Kolosai 1 - Bibilia Buk na Ŋun nagon koti luŋu a

Romesi

¹ Nan Paulo a luyökie lo Kristo Yesu kogwon Ŋun ’de ’dekan sona.

² Nan se ko Timoteo luŋaser likaŋ a roman ko ta Ŋutu ti Ŋun, logon a kayupok lo gwon ko Kristo i mugun Kolosai yu kulu, adi, Ti ’busan ko taliŋ na po ko Ŋun Baba likaŋ na gwe ko ta.

Paulo kwakwaddu Ŋun tiŋdu tinate

³ Yi ŋupi tiŋdu Ŋun Monye Matat likaŋ Yesu Kristo tinate i kwakwaddu nikao kogwon kulya kasu,

⁴ kogwon yi a yio kulya ti gwon nasu i yubbö na Kristo Yesu se ko gwon nasu i nyaŋu na ŋutu liŋ ti Ŋun.

⁵ Ta gwon i yubbö ko i nyaŋu kogwon ta yeŋdu ŋo nagon a ’delaki ta ki yu kune. Ta köju a yiŋ kulya ti ŋina yenet i diŋit nagon Loŋe Lo ’but logon a kulyaet lo to ’diri a ’dur kasu ŋini.

⁶ Iŋkoi, Loŋe Lo ’but ŋoŋoi i kak ’bukuluŋ a rade ludweki, gwoso nagon gwon sona kasu kiden suluja i lor lo yiŋge ta kulya ti ’busan na nyaŋu na ŋun, a ta iŋge kurun to ’diri nanyit.

⁷ Epapra nyaratti likaŋ logon yi kita i pirit na geleŋ ko lepeŋ lo todinikiŋdyö ta kine kulya. Lepeŋ a kakitanit lo yiyiniki lo Kristo ko a kita kayaŋ i pirit.

⁸ Lepeŋ lo nyönyökökiŋdyö yi kulya ti nyaŋu nasu nagon Mulokotyo Loke a tiŋdu ta na.

⁹ Ko ŋina kwe, suluja i lor lo yiŋge yi lu, yi a ko ko ’yu kwakwaddu kogwon kulya kasu. Yi momo ’yu Ŋun anyen nye böŋö tiŋdu ta kopon liŋ se ko kuruŋdyo liŋ nagon Mulokotyo lonyit a tikin kune, anyen ta böŋö deden parik ko lepeŋ ’de ’dekan nyo.

¹⁰ yi momo ’yu Ŋun anyen ta böŋö woro ko gwiliŋisi logon a lo ’but ko Matat i komor, i tulyoŋgu na lepeŋ i ŋo liŋ, ko i radan na ludweki logon a konesi na ’but ka ’de ka ’de, koti anyen ta böŋö moröddu ŋerot i deŋdya na Ŋun bia parik.

¹¹ Bö ŋo ti nye togo ’yi ta ko riŋit liŋ nagon po i kido nanyit nagon a minyo na, anyen ta böŋö gwo ’dan go i ŋoŋaddu na ŋo liŋ ko lyöŋön,

¹² i tiŋdu na Ŋun Monye tinate. Lepeŋ a koŋdya yi a jukin i parundya na ŋo ti ŋutu ti Ŋun na gwon i parara kune.

¹³ Lepeŋ a lwökuŋdyö yi kaŋo i riŋit na mudwe, a toyubödi yi i tumatyan na Ŋuro lonyit lo nyanyara lo.

¹⁴ Ŋilo Ŋuro a yukuuŋdyö yi kaŋo, kweja adi lepeŋ a pitökiŋdyo yi i toronjin kaŋ.

