Lewi 11 - Bibilia Buk na Ŋun nagon koti luŋu a

Kijakwa logon a lut ko logon a loke i kulya ti keri

¹ A MATAT jambi ko Mose ko Arona, kulya adi,

² Tamaki ta ŋutu ti Yisaraele adi, Kilo a ŋo lo gwon jorun logon ta a ’buruki i nyesu i kiden na kijakwa liŋ lo gwon i kak ni.

³ Ŋo liŋ i kiden na kijakwa logon ko sulu-kwakan lo kwaraju a gwe ko mokosi lo koŋa, lo ’yelekuŋdya döru i ŋiŋa kilo ta a ’buruki i nyesu na se.

⁴ Nyenagon i kiden na se logon ’yelekuŋdya döru i ŋiŋa kode lo kwaraju i sulukwakan, a ta ködyö tine nyesu kilo: kweja adi kamilo, kogwon ’yelekuŋdya döru i ŋiŋa ama sulukwakan kanyit a ko kökoroja.

⁵ A kileŋ koti gwe a lut kasu, kogwon nye ’ye ’yelekuŋdya döru i ŋiŋa, ama a tine kwaraju i sulukwakan.

⁶ Likito koti a ŋo nagon a lut, kogwon nye ’ye ’yelekuŋdya döru i ŋiŋa ama a nye tine kwaraju i sulukwakan.

⁷ Wuri a ŋo logon a lut kogwon sulukwakan kanyit a kwaraju a nye gwe ko mokosi lo koŋa, ama nye ti ’yelekuŋdya döru i ŋiŋa.

⁸ An ta ko nyesu se a lokore, a ta tine ’bo ’yu se nagon a twatwa kune; lepeŋat a ŋo logon a lut kasu i kulya ti keri.

⁹ Kulo a ŋo logon ta a ’buruki i nyesu, i ŋo liŋ lo gwon i piŋö kata, ŋo liŋ lo gwon i lukata na piŋö logon ko wasesi ko kuperu, kode se gwon i toron ti ’balaŋ kode i karya, ta a ’buruki i nyesu na se.

¹⁰ Ama ŋo liŋ lo gwon i toron kode i karya lukata logon ’bak wasesi kode kuperu, ti ŋo lo koko’yokta i piŋö kulo, ko ti ŋo lo gwon jorun lo gwon i piŋö kata kulo, kilo a ŋo logon ta ködyö maman.

¹¹ A se yeŋe a ŋo logon ta ködyö maman; a ta ködyö tine nyesu lokore nase, a ta maŋdi lokoriŋ kase na twatwa.

¹² Ŋo liŋ lo gwon i piŋö kata lo ’bak wasesi kode kuperu kilo se a ŋo logon ta ködyö maman.

¹³ Kulo a ŋo logon ta ködyö maman i kiden na kwen, a se tine nyei, se a ŋo lo mamana, kweja adi, yuku, ko luguluseni lobeke, ko kwilok,

¹⁴ lo lo ’bilikisuk, ko kuri gwoso i gweyari lose,

¹⁵ ko korukan liŋ gwoso i gweyari lose,

¹⁶ ko tutwo ko ’daŋgape, ko gwilok, ko wowe gwoso i gweyari lose

¹⁷ ko gwisi, ko tumunit na kare, ko lumö ’duk,

¹⁸ ko wuŋgu-wuŋgu, ko urbaŋa, ko luguluseni,

¹⁹ ko luwawaŋ, ko loggoro gwoso i gweyari lose, ko lokirik, se ko lukululi.

²⁰ ŋo liŋ lo ’da ’daju logon wöwörö ko mokosi Iŋwan, kilo a ŋo logon ta ködyö maman.

²¹ Ama i kiden na ŋo lo ’da ’daju kilo, logon wöworo ko mokosi Iŋwan, ta a ’buruki i nyesu na se logon ko mokosi lojo i ’dapan kase, logon lalabarikin i kak.

²² I kilo ta a ’buruki i nyesu na mayat gwoso i gweyari lose, ko maŋgŋgo gwoso i gweyari lose, ko diriri gwoso i gweyari lose, se ko ködi-pon gwoso i gweyari lose.

²³ Ama kulye ŋo liŋ lo ’da ’daju, logon ko mokosi Iŋwan, kilo a ŋo logon ta ködyö maman.

²⁴ A ta worani a lut i kulya ti keri kogwon se; ŋutu liŋ logon a ’bo ’yu lokorio kase na twatwa kune gwon a lut tojo ko sömukö,

²⁵ a nye logon a ’bo ’yu lele swot lo lokorio kase na twatwa kune ködyö lalaji boŋgwat kanyit a gwe a lut tojo ko sömukö.

²⁶ A kijakwa liŋ gwe a lut kasu logon ko sulukwakan lo kwaraju, ama a mokosi kase tine koŋa kode logon tine ’yele-kuŋdya döru i ŋiŋa; a ŋutu liŋ lo ’bo ’yu se kilo gwe a lut i kulya ti keri.

