Lewi 10 - Bibilia Buk na Ŋun nagon koti luŋu a

Toron na Nadaba ko Abiu

¹ A Nadaba ko Abiu ŋwajik ti Arona kulo, se murek ’dumuŋdye ta ’doka kase, a tiŋdi kimaŋ nyin, a tiŋdi bökur kanyit loki, a wukiŋdye kimaŋ na gwon ka ’de ko MATAT i komor, gwoso nagon nye a ko sara-kiŋdye lepeŋat nu.

² A kimaŋ puku kaŋo ko MATAT i komor a ’yuŋe lepeŋat, a se twatwane twatwa ko MATAT i komor.

³ A kirut Mose kulyani ko Arona adi, ŋina a ŋo nagon MATAT aje kulyari adi, Nan ködyö gelwe a loke lo rurwan i se logon a ŋun köyö nyona kulo, a nan ködyo bulani bula i komor na ŋutu liŋ. A Arona yiŋani taliŋ.

⁴ A Mose luŋgi Misaele ko Elisapana, ŋwajik ti Ujiele luŋaser monye Arona, a kulyani ko lepeŋat adi, Miju ta nyona, ’dokoddi ta öpuö ti luŋösurök kaŋo i komor na nu pirit nake na rurwan tojo ko i kaŋo na mera.

⁵ Nyena a se miju nyona, a ’dokoddi lepeŋat i jölöbiyajin kase tojo i kaŋo na mera, gwoso nagon Mose a kulyari nu.

⁶ A Mose kulyani ko Arona ko ŋwajik kanyit logon a ko Elejara ko Itamar, adi, An ta ko laggu kupir kasu ti kusik, köti ko kereŋdya ta boŋgwat kasu, an ta twatwa, an woran pokin i na momoret liŋ; ama luŋösurök logon a kötumit na Yisaraele ’bukuluŋ kulo bubulö gwien nu ’yuŋa nagon MATAT a totule ’yu na.

⁷ Koti a ta tine tu kaŋo i kötumit na kemia torumet, an ta twatwa; kogwon welet na MATAT na welarikin ta a koanejin na gwon kasu loki. A se koŋdi gwoso na kulyari Mose nu.

Saresi i kulya ti koanejin

⁸ A MATAT jambi ko Arona adi,

⁹ Do se ko ŋwajik kulök, ko möju ta binyo kode yawa na pötwör na lupöri ta i kemia torumet nu an ta twatwa; a lo gwe a saret ŋupi lo wuröki ta temba i nyakwariat kasu.

¹⁰ Ta ködyö koruŋdya i kiden na ŋo nake na rurwan ko i ŋo nagon abur, ko i kiden na ŋo nagon a lut i kulya ti keri se ko ŋo nake;

¹¹ a ta ködyö todinikiŋdye ŋutu ti Yisaraele saresi liŋ lo wurö logon MATAT a jamakin se ko Mose i kutuk kulo.

¹² A Mose kulyani ko Arona ko Elejara ko Itamar, ŋwajik kanyit logon a pituŋdyö kulo adi, ’Dumuŋdye ta ’doket na ’bolot na pituŋdyö i ŋo lo ’yuraki MATAT kulo, ko nyesi ta lepeŋat ’bak kape nyona ko pirit ’yuret na rubaŋgajin, kogwon se a nake parik na rurwan;

¹³ ta ködyö nyesu lepeŋat i pirit nake na rurwan, kogwon a koret inot ko a koret na ŋwajik kulok i ŋo lo ’yuraki MATAT kulo; kogwon nan a saraki sona.

¹⁴ Ama do ko ŋwajik kulok ko ŋwajik kunok ködyö nyesu jujuk na kwekweya se ko nyuti lo wuki lo i nene pirit nake; kogwon kine a tiki a koret inot ko a koret na ŋwajik kulok i rubaŋgajin ti taliŋ ti i ŋutu ti Yisaraele.

¹⁵ A se ködyö joŋdi nyuti lo wuki ko jujuk na kwekweya, ko welesi na ’yura kune i pirit na geleŋ, anyen kweja lepeŋat a rubaŋga lo kwekweya ko MATAT i komor, a kine gwe a kunok, ko a ti ŋwajik kulok i pirit na geleŋ a koret na yeyeŋon; gwoso na saŋi MATAT nu.

¹⁶ A Mose ga ’yi parik meetyo logon a lo rubaŋga lo toron, mete, kudyakan meetyo aje ’yuta! A Mose wore woran ko Elejara ko Itamar, ŋwajik ti Arona logon a pituŋdyö kulo, kulya adi,

¹⁷ Ko nyo ta a ko nyesu rubaŋga lo toron i pirit nake na rurwan? Kogwon a ŋo nake parik ko a tiki ta anyen ta ködyö ’doggu ŋonyan na na momoret, i toke ’ya na lepeŋat ko MATAT i komor.

¹⁸ Mete ta, rima kanyit a ko joŋa i lukata na nu pirit nake na rurwan. Ta ’diri ködyö nyonyo lepeŋ i nu pirit nake na rurwan gwoso na saŋi nan nu.

¹⁹ A Arona waddi Mose adi, Mete, i lo lor se aje wukiŋdya rubaŋga lose lo toron se ko rubaŋga lose lo ’yu ’yura ’buluŋ ko MATAT i komor; ama kulya gwoso kine a ’dukin ködyö! Ko nan ködyö a nyesu rubaŋga lo toron i lo lor, kine kulya ködyö a na ’but ko MATAT i komor le?

²⁰ a Mose ko yiŋge kine kulya, a gwe a na ’but kanyit i komor.