolot

¹ A ko lele ŋuto a joŋdya ’doket na ’bolot anyen wukin MATAT, a ’doket nanyit ködyö gwe a ’bolot na jiŋ a naliliŋök; a nye ’bukökiŋdye welet kase loki, a tiŋdi bökur lokwe loki,

² a joŋdi se ko ŋwajik ti Arona ni logon a koanejin kulo. A nye sunuŋdye kata könin geleŋ lo ’bolot na jiŋ a naliliŋök ko welet se ko bökur lokwe liŋ; a koane ködyö ’yuŋe se a koret toyeyeet i pirit ’yuret na rubaŋgajin loki, anyen ’yura ko kimaŋ, anyen möara paleleŋ ko MATAT yu.

³ A ŋo na pituŋdyö i ŋina ’doket na ’bolot mo gwe a ti Arona ko ŋwajik kanyit; ŋina a swöt na ŋo nake parik na rurwan na ’yuraki MATAT.

⁴ A ko do a joŋdya ’doket na ’bolot na dera i namet kune a rubaŋga, a se ködyö gwe a ambatajin nagon ’bak kape ti ’bolot na jiö a naliliŋök nagon a ŋola ko welet, kode a kisera nagon ’bak kape na welaki welet loki.

⁵ A ko rubaŋga ilot a ’doket na ’bolot na kekelo ko doka, a se ködyö gwe a lo ’bolot na jiö a naliliŋök nagon ’bak kape, a ŋola ko welet;

⁶ a do pipiŋdye se, a ’bukökiŋdye welet loki; ŋina a ’doket na ’bolot.

⁷ A ko rubaŋga ilot a ’doket na ’bolot na dera i sape, a se ködyö tetenani ko ’bolot na jiö a naliliŋök ko welet.

⁸ A do jakiŋdye MATAT ’doket na ’bolot nagon a tetena ko kine ŋo; a ko se a jwe ko koane i komor, a nye joŋdi se i pirit ’yuret na rubaŋgajin.

⁹ A koane ködyö ’dumaddi i ŋinu ’doket na ’bolot kune a koret toyeyeet, a ’yuŋe se i pirit ’yuret na rubaŋgajin loki, anyen ’yura ko kimaŋ, anyen möara paleleŋ ko MATAT yu.

¹⁰ A ŋo na pituŋdyö i ŋina ’doket na ’bolot kune ködyö gwe a ti Arona ko ŋwajik kanyit, ŋina a swöt na ŋo nake parik na rurwan na ’yuraki MATAT.

¹¹ ’Doket na ’bolot ködyö ’bayin nagon tetena ko kape nagon ta jakin MATAT; kogwon ta ködyö ti ’yurakiŋdya MATAT kode kape kode siwatat kwöŋ.

¹² Ta bubulö wukiŋdya MATAT se gwoso kinyojin waŋesi ti kokwe, ama se ti wuki i pirit ’yuret na rubaŋgajin a ŋo na mon paleleŋ.

¹³ A do ködyö ti ŋdi ’balaŋ i ’dokesi kunök liŋ ti ’bolot; an do ko jaran i tiŋdu na ’balaŋ na tomoret na teten Ŋun ilot na i ’doket inot na ’bolot kata; kweja adi do wukiŋdya ’balaŋ i rubaŋgajin kulök liŋ.

¹⁴ A ko do wukiŋdya MATAT ’doket na ’bolot i kinyojin waŋesi ti kokwe, a do ködyö wukiŋdye ’bolot ludukö na rarayaka nagon nyuŋ ŋerwe i winyan nadök, logon a kelo a ’doket na ’bolot i kinyojin kulök waŋesi ti kokwe.

¹⁵ A do tiŋdi welet i loki nase, a peddi bökur lokwe i lepeŋat loki; ŋina a ’doket na ’bolot.

¹⁶ A koane ködyö ’yuŋe nene koret na kilo ’bolot lo rayaka, ko na welet se ko bökur lokwe lonyit liŋ a koret toyeyeet; ŋilo a logon ’yuraki MATAT.