²⁷ A se liŋ logon woro ko morin kase, i kiden na kijakwa liŋ logon wöwörö ko mokosi Iŋwan, kilo a lut kasu; a ŋo liŋ logon a ’bo ’yu lokorio kase na twatwa kune gwe a lut tojo ko sömukö,

²⁸ a nye logon a ’doggu lokorio kase na twatwa kune ködyö lalaji boŋgwat kanyit a gwe a lut tojo ko sömukö; kilo a lut kasu i kulya ti keri.

²⁹ A kilo gwe a lut kasu i kiden na ŋo lo koko ’yokta i kak ni; kweja adi ’diŋit, ko miji, ko lokwilokokok gwoso i gweyari lose,

³⁰ ko kajo ’bolyok, ko manyaŋ, ko gwurutöt, ko gwurutöt loliliŋ, se ko kirikok.

³¹ Kilo a lut kasu i kiden na ŋo liŋ lo koko ’yokta; ŋutu liŋ logon a ’bo ’yu se ko a twan kilo gwe a lut tojo ko sömukö.

³² a nene ŋo nagon a ’durukin ko lele lose ko a twan a gwe a lut, kode nye a ŋo na gweya ko kaden, kode a nene boŋgo, kode a gober, kode a suwari, kode a nene wuyit na kikitarikin; a nye ködyo tikine i pioŋ lukata, a nye gwe a lut tojo ko sömukö; a kirut nye gwe a nake.

³³ A ko lele lose a ’durukin i lele sape, a ŋo liŋ na gwon lukata kune gwe a lut, a ta ködyo gwalaggi lepeŋ.

³⁴ a lele kinyo lo nyenyei lo gwon kanyit lukata, logon pioŋ ködyö pokin kata lo gwe a lut; a ŋo liŋ na mamata i sapya liŋ gwoso kilo gwe a lut.

³⁵ a ŋo liŋ nagon lele swöt lo lokorio kase na twatwa a ’doro kata kune gwe a lut; kode nye a namet kode a pirit deret, nye ködyö gwagwala-ka a tupesi tupesi; kilo a lut i kulya ti keri, a se gwe a lut kasu.

³⁶ Ama a leleket na pioŋ kode a taŋki nagon ko pioŋ na gwe a nake; ama a ŋo liŋ logon a ’bo ’yu lokorio kase na twatwa kulo gwe a lut.

³⁷ A ko lele swöt lo lokorio kase na twatwa kune a ’durukin i kulye nyomot lo weweya, a kilo gwe a loke,

³⁸ ama ko pioŋ a ’buköki i nyomot a lele swot lo lokorio kase na twatwa kune iŋge ’doro kata, a kilo nyomot gwe a lut kasu.

³⁹ A ko lele kijaku logon a ’buruki i nyei ko a twan, a nye lo ’bo ’yu lokore nanyit na twan na gwe a lut tojo ko sömukö,

⁴⁰ a nye lo nyesu lokore nanyit lo ködyö lalaji boŋgwat kanyit, a gwe a lut tojo ko sömukö; koti a nye lo ’doggu lokore na twan lo ködyö lalaji boŋgwat kanyit a gwe a lut tojo ko sömukö.

⁴¹ ŋo liŋ lo koko ’yokta i kak ni kulo ta ködyö maman; a ta ködyö tine nyö se.

⁴² A ŋo liŋ lo wöwörö ko pelela, ko ŋo liŋ lo wöwörö ko mokosi Iŋwan, kode lo gwon ko mokosi jore, ko ŋo liŋ lo koko ’yokta i kak ni kilo ta ködyö ti nyesu; kogwon se a ŋo lo mamana.

⁴³ Ta ködyö ti koŋdya ’borik a ŋo lo mamana ko lele ŋo lo koko ’yokta; a ta ködyö tine toluddya ’börik ko se, an ta wora a lut i kulya ti keri.

⁴⁴ Kogwon nan a MATAT ŋun losu; nyenagon geluŋdye ta ’börik, ko gwe ta a loke, kogwon nan a loke. A ta ködyö tine toluddya ’börik ko lele ŋo lo koko ’yokta logon gwögwoŋtu i kak ni.

⁴⁵ Kogwon nan a MATAT logon a joŋdya ta kaŋo i jur lo Ejipeto, anyen gwon a ŋun losu; nyenagon ta ködyö gwon a loke, kogwon nan a loke.

⁴⁶ ŋilo a saret i kulya ti kijakwa, ko kwen, ko ŋo liŋ lo gwon jörun logon wöwörö i pioŋ kata, se ko ŋo liŋ lo koko ’yokta i kak ni kulo,

⁴⁷ anyen koruŋdya i kiden na ŋo logon a lut ko na ŋo loke i kulya ti keri, ko i kiden na ŋo lo gwon jorun logon a ’buruki i nyei kulo, se ko na ŋo lo gwon jorun logon a ko ’buruki i nyei kulo.