Kristo a ŋa koti kita nanyit a nyo

¹⁵ Kristo kelaji ko Ŋun logon ti meta lo, ko a kayu a gwe i ŋerot na ŋo liŋ lo gweya kilo,

¹⁶ kogwon Ŋun a gweja ŋo liŋ kogwon tomirian na ŋilo Ŋuro, kode se a ŋo ti ki kode a ti kak ni, kode se a ŋo nagon memeta kode nagon ti meta kune, kode a si ’daesi ti kimak, kode a todumalan, kode a tumatyanjin, kode a kidoni saresi; iŋkoi, Ŋun a gweja ŋo liŋ kogwon tomirian na Ŋilo Ŋuro ko a kanyit.

¹⁷ Ŋilo Ŋuro kata a kokwe na ŋo liŋ, a ŋo liŋ ’depakiŋdye i pirit na geleŋ kanyit i mugun.

¹⁸ Lepeŋ a kwe na mugun, kweja adi lepeŋ a kwe na kanisa; ŋina kanisa pipiluŋdya ko lepeŋ logon a ŋien a togeleŋ i twan lo, anyen lepeŋ böŋö gwon a duma lo ŋo liŋ.

¹⁹ Kogwon Ŋun a wuluŋdyö adi ti ru nanyit na Ŋun ’bukuluŋ gwolore ko Ŋilo Ŋuro i mugun,

²⁰ anyen tomoruŋdya ŋo liŋ kanyit ni ko Ŋuro lonyit i mugun, kweja adi ŋo liŋ ti kak ni kode ti ki yu. Lepeŋ a tomorakiŋdya se ko rima ti Ŋuro lonyit na wuun kak i kodini na goro kune.

²¹ Ta koti ko ’borik kasu köju a gwon pajo ko Ŋun, ta a gwon a merok kanyit kasu i yeyeesi ko kasu i konesi narok kine.

²² Ama soŋinana Ŋun aje tomorun ta a kanyit kogwon twan na Ŋuro lonyit ko mugun na na kak, anyen nye böŋö joŋdya ta i gwo ’dan kanyit i komŋo a loke, ’bak yuyukesi, ’bak kulya.

²³ Ama ta agu kodyo yeŋon gwo ’dan go i yubbo nasu, an ta ko wusaji ta kaŋo i yeŋdu na kulya nagon ta a yiŋ i Loŋe Lo ’but kune. ŋilo Loŋe Lo ’but aje tokuki i ŋutu liŋ ti kak ’bukuluŋ; nan Paulo logon a katokuonit lo ŋilo Loŋe.

Paulo kitakiŋdya kanisa

²⁴ Nyenagon soŋinana nan lyölyönön i ŋoŋesi kwe kogwon kulya kasu, kogwon na noŋgi nan koyo i mugun na, nan tuturioddu ŋoŋesi ti Kristo nagon a ko nyuŋ ’baka kune i kulya ti mugun nanyit nagon a kanisa na.

²⁵ ŋun a tiŋdu nan a kakitanit lo ŋina kanisa. Lepeŋ a tiŋdu nan i kita kogwon ta, anyen tiŋdu ta i deŋdya na kulyaet lo Ŋun ’bura i ŋo liŋ.

²⁶ Ŋilo kulyaet lonyit köju a Iwon a ko dena i diŋitan ti ’beron i kiyukan ti merenyejin kaŋ, ama soŋinana aje kweki Ŋutu kanyit.

²⁷ Ŋun ’de ’dekan kwekiŋdya lepeŋat ko ŋina Iwon a tukworien gwanan ko a minyo i kiden na juron liŋ. Ŋina Iwon a Kristo logon gwon kasu i töilyet lo, logon tiŋdu ta i yeŋdu na minyo logon ta mo wuwu lo.

²⁸ Ŋilo a Kristo logon yi tokujöŋ kulya kanyit lo, i kukuju na ŋutu liŋ ko i todiŋdyo na Ŋutu liŋ ko koŋon ’bukuluŋ, anyen kwekiŋdya se liŋ geleŋ geleŋ ko Ŋun i komor gwoso Ŋutu lo wora kulo ko Kristo i mugun.

²⁹ Nye Ŋina kwe nagon nan kikita parik na, nan mömorju ko riŋit nanyit liŋ nagon kikita parik koyo i mugun na.