Lewi 16 - Bibilia Buk na Ŋun nagon koti luŋu a

¹ A MATAT kulyani ko Mose i mukök na twaji ŋwajik murek ti Arona na, i diŋit na muluŋdye se nyona ko MATAT nu a se twatwane twatwa;

² a MATAT kulyani ko Mose adi, Taki Arona luŋösur adi ti nye gwe ti lupö diŋitan liŋ i pirit nake na rurwan i lukata na boŋgo koret, i komor na muket na saŋduk nagon toronjin lala kata nu, an nye ko twan, kogwon nan mo pupukun i luru lukata i loki na muket na saŋduk nagon toronjin lala kata nu.

³ A Arona ködyö lupöni sona i pirit nake na rurwan, kweja adi nye ködyö tu ko dwöt lo ’dit a lo rubaŋga lo toron se ko lopijot a lo rubaŋga lo ’yu ’yura ’buluŋ.

⁴ A nye jupukiŋdye jölöbiya nake na rurwan nagon tetena ko waratat napa-rere, a nye jupukiŋdye boŋgo na mok nagon tetena ko waratat, a nye duku-kiŋdye kamba nagon tetena ko waratat naparere, a dukukiŋdye ema nagon tetena ko waratat naparere kanyit i kwe; kine a jupisi nake na rurwan. A nye ködyö tukwöji mugun nanyit, a kirut nye jupukiŋdye se.

⁵ A nye ’dumuŋdye i momoret na ŋutu ti Yisaraele melon mönikön murek a ti rubaŋga lo toron, se ko lopijot geleŋ a lo rubaŋga lo ’yu ’yura ’buluŋ.

⁶ A Arona ködyö wukiŋdye dwöt a rubaŋga lo toron i kulya ti mugun, a nye toke ’yi mugun se ko mede nanyit liŋ.

⁷ A nye joŋgi melon murek, a tiŋdi se ko MATAT i komor i kötumit na kemia torumet;

⁸ a Arona gubakiŋdye guralan i kilo melon murek, a gura togeleŋ ’duki a na MATAT, a tomurek na ’duki a na Ajajele.

⁹ A Arona ködyö kweji meetyo logon gura nanyit a ’dukin a na MATAT lo, a wukiŋdye lepeŋ a lo rubaŋga lo toron;

¹⁰ ama meetyo logon gura nanyit a ’dukin a na Ajajele lo ködyö kweki jörun ko MATAT i komor anyen kulyaesi lo tokelari ŋutu kujo jama kanyit loki, anyen nye jiköji tojo i yöbu a lo Ajajele.

¹¹ A Arona ködyö kweji dwöt a lo rubaŋga lo toron i kulya ti mugun nanyit, a nye toke ’yi mugun se ko mede nanyit liŋ; a nye ’duŋge dwöt a lo rubaŋga lo toron i kulya ti mugun.

¹² A nye ködyö ’dumuŋdye ta ’dök a jore ko kuk ti kimaŋ na jwe i pirit ’yuret na rubaŋgajin ko MATAT i komor, se ko könisi murek ti bökur lo mon paleleŋ logon a ŋaŋayaka a lo ’di’dik; a lepeŋ joŋgi nina ta ’dök i lukata na boŋgo koret

¹³ a nye tiŋdi bökur i kimaŋ loki ko MATAT i komor, anyen köpuröt lo bökur ködyö muluja muket na saŋduk nagon toronjin lala kata, köti nagon ŋurupö tökoresi gwon i lukata nanyit na, an nye ko twan;

¹⁴ a nye ködyö ’dumuŋdye kunie rima ti dwöt, a gwataddi se ko morinet lonyit i loki na muket na saŋduk nagon toronjin lala kata na ko i komor nanyit, a nye gwataddi kunie rima ko morinet lonyit daŋin buryo i komor na nu muket nagon toronjin lala kata na.

¹⁵ A kirut nye ködyö ’duŋge meetyo lo rubaŋga lo toron lo gwon i kulya ti ŋutu kulo, a ŋogi rima kanyit i lukata na boŋgo koret, a nye ködyö koŋdi ko kine rima gwoso na koŋdi nye rima ti lu dwöt nu, i pokakiŋdya na lepeŋat i loki na muket na saŋduk nagon toronjin lala kata na ko i komor nanyit;

¹⁶ a nye toke ’yi pirit nake na rurwan sona, i kulya ti tolutesi ti ŋutu ti Yisaraele, ko i kulya ti tukwölöŋesi kase, iŋkoi i kulya ti toronjin kase liŋ; a nye toke ’yi nu kemia torumet sona nagon si ’da ko lepeŋat i kiden na tolutesi kase nu.

¹⁷ A ŋuto ködyö gwe ’bayin i lukata na kemia torumet i diŋit na lupöri nye i toke ’ya na pirit nake na rurwan nu, tojo ko nye a lupe kaŋo a toke ’yi mugun, ko mede nanyit, se ko momoret liŋ na ŋutu ti Yisaraele.

