Kenet 8 - Bibilia Buk na Ŋun nagon koti luŋu a

Arona a togwi ’dikiŋdya lombojin ki

¹ A MATAT kulyani ko Mose adi,

² Taki Arona adi, Na togwi ’dikiŋdye do lombojin ki nu, kilo lombojin buryo ködyö tiŋdu parara nase i ŋerot na gwo ’diet lose.

³ A Arona koŋdi sona; a nye togwi ’dikiŋdye lombojin ki anyen tiŋdu parara i ŋerot na gwo ’diet lo lombojin, gwoso na saŋi MATAT Mose nu.

⁴ A lu gwo ’diet lo lombojin iŋge nitwe i dakap, suluja i mukök nanyit tojo i koturön kanyit; a Mose iŋge teteŋdya gwo ’diet lo lombojin sona gwoso nu miret nagoŋ MATAT a kwekin nye nu.

’Boroki na Lewijin

⁵ A MATAT kulyani ko Mose adi,

⁶ Joŋe Lewijin kaŋo i kiden na ŋutu ti Yisaraele, ko toke ’yi lepeŋat.

⁷ Na a ŋo nagoŋ do ködyö kökon i toke ’ya na lepeŋat. Gwagwaddi lepeŋat ko pioŋ tokelesi, ko ti se ’bariŋdi mugunya kase liŋ, ko ti se lalaji boŋgwat kase i toke ’ya na ’börik.

⁸ Ko ti lepeŋat ’dumuŋdye dwot lo ’dit se ko ’doket na ’bolot na jiö a naliliŋök, nagoŋ a ŋola ko welet nagoŋ ködyö wuki ko lepeŋ i pirit na geleŋ na, a do ’dumuŋdye lele dwöt lo ’dit a rubaŋga lo toron.

⁹ A do ködyö joŋdi Lewijin i komor na kemia torumet, a do pepenuŋdye momoret ’bukuluŋ na ŋutu ti Yisaraele.

¹⁰ A do joŋdi Lewijin ko MATAT i komor, a ŋutu ti Yisaraele ködyö sopakiŋdye könisi kase ko Lewijin loki,

¹¹ a Arona ködyö kweji Lewijin ko MATAT i komor gwoso rubaŋga lo kwekweya lo ŋutu ti Yisaraele, anyen gwon a kita nase i kitakiŋdya na MATAT.

¹² A Lewijin ködyö sopakiŋdye könisi kase i loki na kusik ti dwönin; a do wukiŋdye geleŋ a rubaŋga lo toron ko lele a rubaŋga lo ’yuraki MATAT ’buluŋ, i toke ’ya na Lewijin.

¹³ A do tiŋdi Lewijin ko Arona ko ŋwajik kanyit i komor, a do kweji lepeŋat a rubaŋga lo kweki MATAT.

¹⁴ Nyena a do ködyö koruŋdye Lewijin sona i kiden na ŋutu ti Yisaraele, a Lewijin mo gwe a ŋutu kwe.

¹⁵ A i mukök na kine kulya a Lewijin mo lupuŋdye i kemia torumet i koŋdya na kita, a do toke ’yi lepeŋat, a do kweji lepeŋat a rubaŋga lo kwekweya.

¹⁶ Kogwon se a tiki nan ’bukuluŋ i kiden na ŋutu ti Yisaraele; kogwon nan a joŋdya se köyö ni i pirit na ŋo liŋ logon ŋaju pelela, logon a kayujin ti ŋutu liŋ ti Yisaraele.

¹⁷ Kogwon kayujin liŋ ti ŋutu ko ti toro ’bo i kiden na ŋutu ti Yisaraele kulo a kwe; nan a geluŋdya se köyö ni i ŋilu lor lo tatuje nan kayujin liŋ ti jur lo Ejipeto lu,

¹⁸ a nan iŋge joŋdya Lewijin i pirit na kayujin liŋ i kiden na ŋutu ti Yisaraele.

¹⁹ A nan iŋge tiŋdu Arona ko ŋwajik kanyit kilo Lewijin a ’doket i kiden na ŋutu ti Yisaraele, i koŋdya na kita i pirit na ŋutu ti Yisaraele i kemia torumet lukata, ko i toke ’ya na ŋutu ti Yisaraele, an twanti loron ko mok ŋutu ti Yisaraele na mijuŋdye se nyona i pirit nake na rurwan nu.

²⁰ A Mose ko Arona ko momoret liŋ na ŋutu ti Yisaraele konakiŋdye Lewijin sona: iŋkoi a ŋutu ti Yisaraele konakiŋdye se gwoso i ŋo liŋ na saŋi MATAT Mose i kulya ti Lewijin kunu.

²¹ A Lewijin toke ’yi ’börik i toron, a se lalaji boŋgwat kase kune; a Arona kweji se a rubaŋga lo kwekweya ko MATAT i komor, iŋkoi Arona koŋdya sona anyen lepeŋat totokela.

²² A i mukök na kine kulya a Lewijin lupöni i kemia torumet i koŋdya na kita nase ko Arona i komor se ko ŋwajik kanyit; nyena a se konakiŋdye lepeŋat sona gwoso na saŋi MATAT Mose nu i kulya ti Lewijin.

Kiŋajin kitaesi ti Lewijin

²³ A MATAT kulyani ko Mose adi,

²⁴ Kine a kulya ti Lewijin adi suluja i diŋit nagoŋ se gwon ko kiŋajin merya murek wot mukanat tojo ko ŋerot nu, a se ködyö lupöni i kemia torumet i koŋdya na kita;

²⁵ a ko ŋutu gwe ko kiŋajin merya mukanat a se ködyö kö ’yi koŋdya na nu kita, a se mo tine kita köti,

²⁶ ama a se ködyö parakiŋdye luŋasirik kase i kemia torumet lukata, i koŋdya na kita nagoŋ a wulöki se na, kweja adi se ködyö ti wulöki kita köti. Nyena a do ködyö konakiŋdye Lewijin sona i wulökiŋdyö na se kitajin kase.