Kenet 4 - Bibilia Buk na Ŋun nagon koti luŋu a

Kitajin na wulöki Lewijin kune

¹ A MATAT jambi ko Mose ko Arona adi,

² Keŋdi ta nyakwariat ti Kowat i kiden na nyakwariat ti Lewi gwoso i midijik kase, gwoso i kötumitön ti merenyejin kase,

³ suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ lo po i kita i kemia torumet kulo.

⁴ Na a kita nagon nyakwariat ti Kowat ködyö kökon i kemia torumet, kweja adi lepeŋat tiju tito nake na rurwan parik.

⁵ A na yuöddi ŋutu kaŋo i mera nu, a Arona ko ŋwajik kanyit ködyö lupöni lukata, a ’dumuŋdye kaŋo boŋgo koret na leleyo na, a muŋge saŋduk na gurupö tökoresi ko ŋina boŋgo;

⁶ a kirut se ködyö mukö-kiŋdye gobero ti kijakwa lo si ’da i pioŋ kata kulo kanyit loki, a petaki-ŋdye nene boŋgo nagem liŋ i loki nanyit, a se ködyö sukiŋdye turya lo ’dököri lepeŋ kulo nyin.

⁷ A se ködyö petakiŋdye boŋgo nagem i misa nagon ambatajin peta ko Ŋun i komor na, a tiŋdi kanyit loki kalabajin, ko ’yulukutan, ko lulurön, ko lupunikö logon a ti rubaŋgajin ’bu ’bukesi; a ambatajin na yeyeŋon kata kune ködyö gwe kanyit loki köti;

⁸ a se ködyö petakiŋdye boŋgo nator kase loki, a mukökiŋdye gobero ti kijakwa lo si ’da i pioŋ kata kulo i nu muket, a se ködyö sukiŋdye turya lo ’dököri lepeŋ kulo nyin.

⁹ A se ködyö ’dumuŋdye boŋgo nagem, a muŋge gwo ’diet lo lombojin, ko lombojin kanyit, ko gwakesi kanyit, ko ta ’doka kanyit, se ko luluron liŋ ti welet logon lepeŋat kita ko se kulo.

¹⁰ A se ködyö tiŋdi lu gwo ’diet ko tito kanyit liŋ i muket nagon a gobero ti kijakwa logon si ’da i pioŋ kata kulo, a lilikiŋdye i ture lo ’dököri lepeŋ lo.

¹¹ A se ködyö petakiŋdye boŋgo nagem i pirit ’yuret na bökur nagon a dakap na loki, a muŋge nye ko gobero ti kijakwa lo si ’da i pioŋ kata kulo, a kodyo sukiŋdye turya lo ’dököri lepeŋ kulo nyin;

¹² a se ködyo ’dumuŋdye tito liŋ nagon kitarikin i pirit nake na rurwan kune, a tiŋdi lepeŋat i boŋgo nagem lukata, a muŋge lepeŋat ko gobero ti kijakwa lo si ’da i pioŋ kata kulo, a lilikiŋdye i ture lo ’dököri lepeŋat lo.

¹³ A se ködyö ’dumaddi kurök ti pirit ’yuret na rubaggajin, a petakiŋdye boŋgo na ’bule kanyit loki;

¹⁴ a se ködyö tiŋdi kanyit loki tito liŋ na kitarikin i nu pirit ’yuret, nagon a ta ’doka, ko sowesi kanyit ti lokore, ko korekan, ko kalabajin, iŋkoi tito liŋ ti pirit ’yuret na rubaŋgajin; a se petakiŋdye kanyit loki muket nagon a gobero ti kijakwa lo si ’da i pioŋ kata kulo, a ködyö sukiŋdye turya lo ’dököri lepeŋ kulo nyin.

¹⁵ A nagon Arona ko ŋwajik kanyit aje tutuŋgö muggö pirit nake na rurwan ko tito kanyit liŋ na yuöddi ŋutu kaŋo i mera nu, a i mukök a nyakwariat ti Kowat ködyö lo poŋdi i ’dokoddu na kine tito, ama se ködyö ti ’bo ’yu kine go nake na rurwan an se twatwa. Sekine tito ti kemia torumet nagon nyakwariat ti Kowat ’do ’dokoro kune.

¹⁶ A Elejara ŋuro lo koane Arona ködyö tiji welet na lombojin, ko bökur lo mon paleleŋ, ko ’doket na ’bolot nagon tiki perok liŋ, ko welet na welaki ’e ŋutu i kita, a meddi kemia liŋ, ko ŋo liŋ na gwon kanyit lukata kune, nagon a ti pirit nake na rurwan se ko tito kanyit.

¹⁷ A MATAT jambi ko Mose ko Arona adi,

¹⁸ An ta ko kölökin ta kötumit na midijik ti ŋutu ti Kowat i toliki i kiden na Lewijin;

¹⁹ nyena anyen lepeŋat böŋö gwon jörun a tine twatwa na pöri se nyona i go nake na rurwan parik kune, konaki ta lepeŋat sona adi, ti Arona ko ŋwajik kanyit lupöni lukata i wulökiŋdyö na se liŋ geleŋ geleŋ kitajin kase ko nagon se ’do ’dök kune,

²⁰ ama a se ködyö tine lupö lukata i meddya na go nake na rurwan kune, ma ’di ko diŋit a na ’dit döŋdi, an se twatwa.