¹⁸ A nye ködyö lupöni kaŋo tojo i nu pirit ’yuret na rubaŋgajin na gwon ko MATAT i komor nu a toke ’yi nu pirit ’yuret, a nye ’dumuŋdye kunie rima ti dwöt ko kunie rima ti meetyo, a sekiŋdye se i oŋgwora ti nu pirit ’yuret na rubaŋgajin i mara kanyit.

¹⁹ A nye gwatakiŋdye kunie rima kanyit ko morinet lonyit daŋin buryo i loki na Ŋina pirit ’yuret, a nye toke ’yi lepeŋ a geluŋdye lepeŋ a nake i tolutesi ti ŋutu ti Yisaraele.

²⁰ A ko nye a tutuŋgö toke ’ya pirit nake na rurwan, ko kemia torumet, se ko pirit ’yuret na rubaŋgajin, a nye ködyö kweji meetyo lo gwon jörun;

²¹ a Arona sopakiŋdye könisi kanyit murek liŋ ko lu meetyo lo gwon jörun lo i kwe, a nye ködyö tuŋge kanyit loki ŋonyesi liŋ ti ŋutu ti Yisaraele, ko tukwölöŋesi kase liŋ, iŋkoi toronjin kase liŋ; a nye sopakiŋdye se ko lu meetyo i kwe, a sonyoddi lepeŋ kaŋo tojo i yöbu i könin lo lele ŋuto lo mömöŋdu ajo.

²² a lu meetyo mo ’dokoddi ŋonyesi ti lepeŋat liŋ kanyit i mugun tojo i lele jur logon a wöli kana, a ŋuto ködyö kölökiŋdye lu meetyo i yöbu kata.

²³ A Arona ködyö lupöni i kemia torumet lukata, a nye rösöddi boŋgwat na tetena ko waratat naparere kune kaŋo na jupukin nye i diŋit na lupöri nye i pirit nake na rurwan nu, a nye kölökiŋdye lepeŋat nyu;

²⁴ a nye tukwöji mugun i nene pirit nake, a nye jupukiŋdye boŋgwat kanyit, a nye lupöni kaŋo a wukiŋdye rubaŋga lonyit lo ’yu ’yura ’buluŋ, se ko rubaŋga lo ’yu ’yura ’buluŋ i kulya ti ŋutu kulo, a nye toke ’yi mugun se ko kilo ŋutu.

²⁵ A nye ködyö ’yuŋe welesi ti rubaŋga lo toron i pirit ’yuret na rubaŋgajin loki.

²⁶ A ŋuto logon a kölöddu meetyo ko Ajajele yu lo ködyö lalaji boŋgwat kanyit a tukwöji mugun, a i mukök a nye ködyö bulöni bulö lupö i mera lukata.

²⁷ A dwöt lo rubaŋga lo toron se ko meetyo lo rubaŋga lo toron, logon rima kase a jwe lukata i tokela-rikin na pirit nake na rurwan kune, ködyö ’doköjine kaŋo i mera lukata; a gobero kase ko lokorio kase ko moyok kase totumöni ko kimaŋ.

²⁸ A ŋuto logon a ’yuŋa lepeŋat lo ködyö lalaji boŋgwat kanyit, a tukwöji mugun nanyit, a i mukök a nye bulöni bulö lupö i mera lukata.

²⁹ A lo gwe a saret lo wuröki ta ŋupi adi i perok puök ti yapa toburyo ta ködyö tokoyogga ’börik, a ta ködyö tine koŋdya nene kita, kode nye a ŋuto lo yuŋwe i jur, kode a ŋuto logon si ’da a lepetyo kasu kiden lo;

³⁰ kogwon kine kulya ködyö kokonaki ta i ŋilu lor tokelet i toke ’ya na ta; a ta mo gwe a loke ko MATAT i komor i toronjin kasu liŋ.

³¹ Ŋilo a sabata logon a yukaet gwak kasu, a ta ködyö tokoyoggi ’börik; lo a saret lo wurö lo yeyeŋon ŋupi.

³² A koane lo welaki ko a ’boroki i ruddya na monye lo ködyö toke ’yi toke ’ya, a jupu boŋgwat nake na rurwan nagon tetena ko waratat naparere;

³³ a ŋilu koane ködyö toke ’yi pirit nake na rurwan, a nye toke ’yi kemia torumet, se ko pirit ’yuret na rubaŋgajin, a nye toke ’yi koanejin se ko ŋutu liŋ lo momora kulo.

³⁴ A lo gwe kasu a saret lo wurö logon yeyeŋon ŋupi, adi ŋutu ti Yisaraele ködyö totokela daŋ geleŋ temba i kiŋa i kulya ti toronjin kase liŋ. A Mose koŋdi gwoso na saŋi MATAT nye nu.