Lewi 1 - Bibilia Buk na Ŋun nagon koti luŋu a

Rubaŋgajin lo ’yura ’buluŋ

¹ A MATAT luŋgi Mose, a kulyani ko lepeŋ kaŋo i kemia torumet adi,

² Tambi ko ŋutu ti Yisaraele, taki se adi, Ko lele ŋuto losu a wukiŋdya MATAT rubaŋga, a ta ködyö wukiŋdye ŋilo rubaŋga losu a toro ’bo logon a ’dumwe i teŋ na kisuk kode i teŋa yidin.

³ A ko rubaŋga lonyit gwon a rubaŋga lo ’yu ’yura ’buluŋ lo ’dumwe i kisuk, a nye köbyö wukiŋdye mönik logon ’bak yuyuket; a nye tiŋdi lu mönik i kömit na kemia torumet, anyen MATAT böŋö ruruk ŋilo ŋuto;

⁴ a ŋilo ŋuto ködyö sopakiŋdye könin lonyit ko lu rubaŋga lo ’yu ’yura ’buluŋ i kwe, a lu mönik rukökine ŋilo ŋuto anyen tokelari lepeŋ.

⁵ A ŋilo ŋuto ’duŋge dwöt ko MATAT i komor; a ŋwajik ti Arona logon a koanejin kulo ködyö kwekiŋdye rima, a pokakiŋdye kine rima i mara ti pirit ’yuret na rubaŋgajin na gwon i kötumit na kemia torumet na.

⁶ A nye ’böddi turu ’buti lo rubaŋga lo ’yu ’yura ’buluŋ lo a gögöŋdi lepeŋ;

⁷ a ŋwajik ti koane Arona ködyö nambi kimaŋ i pirit ’yuret na rubaŋgajin loki, a peddi kaden i miru i nu kimaŋ ki;

⁸ a ŋwajik ti Arona logon a koanejin kulo peddi gonyesi kune i miru, mora ko kwe se ko welet i kaden na gwon i kimaŋ na gwon i pirit ’yuret na rubaŋ-gajin loki kune;

⁹ ama a nye lalaji monyet se ko ŋutukujin kanyit ko pioŋ. A koane ködyö ’yuŋe ŋo ’bukuluŋ i pirit ’yuret na rubaŋgajin loki, ŋilo a rubaŋga lo ’yu ’yura ’buluŋ ko kimaŋ, anyen möara paleleŋ ko MATAT yu.

¹⁰ A ko turu ’buti nagon nye tikin a rubaŋga lo ’yu ’yura ’buluŋ a ’dumwe i yidin kata, kode i köbilu, kode i melon, a nye ködyö wukiŋdye mönik logon ’bak yuyuket;

¹¹ a nye ’duŋge lepeŋ i swöt lo lobot lo nu pirit ’yuret na rubaŋgajin ko MATAT i komor, a ŋwajik ti Arona logon a koanejin kulo pokakiŋdye rima kanyit i pirit ’yuret na rubaŋgajin i mara kanyit.

¹² A nye gögöŋdi turu ’buti, ko kwe nanyit se ko welet nanyit, a koane ködyö peddi se i miru i loki na kaden na gwon i kimaŋ i pirit ’yuret na rubaŋgajin kune;

¹³ ama a nye lalaji monyet kanyit se ko ŋutukujin kanyit ko pioŋ. A koane ködyö wukiŋdye ŋo ’bukuluŋ, a ’yuŋe lepeŋ i pirit ’yuret na rubaŋ-gajin; ŋilo a rubaŋga lo ’yu ’yura ’buluŋ ko kimaŋ, anyen möara paleleŋ ko MATAT yu.

¹⁴ A ko ŋo nagon nye tikin MATAT a rubaŋga lo ’yu ’yura ’buluŋ na gwon a kwen, nyena a nye ködyö wukiŋdye ŋilo rubaŋga lonyit a gureki kode a torela ti luguriet.

¹⁵ A koane joŋdi ŋilo rubaŋga i pirit ’yuret na rubaŋgajin a mirinyuŋdye kwe nanyit kaŋo, a nye ’yuŋe lepeŋ i pirit ’yuret na rubaŋgajin; a rima kune wuu kaŋo i merete lo pirit ’yuret na rubaŋgajin;

¹⁶ a nye ködyö ’dumaddi gwolokok lonyit se ko kupir kanyit, a gubaddi se i pirit ’yuret na rubaŋgajin nyona i swöt lo ’yure, i nu pirit ’buket na kurök;

¹⁷ a nye morgi kwenti i köpukön a kereŋdi lepeŋ ama ti gwon asut. A koane ködyö ’yuŋe lepeŋ i nu pirit ’yuret na rubaŋgajin loki, i kaden na gwon i kimaŋ loki kune; ŋilo a rubaŋga lo ’yu ’yura ’buluŋ ko kimaŋ, anyen möara paleleŋ ko MATAT yu.