²¹ A MATAT jambi ko Mose adi,

²² Keŋdi nyakwariat ti Gereson, gwoso i midijik kase ko gwoso i kötumitön ti merenyejin kase,

²³ a do ködyö keŋdi lepeŋat suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ lo po i kita i kemia torumet kulo.

²⁴ A ŋina gwe a kita na midijik ti ŋutu ti Gereson, i kita ko i ’doggu na go na pömöni:

²⁵ kweja adi se ködyö ’doŋgu boŋgwat ti kemia nagon a kemia torumet ko muket nanyit, ko muket nagon a gobero ti kijakwa lo si ’da i pioŋ kata kulo na gwon kanyit loki na, ko boŋgo muket na kötumit na kemia torumet,

²⁶ ko boŋgwat na leleyo a ti mariŋ, ko boŋgo na muŋgö kötumit lupet na mariŋ nagon lorga kemia se ko pirit ’yuret na rubaŋgajin na, ko patala kase, ko go liŋ nagon se kikitari kune; a ti se koŋdi go liŋ nagon kodyö kökona i kine go kune.

²⁷ A Arona ko ŋwajik kanyit ködyö sarakiŋdye nyakwariat ti Gereson i kita nase liŋ, kweja adi i go liŋ nagon se ’do ’dök, ko i go liŋ nagon se kökon kune; ta ködyö wulökiŋdyö lepeŋat i tiju na ŋo liŋ nagoŋ se ’do ’dök kune.

²⁸ Nye ŋina kita na midijik ti nyakwariat ti Gereson i kemia torumet, Itamar ŋuro lo koane Arona ködyö lo meddya kita nase.

²⁹ A do ködyö keŋdi nyakwariat ti Merari gwoso i midijik kase, ko gwoso i kötumitön ti merenyejin kase;

³⁰ a do ködyö keŋdi lepeŋat suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ lo po i kita i kemia torumet kulo.

³¹ A kine gwe a ŋo nagoŋ a saraki se i ’doggu, nagoŋ a kita nase liŋ i kemia torumet: kweja adi, baulan ti kemia, ko turya görösi kase, ko togwi ’diesi kase, ko gwo ’diesi kase,

³² ko togwi ’diesi ti mariŋ na logga kemia, ko gwo ’diesi kase, ko kaleto kase, ko patala kase, ko ŋo kase liŋ na kikitarikin, ko tito kitaesi kase liŋ; a ta ködyö kenakiŋdye ŋutu ko karin kase ŋo nagoŋ se ’do ’dök kune.

³³ ŋina a kita na midijik ti nyakwariat ti Merari, kweja adi ŋina a kita nase ’bukuluŋ i kemia torumet, Itamar ŋuro lo koane Arona lo meddya se.

³⁴ A Mose ko Arona ko temejik ti momoret keŋdi nyakwariat ti Kowat, gwoso i midijik kase ko gwoso i kötumitön ti merenyejin kase,

³⁵ suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ lo po i kita i kemia torumet kulo;

³⁶ a kenet nase a midijik midijik gwe a ŋutu alipan murek ko miajin buryo ko merya mukanat.

³⁷ Nye ŋina kenet na midijik ti ŋutu ti Kowat, Kweja adi ŋutu liŋ logon kita i kemia torumet, logon Mose ko Arona a ken kulo gwoso na sarakiŋdye MATAT ko Mose i kutuk na.

³⁸ A ŋutu lo kena ti nyakwariat ti Gereson, gwoso i midijik kase ko gwoso i kötumitön ti merenyejin kase,

³⁹ suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ logon po i kita i kemia torumet kulo,

⁴⁰ se logon a kena gwoso i midijik kase ko gwoso i kötumitön ti merenyejin kase kulo gwe a alipan murek ko miajin buker ko merya musala.

⁴¹ Nye ŋina kenet na midijik ti nyakwariat ti Gereson, kweja adi ŋutu liŋ logon kita i kemia torumet, logon Mose ko Arona a ken kulo gwoso i saret lo MATAT lo.

⁴² A ŋutu lo kena ti midijik ti nyakwariat ti Merari, gwoso i midijik kase ko gwoso i kötumitön ti merenyejin kase,

⁴³ suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ logon po i kita i kemia torumet kulo,

⁴⁴ se logon a kena gwoso i midijik kase kulo gwe a alipan musala ko miajin murek.

⁴⁵ Nye ŋina kenet na midijik ti nyakwariat ti Merari, logon Mose ko Arona a ken gwoso na sarakiŋdye MATAT ko Mose i kutuk na.

⁴⁶ A Lewijin liŋ logon Mose ko Arona ko temejik ti ŋutu ti Yisaraele a ken kulo, gwoso i midijik kase ko gwoso i kötumitön ti merenyejin kase,

⁴⁷ suluja i se logon ko kiŋajin merya musala tojo ko kiŋajin merya mukanat, kweja adi ŋutu liŋ logon po i koŋdya na kita, ko i ’doggu na ŋo na pömoni i kemia torumet kulo,

⁴⁸ kweja adi se liŋ logon a kena kase kiden kulo gwe a ŋutu alipan budök ko miajin mukanat ko merya budök.

⁴⁹ A ŋutu liŋ geleŋ geleŋ kenani gwoso na sarakiŋdye MATAT ko Mose i kutuk na, gwoso i kitajin kase, ko gwoso i ’doko nase; nyena a Mose keŋdi se sona gwoso na saŋi MATAT lepeŋ nu.